Skip to main content
89

Dette jobopslag er udløbet

Meeqqanik Ilaqutariinnullu Ingerlatsivimmi isumaginninnermut siunnersunik pissarsiorpoq angerlarsimaffiup avataanut iniassinneqarsimasunut pillugit suleqatigiinni isumaginnittussamik / Atorfiup normua: 455/19

Atorfik
Meeqqat inuusuttullu angerlarsimaffiup avataanut inissinneqarsimasut pillugit suliaqarfimmi oqartussaaffeqarfimmi sullissisutut atofik ulloq naallugu atorfiuvoq.

Suliffiusumi piffissaritinneqarpoq ataasinngornermiit tallimanngornermut (sapaatip akunneranut nalunaaquttap akunnerinik 40-t).

Sulininni pingaarnertut suliassatit makkuussapput:

  • Sulianik meeqqanut tunngasunik suliaqarneq, ilaatigut paasissutissanik attuumassuteqartunik tamanik nalunaarsuineq.
  • Siunertaq pisariaqartitsinerlu apeqqutaatillugit oqartussaassusilinnut attuumassuteqartunut paasissutissanik noqqaassuteqarneq.
  • Ilaqutariinnut ikiorsiissutit tulluartuujuarnissaat pillugu iliuusissatut pilersaarummik suliaqarneq, nutarterineq nalilersuinerlu.
  • Siunertaq pisariaqartitsinerlu apeqqutaatillugit oqartussaassusilinnut attuumassuteqartunut inassuteqaasiorneq innersuussisarnerlu. 
  • Innuttaasunik, meeqqanik suleqatigisartakkanillu oqaloqatiginnittarneq.
  • Tulleriissaarinermik, peqatigiittarnissamik isumaqatigiissusiornernik, attaveqaqatigiittartunik ataatsimeeqatigiinnernik, ilaqutariinnik isumasioqatigiisitsinernik, inissiinernik, inissiinernik allannguinerit, angerlartitsinermik il.il. ataqatigiissaarineq.
  • Inissiinissamik nalilersuineq. Inissiisoqassatillugu suliaq qajassuartumik pilersaarusiorlugu aamma angajoqqaat inissiivissarlu qanimut suleqatigalugit ingerlanneqassaaq.
  • Qinnuteqaatinik assigiinngitsunik suliaqarneq, tassunga ilaallutik aningaasartuuteqarnerunermut, tikeraarluni angalanermut suliniutinut, efterskoleriarnermut, højskoleriarnermut, inissiinerup allamut nuunneqarneranut, angerlartitsinermut, suliniuteqareernerup kingorna malinnaaviginninnermut il.il. tunngasut.
  • Meeqqanik inuusuttunillu inissinneqarsimasunik ukiumoortumik nakkutilliiartortarneq.
  • Ikiorneqarnissamik pisariaqartitsisoqartillugu psykiatrimut, Isumaginninnermut Ingerlatsivimmut, oqartussanulluunniit allanut allagaqaasiorneq.

Sullissisutut nammineq akisussaaffigissavatit suliat 30-50-missaaniittut, sulisoqassuseq apeqqutaatillugu. Ilaatigut akisussaaffigivat, illup iluani suleqatigisartakkavut (Kuserneq, Ivaaq, Ungecenter, Børnehjemmet Tupaarnaq aamma angajoqqaarsianut siunnersortit) aamma illup avataaneersut (Politiit, peqqissaavik, atuarfik, meeqqeriviit, ulloq unnuarlu paaqqinniffiit, angajoqqaarsiat, ilaqutariinnik isumasioqatigiisitsinermi siunnersortit il.il.) suleqatigilluarnissaat. Tamatuma sanitigut suliassaqarfimmut tunngasuni inatsisit malinneqarnissaat akisussaaffigivat.

Suleqatigiit qaammatikkaartumik ataasiartumik ataatsimoorluni supervisionertarneq ingerlanneqartarpoq, saniatigut pisariaqartitsineq naapertorlugu kisimiilluni ingerlannissaa periarfissaavoq. Aammattaaq teamlederi immikkoortortaqarfimmilu aqutsisoq suliamut atatillugu isumasioqatigiinnermi qanimut suleqatigissavatit.

