Inunnut innarluutilinnut Tarnimikkullu Nappaatilinnut immikkoortortami Angerlarsimaffik Pakkutaq peqqinnissamut ilinniagalimmik pisortassarsiuupparput.

 

Pakkutaq innuttaasunut, timimikkut tarnimikkullu annertuumik piginnaasakitsunut angerlarsimaffiuvoq.   Taamaattumik timimikkut, tarnimikkut inooqataanikkullu piginnaasaminnik attassiinnassagunik ineriartortitsissagunillu annertuumik aamma immikkut paaqqutarineqarnissamik, tapersersorneqarnissamik isumassorneqarnissamillu pisariaqartitsisuupput.

 

Pakkutami pisortamut tullersorteqarpoq aamma 20-nik sulisoqarluni. Perorsaasutut, peqqinnissamut assistentitut, peqqinnissami ikiortitut aamma suleqatit ilinniagaqarsimanngitsutut sulisorisat toqqarlugit aqutsisuuffigissavatit.

 

Atorfimmi pisortap tullersortaa aamma suleqatitit peqatigalugit ingerlatsineq qulakkiissavat, kiisalu angerlarsimaffik najugaqartullu ineriartortissallugit. Pisortap tullersortaa peqatigalugu qanilaartumik aqutsisuussaatit, pisariaqartinneqarfiani siuttuunissamut qunusuillutit. Angerlarsimaffiit akornanni pisortaqatigiit ataatsimoorfiannut patajaatsumut aamma peqataassaatit, tassani pisortaqatitit aamma ingerlatsisoq peqatigalugit suliassaqarfiup ineriartortinneqarnera siunnerfilissavarsi.

 

Suliatigut piginnaasat, assigiinngissuseq, ataatsimoornerlu suleriaatsimik siunissami kivitsinissap iluatsinnissaanut pingaaruteqarsoraagut. Taamaattumik suliniutinik nutaanik, suliatigut qaninnerulersitsisussanik aallartisaalluta aallartilluareerpugut. Pikkorissunik aqutsisoqassagaanni aqutsisuuneq oqaluuserineqarsinnaasariaqartoq upperaarput!

 

Naatsorsuutigaarput:

• Aqutsisutut misilittagartuujusutit, inuit imminnut atorluarsinnaanerinik eqqumaffiginnittoq
• Kalaallit inuiaqatigiit kulturilu pillugit ilisimasaqarluartutit, iluaqutaassaarlu marluinnik oqaaseqaruit.
• Attaveqaqateqarnermut piginnaaneqarluartutit, immikkoortumilu suliffeqarfiup iluani avataanilu suleqatigiinnerup patajaallisarnissaanut tamassuma pingaaruteqassusaa takusinnaagit.
• Oqaloqatiginniffiusumik sulisunillu peqataatitsillutit aqutseriaaseqartutit.
• Suliatigut patajaatsumik toqqammaveqartutit, peqatigalutalu ineriartortinnissaanut soqutiginnittutit.
• Peqqissaanermut tunngasumik ilinniagaqarsimassasutit aamma/imaluunniit attuumassutilimmik ingerlaqqiffiusumik ilinniagaqarsimasuusutit.

 

Inuttut

• tunngaviusumik allaanerussuteqarneq ataatsimoornerlu nukittut isigissagitit
• paasisaqarusussuseqarnissat, alapernaatsuunissat allallu isiginnittaasiinut akuerinnittuunissat
• tatitusutit oqaloqatiginnikkumasuullutillu arlalinnik suliaqarlutit nuannarissagit

 

Alapernaannerulersimaguit

Kommunip nittartagaani suliat allaaserineqarnerini suliatsinnut malittarisassat pillugit atuarsinnaavutit, aammattaaq allanik apeqqutissaqaruit attaveqarfiginissatsinnut tikilluaqqusaavutit.

 

Annertunerusumik paasisaqarusukkuit:

Annertunerusumik paasisaqarusukkuit pisortaq Mathias K. Brusgaard attavigisinnaavat uunga oqarasuaat +299 562761 imaluunniit e-mail-imut uunga: mtbr@sermersooq.gl imaluunniit Ulrik Neess uunga oqarasuaat +299 580129 imalunniit ulne@sermersooq.gl

 

Matumani ilaatigut nakkutilliisoqarfimmit periusiliat atorlugit suliassariligassagut pillugit oqaluttuussinnaavatsigit kiisalu iliuusissanut pilersaarutinut nutaanut ilisaritillutit.

