Skip to main content
115

Akissarsialeriffik akissarsialerinermut siunnersortissarsiorpoq

Isumalluutit Kalaallit Nunaanni inuiaqatigiit ineriartornerinut atorneqarsinnaasunngortikkumallugit pisariitsumik aningaasartuutaavallaanngitsumillu suleriaaseqartuni Namminersorlutik Oqartussanullu sulisunut tunngatillugu allaffissornikkut suliat pitsaasumik suliarineqartarnissaanut suleqataarusuppit?
 
Namminersorlutik Oqartussat Qitiusumik Allaffeqarfiat suliffeqarfiuvoq pissanganartoq assigiinngitsunillu suliaqarfiusoq, tassaniipput naalakkersuisoqarfiit aqutsisoqarfiillu arlallit tamarmik immikkut aalajangersimasunik suliaqarfiusut.
 
Akissarsialeriffik Namminersorlutik Oqartussani Aningaasaqarnermut Akileraartarnermullu Naalakkersuisoqarfiup ataani Aningaasaqarnermut Sulisoqarnermullu Aqutsisoqarfimmi inissisimavoq. Namminersorlutik Oqartussat immikkoortortaqarfiillu sinnerlugit suliassat akissarsianut tunngassuteqar-tut suliarisarpavut.
Suleqatigiit akissarsianik nakkutilliinermik akissarsiassanilu suliaqartartut tamarmillu Akissarsialerivimmi pisortaasup ataani inissisimasut 15-iusut Nuummilu allaffeqartut suleqatigissavatit..

Suliap allaaserinera
Akissarsialeriffik suliffeqarfimmi Sulisoqarnermut immikkoortortaqarfiup ilaattut inissisimavoq, akissarsialerinermullu siunnersortitut sulisut pikkorissut suleqatigiinnissamik, ikioqatigiittarnissamik ataatsimoorlutillu illinniarfeqatigiittarnissamik pingaartitsisut suleqatigissavatit. Suliassat assigiinngiiaartuupput qaffasissumillu inissisimallutik suliassallu ataasiakkaat suliassartai ilusaallu aamma allanngorartuullutik – taamaattumillu suliffimmi ulapaarfiusumi suliannik iluarisimaarinnillutit sulisinnaanissaat pingaaruteqarluinnarluni ingerlaatsit suleriaatsillu atuuttut ineriartortinneqarnissaanut suleqataallutit.
Atorfimmut tunngatillugu pitsaassuseq, nammineersinnaaneq pitsaalluinnartumillu sulisinnaanissaq aallaavigalugit sulisarnissat pingaartinneqarpoq soorluttaaq suliassannut tunngatillugu iluatsittumik sulisinnaassaguit suliassaqarfiit akimorlugit oqaloqatigiittarnerit suleqatigiittarnerillu aqqutigalugit pingaaruteqarluinnartoq.

Suliassatit pingaarnerit makkuupput

  • Akissarsiassalerineq
  • Mail-inik suliaqartarneq
  • Sulisunut tunngatillugu paasissutissat qitiusut nutartertarnissaat
  • Akissarsisitsinissat aaqqissuuttarneri naammassisarnerilu – tassunga ilanngullugit piffissaq eqqorlugu eqqortumillu akissarsititsisarnissaq
  • Akissarsianut tunngatillugu tassunga ilanngullugit nikingassutit nalunaarsortarnerinut peqataa-sarneq.

Allaffissornikkut suliareqquneqartut assigiinngitsut

Tunuliaqutat
 Atorfik tamatigoortuuvoq ilungersornartuullunilu inuttullu piginnaasatit eqqarsaatigalugit  naatsorsuutinik paasinnittarnitit, akissarsialerinermillu misilittakkatit eqqarsaatigalugit annertuumik piumasaqaatitaqarluni.
 
Suliffimmi pitsaassutsimik pingaartitsisumi sulisinnaassaatit suliffimmilu pitsanngorsaatissanik aaqqiis-sutissanillu suliaqartarnermi peqataallutit aaqqissuusamik sulisinnaanermik piginnaaneqassaatit – tamakkulu tamarmik naleqartitanik aallaaveqarluni suleqatigiinnikkut angusaqartarnissamik kissaateqarnermik aallaaveqarput.
 