Ulluinnarni sulinermut pisariaqartinneqartillugu pikkorissarnissaq ilinniaqqinnissarlu periarfissaapput.

Atorfinittikkusutaq
Naatsorsuutigaarput, illit isumaginninnermi siunnersortitut imaluunniit isumaginninnermik suliaqarnermut tunngasumik ilinniagaqarsimanissat, sulianillu meeqqanut tunngasunik siammasissumik ilisimasaqartutit, ilaatigut oqaloqatiginninnerit, ataatsimiinnerit allakkanilluunniit tigusaqarnerup kingorna paasissutissanik pisariaqartunik nalunaarsuinermik.

Naatsorsuutigaarput, oqaloqatiginnittarnerit assigiinngitsut sungiusimallugit ingerlassinnaagitit, tutsuiginartuullutit tunuarsimaartuunngitsutit, ajornanngippallu innuttaasunik, meeqqanik suleqatigisartakkanillu oqaloqatiginneriaatsit assigiinngitsut ilisimasaqarfigigitit.

Suliamik angusaqarluartuunissat aammalu pimoorussisuunissat pingaaruteqarpoq.  Namminersorlutit sulisinnaanissat, suleqatigiinni suleqatigiinnissamik pingaarutitsiffiusumi akuusinnaanissat. Ullormut nalaattakkat siumut oqaatigiuminaassinnaasarmat allanngueriaannaassuseqassaatit, attavigiumartoq tatitoorlu. Ingerlatsivimmi ineriartortitseqataassaatit, naatsorsuutigaarpullu aaqqiissutissarsiorluarsinnaassuseqarlutillu ajunnginneq angorusullugu uparuaasinnaassuseqartutit.

Sulinermut atatillugu suliassat 80 %-ip missaanik allaffissornermik suliaqarfiusarmat, qarasaasiamik atuinermik ilisimasaqassaatit, allattariarsornermilu oqaaseqatigiiliorluarsinnaassuseqassallutit.

Nakkutilliinermut atatillugu angalasarsinnaaneq naatsorsuutigineqarsinnaavoq, tassuuna aamma peqataasinnaasariaqassaatit.

Meeqqanut Ilaqutariinnullu Ingerlatsivik
Meeqqanut Ilaqutariinnullu Ingerlatsivimmi oqartussaassuseqarnermut tunngasut isumagineqartarput, immikkoortunullu marlunnut avinneqarsimalluni. Immikkoortup aappa Tulleriissaarisartoqatigiinnik taaneqarpoq, taannalu suleqatigiinnut pingasunut avinneqarsimalluni. (misissuineq, nalunaarutiginninnermut tunngasunik sillimasut aamma innarluutilinnut tunngasut). Misissuisartut isumaginninnermut tunngsunik misissuineq ingerlattarpaat, iliuusissaagallartunillu pilersaarusiortarlutik. Nalunaarutiginninnermut tunngasunik sillimasuusut kommune tamakkerlugu nalunaarutiginninnernik tigooraasarput, suliarisarlugillu. Taakku saniatigut suliat aallartinneqarneraniik tigummisarpaat, ikiorsiissutinik aallartitsisarlutik, aammali isumaginninnermut tunngasunik misissuinertaa ingerlanneqartarluni. Innarluutilinnut tunngasunik suliallit meeqqanik inuusuttunillu innarluutillit pillugit peqqussut naapertorlugu sullinneqartussanik suliaqartarput.

Immikkoortortap aappaa Ilaqutariinnut immikkoortortaqarfimmik taaneqartarpoq, suleqatigiinnullu marlunnut avinneqarsimalluni (ilaqutariinnik sullissisoqatigiit aamma inissinneqarsimasunik suliallit). Ilaqutariinnut tunngasunik suliallit pitsaaliuinermik suliaqartarput aamma suliat inissiinermut tunngasuunngitsut aallaqqaataaniik tigummisarlugit. Inissiinermut tunngasunik suliallit meeqqat inuusuttullu angajoqqaarsiani imaluunniit ulloq unnuarlu paaqqinniffinni inissinneqarsimasunut tunngasunik suliaqartarput.

