Royal Greenlandimi aalisakkat tisaneqartartut ajornerpaapput

Misiliilluni uuttortaanerup takutippaa aalisakkat tisaat Royal Greenlandimeersut siatsinissamut qalliutaat aalisagartaanit annertunerusoq

Jyllands-Posten taamak misiliinermik ingerlatsisuusimasoq allappoq .

Puuaanni allassimasoq malillugu imarisaata 69 procentia aalisagaavoq, kisianni misiliilluni oqimaalutaanerup takutippaa kisitsit taanna 47 procentimut appariarsimasoq. Tassa imaappoq tunisassiap oqimaassusiata affaa inorlugu aalisagaavoq, sinneri tassaallutik raspit, qajuusat aamma orsoq.

Roayl Greenlandip aalisagaataa tisaaq tunisassiat pingasut misiliiffigineqarneranni ajornerpaatut inissippoq. Aalisakkanik tunisassiani pingasuni tamani ilisarnaataavoq puuanni allassimasunit aalisagartaat annikinnerummata, pingasunit marlunni siatsinissamut qalliutaat aalisakkamit annertunerulluni.

Royal Greenlandip assigiinngissummut nassuiaatigaa, aalisakkat suli qeritillugit oqimaalutarneqartarnerat tamannalu tunngavigalugu allagartaat allanneqartartut, kiisalu misiliinermi aalisakkat aasseriarlugit oqimaalutarneqarsimanerat. Taamaaliornikkullu imeq aalisakkamiittoq siatsinissamut qalliutaasumut kuuttarluni.

Powered by Labrador CMS