Skip to main content
134

Dette jobopslag er udløbet

Tasiilami Atuartunut angerlarsimaffik aqutsisussarsiorpoq

Tasiilami Atuartunut angerlarsimaffik aqutsisussarsiorpoq

 

Kommuneqarfik Sermersuumi Meeqqanut Atuarfeqarnermullu Ingerlatsivimmiit anguniagaavoq meeqqat nuannaartut, peqqissut, alapernaatsut tatituullu pilersissallugit. Tasiilami atuartunut angerlarsimaffiutitsinni aqutsisumik pissarsiorpugut anguniakkamik tassannga siuarsaaqataarusuttumik, inuusuttortatsinnik paarsilluarusuttumik ulluinnarnilu ingerlatsinermik isumaginnissinnaasumik aqutsisussarsiorpugut.

 

Atuartunut angerlarsimaffimmi atuartut/meeqqat 16-iupput ineqartunut 32-nut inissaqaraluarluni 9. - 10. klassini atuartut nunaqarfinnit Isertoq, Tiileqilaaq, Kuummiit aamma Sermiligaamit aggerfeqartut. Atuartunut angerlarsimaffimmi sulisut 13-iupput sulisarnerat ulluunerani unnuamilu agguataarsimallutik.

 

Aqutsisutut inuusuttut atuannginneranni ulluinnarnik toqqissisimanartunik isumassuinermillu imaqartunik pilersitseqataassaatit. Inuusuttut sinaakkutissanit sungiusimasaminnit ungasissorujussuarmiinnerat pissutigalugu, atuartunut angerlarsimaffiup atuartunut nalerisimallutik ilorrisimaarlutillu angerlarsimaffiunissaanut illit pilersitseqataasinnaanerit pingaaruteqarpoq. Taamaattumik inuusuttunik 13-16-inik ukiulinnik sullissinermik ilisimasaqarnerit iluaqutaassaaq, aamma taakkua pisariaqartitaasa aallaavigisinnaanerannut, kisianni aamma ulluinnarnik toqqissisimanartunik inuusuttullu inooqatigiinnermut tunngasunik sammisanik ingerlatsisinnaanerannut sinaakkutissanik toqqissisimanartunik pilersitsisinnaassaatit.

 

Saniatigut assortuussutaasinnaasunik imaluunniit aaqqiagiinngittoqartillugu atuartunik angajoqqaanillu oqaloqateqarnermik oqimaassinnasunik ingerlassinnaassaatit - aammali inuusuttut nalerisimanerat ineriartornerannullu tunngasunik, taakkua angajoqqaavinik atuarfimmillu oqaloqatiginnittuarnernik ingerlatsisassaatit.

 

Atuartunut angerlarsimaffimmut aqutsisutut ingerlatsinermut tamakkiisumut akisussaasuussaatit kiisalu atuartunut angerlarsimaffimmi sulisut suliassaannik suliaasalu agguataarsimanerannik ataqatigiissaarinermik akisussaallutit . Suliassat ilagaat ukioq atuarfiusoq aallartitsinnagu piareersaataasumik nunaqarfinnut tikeraarnerit. Taakkua saniatigut Kommunip Nuummi aamma Tasiilami atuartunut angerlarsimaffiutaasa akornanni siunersiueqatigiinnerit paarlaasseqatigiinnerillu ingerlanneqartarput.

 

Perorsaanermut piginnaasaqarnivit saniatigut iluaqutaassaaq ulluinnarni ingerlatsinermik passussisinnaanermut piginnaasaqarluarnissat - tassunga ilanngullugit eqqiaanermut pilersaarutinik suliaqarneq, inuusuttut, atuarfiup aamma angajoqqaat akornanni suleqatigiinnerup ataqatigiissarneri kiisalu sulisut allat soorlu unnuarsiortut ilinniagassanullu ikiuuttartut akornanni ataqatigiissaarinerit. Atuartunut angerlarsimaffimmut aamma aningaasaqarnermut missingersuutinut akisussaasuuvutit.

 

Ulloq 1. januar 2022, atuartunut angerlarsimaffinni najugaqarneq pillugu nalunaarusiamik nutaamik atuutsitsisoqalernera pissutigalu, aqutsisutut suliassat ilaat tassaavoq taassuma atuartunut angerlarsimaffinni atuutsinneqarnera aamma sulianut ilanngunneqarnera. Tamanna aamma Kommuneqarfik Sermersuup atuartunut angerlarsimaffinnut pilersaarusiaa pillugu atuuppoq.

 

Aqutsisutut sulininni atuarfeqarnermut immikkoortortaq qanimut suleqatigissavat, taanna pisariaqartitsinerit naapertorlugu ilinnut siunnersuisutut atuutissaaq. Aqutsisutut Atuarfeqarnermut immikkoortortami fagchefip ataani inissisimassaatit.