Makkununnga piginnaaneqarnissat naatsorsuutigaarput

  • Taamaangajattumik atorfeqarsimanikkut annertuumik misilittagaqartutit
  • Akissarsiat pillugit isumaqatigiissutit assigiinngitsut sulisullu akileraartarnernut maleruagassanik ilisimasaqartutit suliassallu suliassaqarfinnut assigiinngitsunut tunngassuteqartut suliarisarnissaanut nuannarinnittuusutit.
  • Excel-imik atuisinnaassasutit
  • Allattariarsornikkut oqaasiinnakkullu kalaallisut qallunaatullu piginnaasaqartutit
  • Aaqqissuusamik suleriaaseqartutit, peqqissaartuusutit, pitsaassutsimik pingaartitsisuusutit akisussaassuseqartumik pitsaasumillu sullissinissamik pingaartitsisuullutit.
  • Suleqatigiit soqutigisaat aallaavigalugit nammineerlutit sulisinnaassuseqartutit.
  • AU-mik allaffimmiutulluunniit ilinniagaqartutit.
    Suliffeqarfittut neqeroorutigisinnaavagut suliffik sulisunik pimoorussisunik sulisulik aamma qanimut attaveqaqatigiiffiusoq, suliatigut isumasioqatigiiffiusartoq immikkoortortaqarfimmilu pisortaanernut qanimut oqaloqatigiiffiusartoq kiisalu inuttut ilinniakkatigullu ineriartorfissaqartoq.



Aningaasarsiatigut atorfinitsitaanermilu atugassarititaasut
Akissarsiat atorfininnermilu atugassarititaasut, tassunga ilanngullugit atorfinitsitaanermi soraarnermilu angalanissamut akiliunneqarnissamut pisattallu nassiunneqarnerannut Kalaallit Nunaanni Namminersorlutik Oqartussat kattuffiullu isumaqatiginniarsinnaatitaasup attuumassuteqarfigisap akornanni isumaqatigiissutaasut atorfininnerup nalaani atuuttut naapertorlugit ingerlanneqassapput.

Najugaq
Atorfimmut atatillugu sulisunut inissiamik innersuussisoqarsinnaanngilaq. Qinnuteqartoq Namminersorlutik Oqartussani atorfeqarnermini sulisutut ineqartinneqareersimaguni sulisutut ineqarsinnaatitaanini tigummiinnarsinnaavaa. Atorfimmut atatillugu ini atorfeqarnermut tunngavoq, taamaalilluni atorfeqarnerup unitsinnerani qimanneqassalluni.

Qinnuteqaatit, CV, ilinniarsimasanut pikkorissaatigisimasanullu uppernarsaatit kiisalu paasissutissat allat pisariaqarsinnaasut "qinnuteqaat nassiuguk" toorlugu nassiutikkit.
E-mail-ikkut qinnuteqaatinik tigusineq ajorpugut.

 

 

Naalakkersuisut pillugu

Pissanganartunik ujarlerpit sulinerillu aqqutigalugu ulluinnarni inuunermut sunniuteqarnissat kissaatigaajuk, taamaaliornikkullu siunissamik ilusilersueqataallutit? Taava Namminersorlutik Oqartussani sulinissaq ilinnut tulluuppoq. Suliamut tunngatillugu sulisutut piginnaasaqarnissaq, pissutsinut misissuilluarsinnaaneq kiisalu allanngornernut piareersimajuarneq assut pingaartitaraagut. Tamakku saniatigut ulluinnarni suliassannik ilusilersuisinnaanerit uippakajaalertannginnissallu pingaaruteqarput. 

Namminersorlutik Oqartussat tassaapput, Qitiusumik Allattoqarfik 650-it missaanik sulisulik naalakkersuisoqarfinnut arfineq-pingasunut aqutsisoqarfinnullu arlalinnut agguataarsimasut. Katilluta inuit 2500-t sinnerlugit Namminersorlutik Oqartussanut atassuteqarpugut. Qitiusumik Allattoqarfiup suliassaraa Naalakkersuisut aalajangernissaannut tutsuiginartumik tunngavissinnissaat kiisalu politikkikkut aalajangikkat piviusunngortinnissaat. 

Namminersorlutik Oqartussat pillugit annertunerusumik uani atuarsinnaavutit http://www.naalakkersuisut.gl/job

Qinnuteqaat nassiuguk