Skip to main content
104

Dette jobopslag er udløbet

MÆLKEBØTTEN-IMUT PISORTASSAMIK – MEEQQAT ILLUAT ISUMAGINNINNIKKUT KULTURIKKULLU NUTAALIORFIUSOQ

Aqutsinermik perorsaalluarnermillu misilittagaqarpit? – aamma Nuummi meeqqanut inuussuttuaqqanullu allannguutaasussamik suleqataarusuppit?

Atorfik
Atorfimmi pissanganartumi Mælkebøtten-imi pisortaassaatit Mælkebøttecenterimut ilaalerlutit, piginnaanernut ineriartortitsinermullu pisortaq qullersaralugu. Mælkebøttenip aqunneqarneranut ingerlanneqarneranullu pisortaallutit; ornittakkamut, meeqqat iggaviannut aammalu ulloq unnuarlu angerlarsimaffimmut.

 

Suliassaqarfiit assigiinngisitaarput, ilaatigullu makku suliarissavatit:

  • Mælkebøttenip ingerlataani aqutsineq suliassanillu ataqatigiissaarineq – ulloq unnuarlu angerlarsimaffimmi, ornittakkami kiisalu meeqqat iggavianni.
  • Sulisorisat sulinerminni pitsaanerpaanik atugaqarnissaat qulakkiissallugu, meeqqat ulloq unnuarlu angerlassimaffimmut inissinneqarsimasut atugaasa pitsaanerpaanissaat qulakkiissallugu, meeqqat inuussuttuaqqallu ornittakkamik atuisut sammisaqartilluarnissaat qulakkiissallugu.
  • Perorsaanikkut periutsit/iliuuseqarsinnaanerup, sulisorineqartullu piginnaasaasa ineriartortittuarnissaat qulakkiissallugu.
  • Suleqatigiinnik ataatsimoorluni suliffeqarfimmut tamarmiusumut akisussaaqatigiittunik pilersitsissalluni.
  • Suleqatigeeriaatsip, ataqqeqatigiinnermik, oqaloqatigiinnermik, ineriartorsinnaanermik iliuuseqarnermillu ilisarnaatillip, ineriartorteqqinnissaa qulakkiissallugu.
  • Avatitsinni suleqatit suleqatigineqarnerat suliffeqarfimmilu aallunneqartut ataqatigiissassallugit.
  • Ataavartumik attaveqarneq, ataqatigiissaarineq kommunillu Mælkebøttenip ulloq unnuarlu angerlarsimaffianut inissiisartut attavigineqarnerat nalunaarusiorfiginerallu isumagissallugit.

 

Ataatsimut isigalugu, Mælkebøttenip Mælkebøttecenterillu suliffeqarfittut ineriartorneranut piviusunngortitsiniarnerit nalilersuinerillu, nanginneqarnerani peqataassaatit. Tamatuma saniatigut suliffeqarfiup meeqqat misissuiffigineqartarfiattut aamma kulturikkut sammisaqarfiusutut atuuffiunera ingerlanneqarlunilu ineriartortinneqassaaq.

Suliaqarninni angusatit ilaatigut sulisorineqartut namminneq suliaminnullu tunngasutigut ineriartornerannik takussutissaqassapput. Sulisut suliffiminni naammagisimaarinninnerulerlutik, Mælkebøttep perorsaariaatsikkut ineriartornermini angusai pitsaanerulersinneqassapput.

Suliffimmi piffissami allanngorartumi sulisinnaanissaq piareersimaffigissavat, taamatullu avammut kiinnertarnermik paasititsiniaanermilu suleqataasarnissaq naatsorsuutigissallugu.

 

Piginnaanerit ujartukkat
Naatsorsuutigineqarpoq suliffeqarfinni Mælkebøttecenterimi suliassanut assigusunik suliaqarfiusuni aqutsinikkut pitsaasunik angusaqartarsimanerit uppernarsarneqarsinnaassasoq. Pingaartinneqarpoq ulloq unnuarlu angerlarsimaffimmi ornitakkamilu misilittagaqarlutillu ilisimasaqarnissat.

Ilinniarnikkut suut aqqusaarsimaneritit pingaarnerpaajunngillat, naatsorsuutigineqarporli isumaginninnikkut, peqqissutsimut, ilinniartitaanermut perorsaanermuluunniit tunngasumik ilinniagaqarsimassasutit. Taamatuma saniatigut suliffeqarfimmi aqutsinermut tunngasutigut ilinniaqqissimanissat kissaatiginartinneqarpoq. Meeqqat inuussuttuaqqallu sumiginnagaanermik aqqusaagaqarsimasut misilittagaqarfigigukkit ilisimasaqarfigalugillu, tamanna pinngitsoorani iluaqutaassaaq.

Nammineerlutit sulisinnaassuseqarnerit aalajangiisuussaaq, aamma piumassuseqarluarlutit, aallarnisaasuullutit suliffeqarfiullu naleqartitaanik tamani atuuttunut illersuisuunissat pingaaruteqarluinnarpoq.

Imminut nalunngilluinnartuuvutit, aamma nammineq naleqartitatit isummatillu ilisimaarilluarpatit. Allanut naleqqiullutit inissisimaffiit ilisimalluarpat allanullu attaveqallaqqillutit.

