Skip to main content
132

Dette jobopslag er udløbet

Najugaqatigiiffik Nuussuaq 65 sulisussamik pissarsiorpoq

Innarluutilinnut tarnikkut nappaatilinnullu Immikkoortortaqarfik Nuummi Nuussuaq 65-imi isumassuerusussusilimmik inussiarnersumillu sulisussarsiorpoq. Taamatut sulinissaq uummateqarfigiviuk, aamma najugaqartut pillugit allanngueqataarusuppit, taava illerpiaq suleqatissatsitut amigaatigaatsigit.

 

Atorfik ullormut suliffiusussaq naallugu sap.ak. 40-nik suliffiuvoq - piffissat pigaartuunermi nikerartuunissaat naatsorsuutigineqassaaq Najugaqatigiiffimmi sulisoq alla suleqatigisassavat, taanna sapaatip-akunneranut 20 tiimini sulisarpoq.

 

Najugaqatigiiffik Nuussuaq 65-imi najugaqartut pingasuupput taakkulu eqqarsartaatsikkut sanngiillisimasuupput aammalu ineriartornermikkut akornuteqartuullutik. Najugaqartut namminneq ineeraqarput taavalu igaffik, ini, uffarfik perusuersartarfillu ataatsimoorullugit. Illit pingaarnertut suliassarissavat najugaqartut eqqarsartaatsimikkut, inooqataanikkut aamma nalinginnaasunik piginnaasassanik inerisaaviginissaat, taamaalillutik sapinngisamik imminnut ikiorsinnaalersillugit. Suleqatitit peqatigalugit najugaqartut kissaataat malillugit pitsaasumik imaqarluartumillu inuuneqarnissaannut tapersersussavatit.

 

Suliassatit:

  • Najugaqartut nammineernerulernissaat inuunerisalu pitsaanerulernissaat ineriartortillugit ilaatigut najugaqartunut iliuusissatut pilersaarusiat najoqqutaralugit sulineq.
  • Najugaqartut ulluinnarni sammisassanut kajumissaarlugillu tapersersortassavatit assersuutigalugu pisuttuarnermi, pisiniarnermi, nerisassiornermi nakorsiarnermilu.
  • Suleqatit, aqutsisoq najugaqartullu suleqatigalugit najugaqatigiiffimmi ataatsimoornerulersitsineq.

 

Suliassat najugaqatigiiffimmi sulisut allat qanimut kiisalu illup iluani avataanilu suleqatigisat suleqatigalugit suliarineqassapput, matumani sulianik suliarinnittartut, Dronning Ingridip Napparsimmavissua aamma Pinerluttunik Isumaginnittoqarfik ilanngullugit.

 

Ilinnit naatsorsuutigineqartut:

  • Inunnik sullissinermi misilittagaqarputit, suliassaqarfiup iluani misilittagaqaruit pitsaasuussaaq
  • Isumassuisoq, inussiarnersoq pitsaasumillu suliffiup avatangiiseqarnissaanik takunnissinnaasoq
  • Ilinnut ineriartortikkusupputit immikkoortortaqarfitsinnillu ineriartortitserusullutit, taamaalillutit najugaqartumut allannguineq pingaaruteqarluinnartoq pilersillugu

 

Uagut pilluta:

Atorfimmi tassani ataatsimooqatigiinnermi annertuumi peqataalissaatit: Immikkoortoqarfiuvugut arfineq-pingasunik najugaqatigiiffeqartut, najugaqatigiiffiit allat tallimat, sammisassaqartitsinermut ataatsimooqateqartitsinissamullu neqeroorutinik marlunnik kiisalu tapersersorteqarfinnut pingasunut Nuummi, Tasiilami Paamiunilu agguataarsimasut.

 

Immikkoortoqarfimmi annertuumik ineriartorfiusussanngortumi pissanganartumilu atorfimmik neqeroorfigaatsigit. Ineriartortitsinermi ilaatigut pineqarlutik sulilerlaatut iluamik ilitsersuunneqarnissat, ingerlaavartumik siunersioqatigiittarnissamik kiisalu suliatigut ataatsimooqatigiiffeqarnissamik imaqarput.

 

Suli paasisaqarusukkuit tikilluaqqusaajuassaatit aqutsisoq Debora Mørch attaveqarfiginissaanut oq.: 531768 imaluunniit e-mail: debm@sermersooq.gl

 

Atorfinitsitsinissamut oqaloqatiginninnerit sapaatip akunnerani 43-mi ingerlannissaat naatsorsuutigaarput.

 

Pineqaatissinneqarsimannginnermut uppernarsaat:
Atorfik una pineqaatissinneqarsimannginnermut uppernarsaammik pissarsinissamut inatsit naapertorlugu pisussaatitaaffeqarpoq. Inatsit naapertorlugu kommune pineqaatissinneqarsimannginnermut uppernarsaammik pissarsippat atorfinitsitsineq aatsaat pisinnaavoq. Taamaammat maluginiaqqussavarput atorfininnissamut isumaqatigiissusiortoqarsinnaammat kommune pineqaatissinneqarsimannginnermut uppernarsaammik Politiinit aatsaat pissarsereerpat.

 

Akissaatinut atorfinitsitaanermullu tunngatillugu atugassarititaasut:

Akissarsiaqarnermut atorfinitsitaanermullu atugassarititaasut Naalakkersuisut aamma Sulinermik Inuussutissarsiuteqartut Kattuffiata (SIK-p) akornanni isumaqatigiissut atuuttoq imaluunniit Kalaallit Nunaanni kattuffiup allap isumaqatiginninniarsinnaatitaasup isumaqatigiissutaa atuuttoq naapertorlugu atorfinitsitsisoqassaaq.

 

Atorfinititsineq qaammatini pingasuni misiliutitaqassaaq.

 

Inissaq:

Atorfininnermut atatillugu inissiamik innersuussisoqarsinnaanngilaq.

 

Qinnuteqaat:

Qinnuteqaat qulequtserlugu Atorfiup ilisarnaataa 722/22-mik, ilinniagaqarsimanermut uppernarsaat siornatigullu sulisimanermut uppernarsaatit qinnuteqaammut ilanngullugit, qinnuteqaateqarnissamut piffissarititaasup qaangiutinnginnerani qinnuteqartoqassaaq.

 

Imatut qinnuteqaateqassaatit:

Atorfik qinnuteqarfigerusutat takugukku, uagutsinnut qinnuteqaammik nassiutissavat nittartagarput aqqutigalugu. Atorfimmut qinnuteqarfiginiakkannut link-i, atorfimmi inuttassarsiorneqartumi takusinnaavat.

 

MALIGIUK: 
Qinnuteqaatit pappilissatigut mailikkulluunniit tiguneq ajorpagut, inussiarnersumik qinnuteqaatit nittartagaq aqqutigalugu nassiuguk.

Qinnuteqarnissamut killissarititaasoq: oktobarip 20.-at, 2022

Atorfik una qinnuteqarfigiuk