Meeqqanik pinerliisimannginnermut aammalu pineqaatissinneqarsimannginnermut uppernarsaat:
Atorfik taanna meeqqanik pinerliisimannginnermut aamma pineqaatissinneqarsimannginnermut uppernarsaammik piumasaqaateqartussaatitaaneq pillugu inatsit naapertorlugu uppernarsaatinik piumasaqaateqarfiuvoq. Inatsit naapertorlugu kommune uppernarsaatinik naammaginartutut isigineqartunik pereerpat atorfininneq aallartinneqarsinnaavoq. Taamaattumik malugeqqussavarput kommunep uppernarsaatit naammaginartutut isigineqartut, meeqqanik pinerliisimannginnermut uppernarsaat rigspolitinit, aammalu pineqaatissinneqarsimannginnermut uppernarsaat politinit pippagit atorfininnissaq inissinneqassammat.
Meeqqanik pinerliisimannginnermut uppernarsaat kommunemit aaneqassaaq pineqartumit akuersissuteqarnikkut, pineqaatissinneqarsimannginnermullu uppernarsaat nammineq illoqarfigisami politiqarfimmut aaneqassaaq.

Akissaatinut atorfinitsitaanermullu tunngatillugit atugassarititaasut:
Akissarsiaqarnermut atorfinitsitaanermullu atugassarititaasut Namminersorlutik Oqartussat, AK-llu isumaqatigiissutaat atuuttoq, imaluunniit Kalaallit Nunaannilu kattuffiup allap isumaqatiginninniarsinnaatitaasup isumaqatigiissutaat atuuttut malillugit atorfinititsisoqassaaq.

Atorfinititsineq qaammatini pingasuni misiliutitaqassaaq.

Atorfimmut atatillugu inissamik innersuussisoqarsinnaavoq, tassungalu qularnaveeqqut, ineqarnermut akiliutit, atuineq il.il. akilerneqartassapput, Kalaallit Nunaanni Namminersorlutik Oqartussat Kommunit il.il. inissiaataanni najugalinnik ineqarnermut akiliuteqartitsisarneq pillugu malittarisassat sukkulluunniit atuuttut naapertorlugit. Atorfimmut atatillugu inissiamik ataavartumik atorfinitsitaanerup kinguninnguagut attartorneqartussamik attartortitsisoqarsinnaanngippat, sulisut utaqqiisaasumik ineqarsinnaatitaasut, utaqqiisaasumik inissaannik neqeroorfigineqassapput, tassungalu ineqarnermut, atuinermut il.il. qulaani taaneqartoq innersuussutigalugu akiliuteqartoqassaaq. Ineqarnermut akiliutit pillugit annertunerusumik paasisaqarniaraanni, atuineq il.il. ilanngullugit uunga innersuussisoqarpoq: www.iserit.gl

 

Atorfiniffissaq ullulerneqassaaq suliffimmut atasumik inissaqartitsisoqarnera apeqqutaatillugu. Inatsisit atuuttut naapertorlugit atorfininnermut atatillugu angalaneq pisattanillu nassiussineq akilerneqassapput.

Qinnuteqaat:
Qinnuteqaatip ilisarnaataata Job nr. 455/19, aamma ilinniagaqarsimaneq siornatigullu sulisimanermik pillugit paasissutissartalik, soraarummersimanermut uppernarsaatitalik qinnuteqaateqarnissamut piffissarititaasup qaangiutinnginnerani sulisoqarnermut immikkoortortaqarfimit tiguneqareersimassaaq.

 

Imatut qinnuteqaateqassaatit: 
Atorfik qinnuteqarfigerusutat takugukku, uagutsinnut qinnuteqaammik nassitsissuutit nittartagarput aqqutigalugu.
Atorfimmut qinnuteqarfiginiakkannut link-i, atorfimmi inuttassarsiorneqartumi takusinnaavat.

 

 

Qinuteqaat tunniunneqassaaq kingusinnerpaamik: 06. august 2019
Atorfininneq: Isumaqatigiinnikkut
Akunnerit suliffiit: Ulloq naallugu
Suliffik: Nuuk
Paasissutissat allat uani piniarneqarsinnaapput: Paninnguaq Kleemann
Telefon: +299 367287
Nittartagaq: http://www.sermersooq.gl
Qinnuteqaat nassiutiguk