 

 

Ilinniarsimanermut piumasaqaatit:

  • Ilinniartitsisutut, perorsaatutut, perorsaanermut ikiortitut ilinniarsimaneq, ataatsimut isigalugu: perorsaanermut tunngassutilimmik ilinniarsimaneq;
  • Aqutsisutut ilinniarsimaneq.

 

Eqikkaalluni taava ilinnut iluaqutaassaaq tulliuttumi ukuninnga ataatsimik arlalinnilluunniit piginnaaneqaruit:

  • Inuusuttunik 13–16-inik ukiulinnik sullissisinnaaneq taakkununngalu ulluinnarnik toqqissisimanartunik atugassarititaasunillu allanngorartuunngitsunik pilersitsisinnaaneq.
  • Aaqqiagiinngissutaasinnaasunik aaqqiiniarsinnaaneq aaqqiissutissanillu iluaqutaasunik nassaarniarsinnaaneq.
  • Inuusuttut, angajoqqaat, atuarfiup aamma atuarfeqarnermut immikkoortortap suleqatigiinnerannik ataqatigiissaarineq.
  • Atuartunut ineriartortitsisunik katerisimaartitsisunillu sammisaqartitsisinnaaneq pilersaarusiorsinnaanerlu.
  • Atuartunut angerlarsimaffimmi sulisut aamma avataanit suliaqariartortartut soorlu sanasut eqqiaasullu akornanni aqutsineq suliassanillu agguataarineq.

 

Attaveqarfissaq:
Paasissutissat sukumiinerusut Meeqqanut Kulturimullu ingerlatsivimmi fagchefimut Riikki Grønvold saaffiginnissutigineqarsinnaapput.Oqarasuaat: (+299) 367303, E-mail: rigr@sermersooq.gl

 

Pineqaatissinneqarsimannginnermut aamma meeqqanik pinerliisimannginnermut uppernarsaatit:
Atorfik taanna meeqqanik pinerliisimannginnermut aammalu pineqaatissinneqarsimannginnermut uppernarsaammik peqartussaatitaaneq pillugu inatsit naapertorlugu piumasaqaatitaqarpoq. Inatsit naapertorlugu pinerluuteqarsimannginnermut uppernarsaat kommunimit tiguneqareerpat, aatsaat atorfinittoqarsinnaavoq. Taamaattumik malugeqqussavarput Kommunip uppernarsaatit naammaginartutut isigineqartut, meeqqanik pinerliisimannginnermut uppernarsaat rigspolitiinit, aammalu pineqaatissinneqarsimannginnermut uppernarsaat politiinit pippagit atorfininnissaq isumaqatigiissutigineqassammat.

 

Meeqqanik pinerliisimannginnermut uppernarsaat Kommunimit piniarneqassaaq pineqartumik akuersissuteqarnikkut, pineqaatissinneqarsimannginnermullu uppernarsaat nammineq illoqarfigisami politeeqarfimmut aaneqassaaq.

 

Akissaatinut atorfinitsitaanermullu tunngatillugu atugassarititaasut:
Atorfinitsitaanermi pineqartup kattuffiata isumaqatiginninniarsinnaatitaasup akornanni isumaqatigiissutit atorfininnerup nalaani atuuttut malinneqassapput.

Atorfimmut atatillugu inissamik innersuussisoqarsinnaavoq.

Meeqqanik pinerliisimannginnermik aamma pinerlussimannginnermik allagartaq naammaginarsimassappat aatsaat atorfinittoqarsinnaavoq.

Atorfinitsitsineq qaammatini pingasuni misiligutitaqassaaq.

Atorfinitsitsineq isumqatatigiissuteqarnikkut pissaaq.

 

Qinnuteqaat:
Qinnuteqaat Suliffik nr. 711/22, nalunaaqqutserlugu aamma ilinniagaqarsimanermut siornatigullu suliffigisimasanit uppernarsaaserlugu, ulloq tunniussivissaq kingulleq nallertinnagu nassiunneqarsimassaaq.

 

Ima qinnuteqassaatit:
Qinnuteqaatit elektroniskimik nassiunneqassaaq, quppernermi matumani allerpaami innersuussaq toorukku qinnuteqaatit CV-llu kakkiullugit nassiussinnaavatit.

 

Malugiuk:
Qinnuteqaatit pappilissatigut mailikkulluunniit tiguneq ajorpagut, inussiarnersumik qinnuteqaatit nittartagaq aqqutigalugu nassiuguk.

Qinnuteqarnissamut killissarititaasoq: oktobarip 17.-at, 2022

Atorfik una qinnuteqarfigiuk