Qanimut attaveqatigiinnerit pingaartinneqarlutik, meeqqallu ataasiakkaat ataatsimullu ineriartornerat atugarissaarnerallu ukkatarineqarfianni meeqqerivimmik ineriartortitsinermik aqutsinermillu peqataarusuppit? Taava suliffissaqartippatsigit.

 

Akuleriinnut meeqqerivimmut nutaamut Aqutsisumik tunniusimasumik pikkorissumillu, 01.03.2023 imaluunniit tamatuma kingorna piaarnerpaamik sulilersinnaasumik Kommuneqarfik Sermersooq pissarsiorpoq. Meeqqerivik nutaaq sanaartorneqaleruttorpoq 1. aggusti 2023-milu atuutilersinneqarnissaa naatsorsuutigineqarluni. Taamaalillutit aqutsisutut meeqqerivimmi naleqartitanut sunniuteqarsinnaavutit. Meeqqat alapernaatsut, tatitussusillit, peqqissut nuannaartullu pilersinnissaa Meeqqanut Atuarfeqarnermullu Ingerlatsiviup anguniagaraa. Anguniakkat anguneqarnissaannut illit aqutsisutut ukkataqarnissat naatsorsuutigineqarpoq.

 

 

Atorfiup imarisaa:

Inunnut pitsaasumik attaveqarneq aqqutigalugu meeqqat ulluinnarni ataqatigiissunik toqqissisimanartunillu misigisaqarnissaat uagutsinnut pingaaruteqarpoq. Naatsorsuutigaarput illit paaqqinnittarfiup anguniagaanut sinaakkutissanik pilersitseqataassasutit taakkununngalu tapersersuissasutit.

 

Atorfeqarninni qaammatini siullerni Meeqqanut Atuarfeqarnermullu Ingerlatsivimmi allaffeqassaatit. Tassani Ingerlatsivik suleqatigalugu meeqqeriviup nutaap aaqqissuunnera, pisattanik pinngussanillu pisiortorneq suliarissavatit. Qaammatit siulliit sulisussat sinnerinik atorfinitsitsinermut, aallartisarnissamut pilersaarusiornermut kiisalu sulisut suleqatigalugit meeqqerivimmi sulisunut politikkimik, suliffeqarfimmut pilersaarummik aammalu perorsaanikkut ukiumut pilersaarummik, meeqqeriviup ammarnissaanut piareersimasussanik suliaqarnermik ingerlatsisoqassaaq.

 

 

Aamma suliarissavatit:

• Ulluinnarni aqutsineq
• Ingerlatsiviup ataatsimut anguniagai meeqqerivimmi sulissutigineqarnissaannut qulakkeerineq
• Meeqqeriviup missingersuutaanut akisussaasuuneq
• Meeqqamut pitsaanerpaaq anguniarlugu angajoqqaanik suleqateqarneq
• Suliassat takkussuuttut

 

Suliassat meeqqerivimmi sulisut allat kiisalu Ingerlatsiviup meeqqerivinnut immikkoortortaa suleqatigalugu naammassineqassapput.

 

 

Ilinnut naatsorsuutigaarput:

• Perorsaasutut ilinniarsimasuunissat
• Meeqqerivinnut tunngasunik suliassaqarfimmi aqutsisutut misilittagaqarnissat
• Ataatsimut anguniagassagut akisussaaffigisinnaagitit peqataaffigisinnaallugillu
• Meeqqanut ineriartuutaasunik sammisaqartitsinerit pilersaarusiorluarsinnaagitit
• Siammasissumik suleqateqallaqqissuusutit
• Missingersuutinut naatsorsuutinullu tamanik takunnissinnaasutit
• PC-mik ulluinnarni atuinermik sungiusimasaqartutit
• Ajornanngippat kalaallisut/danskisut oqalussinnaasutit

 

Pingaartipparputtaaq alajaatsuunissat, pitsaassutsimik ilisimasaqarluartutit immikkuualuttunillu maluginiaasinnaasutit kiisalu allarpassuarnik suliaqaraluarlutit pisunut assigiinngitsunut malinnaalluarsinnaasutit.

 

Neqeroorutigisinnaavarput suliffik unamminartoq, suliat imarisaannut sunniuteqarnissamut periarfissaqartitsisoq, suliffeqarfimmi ineriartortumi allanngoriartortumilu nammineerluinnarluni annertuumik akisussaaffeqartitaaneq. Pingaartilluinnarparput patajaatsumik suliassanut suliffimmullu pulatikkiartuaarneqarnissaq, pimoorulluinnarparputtaaq suleqatigiinnermi silaannaap pitsaasup aqutsisut peqatigilluinnarlugit attattuarnissaa kiisalu pilersitsisinnaaneq nutaaliorsinnaanerlu inissaqartittuarpagut.