 

Kommuneqarfik Sermersuumi aqutsisuuneq pillugu paasisaqarnerorusukkuit, uani nanisinnaavat: https://sermersooq.gl/kl/kommuneqarfik-sermersuumi-aqutseriaatsimut-tunn...

 

Oqaloqatiginninnerit sapaatip akunnerit 16-ni ingerlanneqarnissaat naatsorsuutigineqarpoq

 

Tusarfiginissat qilanaaraarput.

 

Pineqaatissinneqarsimannginnermut uppernarsaat:
Atorfik una pineqaatissinneqarsimannginnermut uppernarsaammik pissarsinissamut inatsit naapertorlugu pisussaatitaaffeqarpoq. Inatsit naapertorlugu kommune pineqaatissinneqarsimannginnermut uppernarsaammik pissarsippat atorfinitsitsineq aatsaat pisinnaavoq. Taamaammat maluginiaqqussavarput atorfininnissamut isumaqatigiissusiortoqarsinnaammat kommune pineqaatissinneqarsimannginnermut uppernarsaammik Politiinit aatsaat pissarsereerpat.

 

Akissaatinut atorfinitsitaanermullu tunngatillugu atugassarititaasut:
Akissarsiaqarnermut atorfinitsitaanermullu atugassarititaasut Naalakkersuisut akornanni isumaqatigiissut atuuttoq imaluunniit Kalaallit Nunaannilu kattuffiup allap isumaqatiginninniarsinnaatitaasup isumaqatigiissutaat atuuttoq naapertorlugu atorfinitsitsisoqassaaq.

 

Qaammatini pingasuni misiligummik atorfinitsitsisoqarsinnaavoq.

 

Inissaq:
Atorfik inissaqartitsivoq, taamaattumik qularnaveeqqummut ineqarnermullu, atuinermut il. il. akiliisoqartassaaq matumani Kalaallit Nunaanni Namminersorlutik Oqartussat kommunillu Kalaallit Nunaanni illuutaannut ineqarnermut akiliuteqartarnermut maleruaqqusat qaqugukkulluunniit atuuttut naapertorlugit akiliisoqartassaaq. Atorfineqqarnermi sulisutut ataavartumik initaarnissamut innersuussisoqarsinnaanngippat, sulisumut utaqqiisaasumik ineqartinneqarsinnaasoq inimik vakantboligmik neqeroorfigineqarsinnaavoq, siuliani taaneqartoq naapertorlugu ineqarnermut, atuinermut il akiliuteqartoqartassaaq. Ineqarnermut atuinermullu akiliutigineqartartut pillugit annertunerusumik paasisaqarusukkuit www.iserit.gl qimerloorneqarsinnaavoq.

 

Sulilernissamut piffissaliussaq sulisutut ataavartumik initaarnissamut neqeroortoqarnissaa qaqugukkut pissanersoq apeqqutaajumaarpoq. Inatsisit atuuttut tunngavigalugit sulilernissamut atatillugu angalasoqassappat angalaneq akilerneqassaaq aammalu pisattat tikinnissaannut akiliunneqartussaalluni.

 

Qinnuteqaat:
Qinnuteqaat qulequtserlugu Atorfiup ilisarnaataa 269/23-mik, ilinniagaqarsimanermut uppernarsaat siornatigullu sulisimanermut uppernarsaatit qinnuteqaammut ilanngullugit, qinnuteqaateqarnissamut piffissarititaasup qaangiutinnginnerani qinnuteqartoqassaaq.

 

Imatut qinnuteqaateqassaatit:
Atorfik qinnuteqarfigerusutat takugukku, uagutsinnut qinnuteqaammik nassiutissavat nittartagarput aqqutigalugu. Atorfimmut qinnuteqarfiginiakkannut link-i, atorfimmi inuttassarsiorneqartumi takusinnaavat.

 

MALIGIUK: 
Qinnuteqaatit pappilissatigut mailikkulluunniit tiguneq ajorpagut, inussiarnersumik qinnuteqaatit nittartagaq aqqutigalugu nassiuguk.

Qinnuteqarnissamut killissarititaasoq: apriilip 13.-at, 2023

Atorfik una qinnuteqarfigiuk