Skip to main content
106

Dette jobopslag er udløbet

Allu taartaasartussamik piumassuseqarluartumik sulisussarsiorpoq

Mælkebøttecenterip ataani najugaqarfik Allu, inuusuttuaqqanut sumiginnagaasimasunut arfineq pingasunut inissaqartitsisoq, taartaasartussamik piaarnerpaamik sulilersinnaasumik sulisussarsiorpoq.

Kikkuuvugut?
Mælkebøttecenteri imminut pigisuuvoq, tassaallunilu Meeqqat Inuusuttuaqqallu Illuat Mælkebøtten, najugaqarfiit Allu aamma Ilasiaq kiisalu allaffeqarfik. Suliatsinni siunertarineqarpoq meeqqat inuusuttuaqqallu sumiginnagaasimasut inuunerminni atugarissaarnerulernissaat. Suliffeqarfiup sulinerani siunertaavoq sumiginnaasarnerit pitsaaliornissaat.

Siunertat pingaarnerit ilagaat ileqquliussanik allannguisinnaanngortitsinissaq, imminut toquttarnermik pitsaaliuinissaq, kinguaassiuutitigut atornerluisarnerup pitsaaliornissaa aamma inuusuttuaqqat pinerlunniartarnerinik pitsaaliuinissaq. Najugaqarfimmi siunertaavoq toqqissisimanartunik aalajangersimasunillu avatangiiseqarluni angerlarsimaffeqarnissaq, taannalu angerlarsimaffiussasoq, inuusuttuaqqat inerikkiartornerat ilutigalugu, inuunermik imartuumik pilersitsinnaanermillu ineriartortitsiviusoq.

Najugaqarfimmi inuusuttuaqqat ulluinnarni inuunerinnerulernissaat ileqquliussanillu pitsaanngitsunik atugaqarlutik inuunermik qimatsinissaat anguniarneqassaaq. Inuunermik isumaqarluartumik misigitikkusuppavut. Qiimmassarusuppavut, nersualaarlugit kaammattorlugillu, ajornartorsiutinik aporfinnillu qaangiinerup ajugaasimaarnassusia misigeqqullugu.

Siunnerfiit
Najugaqalertussatut nalunaarneqarnerminni nukappiaqqat niviarsiaqqallu 12 – 15-inik ukioqartut siunnerfigaavut, najugaqarfimmilu najugaqarsinnaapput 18-nik ukioqalernissartik tikillugu. Aamma 23-liinissap tungaanut siunnersorneqarnissaq periarfissaavoq. Sulinermi oqaloqatigiinneq, inuttut ataqqeqatigiinneq ajornartorsiutinillu qaangiiniarneq qitiussapput – inuusuttuaqqallu ilinniartikkusuppavut persuttaaneq pinnagu oqaatsitik atussagaat, najugaqarfimmimi kikkut tamarmik inissaqartitaassapput. Inersimasoqassaaq, tatigineqarsinnaasunik, inersimasut qanilaartut anersaakkut timikkullu, piffissaqartuassappullu oqaluussinissamut, naalaarnissamut nuanisaaqatigiinnissamullu.

Inuusuttuaqqat imaqarluartumik inuuneqarnissaat aqqutissiuukkumavarput. Naleqartitanik pitsaasunik peqalersikkusuppavut naleqartitanut ajortunut, immaqa ilaatigut allani misigisarsimasaannut, illuatungiliuttunik. Imminnut nalilittut isigilernissaat imminullu tatiginerat ineriartortissallugit kissaatigaarput, tapersersuerpalaartumik ilaginerisigut nukissaqarnerannillu nassaarsiorfigalugit, akuersaarneqaatigisassaannik nukittorsarfigisassaannillu. Allanik peqateqarnerup nuannersuanik misigisaqartikkusuppavut.

Taartaasartussap suliassai
Taartaasartussap, pisortaq peqatigalugu, najugaqarfimmik ineriartortitsineq, anguniakkat naleqartitallu ineriartortitseqataaffigissavai. Tamatuma saniatigut taartaasartussap pisortaq suleqatigalugu najugaqarfiup ulluinnarni aqunneqarneranut peqataassaaq, taamaaliornikkut meeqqat inissinneqarsimasut toqqissisimanissaat paaqqutarineqarnissaallu qulakkeerniarlugu, sulisullu sulinerminni atugarisaat pitsaasooqqullugit. Tamatumunnga ilanngullugu kommuninut attaveqarneq ataqatigiissaarinerlu.

Taartaasartussap angerlarsimaffimmi pisortaq qaninnertut pisortarissavaa, taanalu sulisut atugaasa pitsaasuunissaannik qulakkeerinneqataassaaq, inuusuttuaqqallu angerlarsimaffimmi najugallit pitsaasunik sammisassaqartinneqarnissaat isumagissallugu.

Naatsorsuutigaarput
Suliassamut tunngasumik tunuliaqutaqassasutit, meeqqanillu inuusuttuaqqanillu sullissinermik misilittagaqartuusutit.

Allaffissornikkut suliassat ilisimaaralugillu piginnaaneqarfigigitit, kissaatiginarluni aqutsisutut misilittagaqassasutit.

Inerisimasuussasutit, sulisutsinnut tapersersuineq, oqalliseqateqarneq aporaannernillu suliaqarneq pissarsiffiulluaqqullugu.

Eqaatsumik pissuseqassasutit sapaatit akunnerisa naaneri allortarlugit sulinissamut, unnukkut unnuakkullu pingaartuusinnaassallutit.

Oqaatsit danskisut/kalaallisut atorsinnaassagitit, tamannali piumasaqaataanngilaq.

Inunnut inuunermullu pitsaasunik eqqarsariaaseqartutit.

Piumassuseqarluartutit iliuuseqarsinnaalluartutillu.

Neqeroorutigaavut
Pilersitsiviusumik suliamullu tunngasumik ineriartorfiusumik suliffeqarfik, erseqqarissumik aqunneqartoq

Suliffeqarfik namminersortoq sulinermut tunngasutigut inuttullu unammilligassaqarfiusoq

Inooqatiginnikkut akisussaaffimmik aallusseqataanermik allanngueqataanermillu

Suliamut tunngasunik oqaloqateqartarnissaq ilinniaqqinnissamullu periarfissaqarneq pisariaqartitsineq suliassallu naapertorlugit

Piginnaasat naapertorlugit akissaateqarneq – immikkut isumaqatigiisuteqarnikkut imaluunniit NKP-mik isumaqatigiissut naapertorlugu

Suliffissamut tunngasunik sukumiinerusunik paasiniaasoqarsinnaavoq pisortamut Pilu Noahsen-imut, mailikkut noahsen@mb.gl imaluunniit oqarasuaatikkut 36 21 15 imaluunniit angallattakkamut 52 68 69.

Qinnuteqaat info@mb.gl-mut nassiunneqassaaq, kingusinnerpaamik tallimanngornermi oktobernip 22-anni 2021-mi apuutereersimassalluni.