Kaammattuisuuvutit, suleqatigiinnissamik siuarsaasuullutit aammalu ineriartortitsisinnaavutit savituujullutillu. Aporaattoqartillugu akunnermiliussinaavutit iliuuseqarnikkullu sapiissuseqarlutit qanoq pisoqarnera naapertorlugu aaqqiisinnaassuseqarlutit.

Tamakku saniatigut naatsorsuutigineqarpoq tunuarsimaartuunngitsutit, tunniusimasuusutit ajornartoorfinnilu nikallujuitsuusutit. Atuisunut sulisorisanullu maligassiuisuussagavit, naatsorsuutigineqarpoq tatiginninneq, aalajaassuseq uppernassuseqarnerlu ilisarnaatigigitit.

Kingunissalimmik isornartorsiunermut tusarnaarsinnaasariaqarputit isummersorlutillu – pingaartumik isornartorsiuneq isorinninneruppat – tamatumanilu sapiissuseqarlutit suliffeqarfimmi namminersorluni ingerlanneqartumi isornartorsiuineq ineriartorfissatut isigisinnaasariaqarpat.

Tamakkiisumik isiginnissinnaanerit naatsorsuutigineqarpoq aamma ajornartoorfiusuni aamma aallutat arlariit ataatsikkut ingerlassinnaasariaqarpatit.

Aamma suliffeqarfimmi susoqarneranik takunnissinnaasariaqarputit – sulisorisat qanoq sunillu suliaqarnersut tunniussaqarnersullu, suliffeqarfiup naleqartitamigut nukittuunut ineriartornerani anguniakkanut takorluukkanullu naleqqussarsinnaaneq siunertaralugu.

Nammineq ineriartortuarnissamut suliassannullu naleqquttumik ilinniaqqinnissannut kiisalu nammineq ilisimasavit nutartertuarnissaannut piareersimasariaqarputit.

Marluinnik kalaallisut/danskisut oqaaseqarnissat kissaatiginarpoq, piumasaqaataananili. MS Office-mik atuinermik sungiussisimalluartuussaatit.

Meeqqanik innarliisimannginnermik uppernarsaateqassaatit taannalu attatissavat.

Ilinnut neqeroorutit
Mælkebøtten-imi pisortatut nunatsinni meeqqat inuusuttuaqqallu sumiginnagaasimasut pillugit annertuumik iluaqusiinissamut periarfissaqassaatit, taakkualu siunissaannut allanngueqataasinnaassallutit.

Nutaaliorfiusumi sulianullu tunngasuni ineriartorfiusumi peqataalernissannut periarfissaqarputit. Aamma suliffeqarfimmi periutsinut annertuumik sunniuteqalersinnaavutit. Atorfik suliffeqarfimmi pilersitsiviusumi sulianut inuttullu ineriartornissamut periarfissiisoq neqeroorutaavoq.

Tamakku saniatigut ulluinnarni pissanganartumik sulinikkut sulianut tunngasutigut namminerlu inuttut ineriartornissamut aamma pikkorissarnernut suliamullu tunngasutigut ilinniaqqinnikkut tamanna periarfissaqarluarluni.

Nutsernermi akiliunneqarnissaq aamma atorfimmut atasumik inissaqartitsineq neqeroorutaapput.

Mælkebøttecenteri
Mælkebøtten tassaavoq Mølkebøttecenterip ataani meeqqat ornittagaat isumaginninnikkut kulturikkullu nutaaliorfiusoq. Mølkebøtten-ip ilisarnaatigaa assigiinngitsunik susassaqarfiunini tamanit orniguffiusinnaasoq. Illumi inuussuttunut caféqarpoq, internetcaféqarpoq, nipilersortarfeqarpoq assassorfiusinnaasunillu sannaveqarluni. Orniguttarfik meeqqanut tamanut ammasuuvoq, meeqqat sumiginnagaasimanngitsut aamma orniguttarput. Ulloq unnuarlu angerlarsimaffik meeqqanit unnuiffiusinnaavoq, angerlarsimafimmut naliginnaasumut assigusumik periarfissaqarluni. Meeqqat iggavianni meeqqat inuusuttuaqqallu tamarmik akeqanngitsumik nerisinnaapput, iganermi peqataasinnaallutik. Mælkebøttecenteri imminut pigisuuvoq aningaasaateqarfittut nalunaarsugaq. Namminersortut pilersataraat, siulersuillu toqqagaapput ukunannga; Nuuk Rotary Club, Lions Club Nuuk, Sulisitsisut Kattuffiat (GE) aamma Kommuneqarfik Sermersooq. Meeqqat inuussuttuaqqallu 3-niit 17-inut ukiullit, sumiginnagaasimasut angerlarsimaffiullu avataanut inissinneqarsimasut atugaasa pitsaanerulersinnissaat aamma sumiginnaanermik pitsaaliuinissaq siunertaavoq.

Mælkebøttecenteri Mælkebøttenilu pillugit www.mb.gl aqqutigalugu paasissutissanik atuartoqarsinnaavoq.

 

Qinnuteqarneq
Qinnuteqarnissamut killigitinneqartoq: Piaarnerpaamik

Apeqqutissaqaruit Associate Partner Bo Prangsgaard tlf. +45 2211 8110 imaluunniit Siunnersortit pisortaat Morten Mønster tlf. +45 2224 8295 attavigineqarsinnaapput.