 

Paaqqinniffik pillugu:

Akuleriinnut meeqqerivik nikisiteruminartoq illoqarfiup qeqqani inissisimassaaq meeqqanullu 0-6 ukiulinnut naleqquttunik arfinilinnik initaqassalluni. Sulisut 21-nik amerlassusiligaapput imalu agguataaqqallutik: aqutsisoq, tullersorti, perorsaasut arfinillit, isumaginninnermi ikiortit arfinillit, inimi ikiortit arfinillit, igaffimmioq ½ eqqiaasorlu ½.

 

Taamatut atorfeqarnermi ulloq naallugu suliffiusarpoq atorfillu nutaajulluni, aamma Meeqqanut Atuarfeqarnermullu Ingerlatsivimmi ulluunerani neqeroorutit pillugit immikkoortortaq qaninnertut qullersarineqassaaq.

 

Akuleriinnut meeqqerivik nikisiteruminartoq piffissami nal. 07:00 - 17:00 ammasassaaq.

 

 

Annertunerusumik paasisaqarusukkuit:

Annertunerusumik paasisaqarusukkuit pisortaq Ane Marie Lynge Møller attavigisinnaavat uunga oqarasuaat +299 36 73 25 imaluunniit e-mail-imut uunga: anm@sermersooq.gl 

 

 

Pineqaatissinneqarsimannginnermut aamma meeqqanut pinerliisimannginnermut uppernarsaat:

Atorfik taanna meeqqanik pinerliisimannginnermut aamma pineqaatissinneqarsimannginnermut uppernarsaammik piumasaqaateqartussaatitaaneq pillugu inatsit naapertorlugu uppernarsaatinik piumasaqaateqarfiuvoq. Inatsit naapertorlugu Kommuni uppernarsaatinik naammaginatutut isigineqartunik pereerpat atorfinninneq aallartinneqarsinnaavoq. Taamaattumik malugeqqussavarput Kommunip uppernarsaatit nammaginartutut isigineqartut, meeqqanik pinerliisimannginnermik uppernarsaat rigspolitiinit, aammalu pineqaatissinneqarsimannginnermut uppernarsaat Politiinit pippagit atorfininnissaq inissinneqassammat.

Meeqqanik pinerliisimannginnermut uppernarsaat Kommunimit aaneqassaaq pineqartumik akuersissuteqarnikkut, pineqaatissinneqarsimannginnermullu uppernarsaat nammineq illoqarfigisami Politeeqarfimmut aaneqassaaq.

 

 

Akissaatinut atorfinitsitaanermullu tunngatillugu atugassarititaasut:

Akissarsiaqarnermut atorfinitsitaanermullu atugassarititaasut Naalakkersuisut aamma Nunatsinni Perorsaasut Kattuffiata (NPK-p) akornanni isumaqatigiissut atuuttoq imaluunniit Kalaallit Nunaanni kattuffiup allap isumaqatiginninniarsinnaatitaasup isumaqatigiissutaa atuuttoq naapertorlugu atorfinitsitsisoqassaaq.

 

Atorfinitsitsineq qaammatini pingasuni misiliinertaqarpoq.

 

 

Inissaq:

Atorfininnermut atatillugu inissiamik innersuussisoqarsinnaanngilaq

 

 

Qinnuteqaat:

Qinnuteqaat qulequtserlugu Atorfiup ilisarnaataa 39-23-mik, ilinniagaqarsimanermut uppernarsaat siornatigullu sulisimanermut uppernarsaatit qinnuteqaammut ilanngullugit, qinnuteqaateqarnissamut piffissarititaasup qaangiutinnginnerani qinnuteqartoqassaaq.

 

 

Imatut qinnuteqaateqassaatit:
Atorfik qinnuteqarfigerusutat takugukku, uagutsinnut qinnuteqaammik nassiutissavat nittartagarput aqqutigalugu. Atorfimmut qinnuteqarfiginiakkannut link-i, atorfimmi inuttassarsiorneqartumi takusinnaavat.

 

 

MALUGIUK: 

Qinnuteqaatit pappilissatigut mailikkulluunniit tiguneq ajorpagut, inussiarnersumik qinnuigissavatsigit qinnuteqaatit nittartagaq aqqutigalugu nassiutissagit.

 

Qinnuteqarnissamut killissarititaasoq: februaarip 3.-at, 2023

Atorfik una qinnuteqarfigiuk