Kommuneqarfik Sermersooq pikkorissumik tunniusimasumillu katsorsaanermi aqutsisumik Paamiuni Ilaqutariinnut sullissivimmi 1. januar 2022 imaluunniit isumaqatigiinnikkut atorfinittussammik pissarsiorpoq.  

Paamiuni pinaveersaartitsinermik- aamma ilaqutariinnik katsorsaanermik suliniutit tamarmik Paamiuni najukkami Meeqqanut Ilaqutariinnullu Sullissiviup (BFC Paamiut) ataani inissisimapput. Paamiuni BFC-mi iliuuseqarnermik suliassaqarfik arfineq-pingasunik assigiinngitsunik neqerooruteqarpoq, ilanngullugit: Ilaqutariinnut siunnersuineq, Inuusuttunut siunnersuineq, ammasumik siunnersuineq, katsorsaaneq, ilaqutariinnut ineriartornermik pikkorissarneq, ilaqutariinnut Café, pitsaaliuineq aamma qimarnguik. Saniatigut "Siusissukkut Iliuuseqarneq" piuvoq, taanna Peqqinnissaqarfiup aamma Kommunip Ikiuigasuarnissamut upalungaarsimasuisa suleqatigiinnerat, ajornartoortoqartillugu Paamiuni innuttaasunut tamanut saaffiginnittoq.

Katsorsaanermik aqutsisup saniatigut ilaqutariinnut aqqutissiuussisunik sulisoqarpoq, taakkunannga ataaseq Qimarnguimmi aamma sulisuuvoq. Taakkua avataatigut inuusuttunut siunnersuisoq aamma pinaveersaartitsinermi siunnersorti kiisalu psykoterapeut atorfeqarput.

Aaqqissuussineq eqaatsoq eqqunneqarsimavoq taamaaliornikkut sulisut assigiinngitsut piginnaasatik naapertorlugit atuuffimminnut naleqqussarsinnaapput, aamma pisariaqartitsineq naapertorlugu sullissivik inuttaqartinneqarsinnaavoq.

Atorfik ulloq naallugu suliffiuvoq, Paamiunilu inissisimalluni, qaninnertut afdelingslederi pisortarissavat.

Atorfiup imarisaa:

• Ilaqutariinnut sullissivimmut katsorsaanermik ingerlatsinermut akisussaassuussaatit, ilaqutariinnik innersuunneqarsimasunut katsorsaanermut aamma perorsaanikkut suliniutinut akisussaaffeqarlutit
• Aqutsisoq aqutsisullu allat peqatigalugu sulisut suliamikkut ineriartornissaanut qulakkeerinneqqataassaatit, katsorsaanermi kiisalu perosaanikkut tunngasuteqartuni
• Ulluinnarni katsorsaanermik suliat ataqatigiissartassavatit, sulisunullu sullinneqartut pillugit eqqartueqatiginnittassallutit
• Ilaqutariinnik sullissinermi pitsaassuseq qulakkeersatassavat, tassunga atatillugu nalunaarsuineq suliarissallugu.
• Ilaqutariit innersuunneqarsimasut pillugit nalilersueqataaneq malinnaanerlu
• Katsorsaanermik innuttaasunut innersuunneqarsimasunut aamma suliarissavat, inuit ataasiakkaat, aappariit, ilaqutariit eqimattanillu aqutsillutit oqaloqatiginnittassaatit
• Aqutsisoq sulianillu ingerlatsinermi pisortaq peqatigalugit ilaqutariinnut meeqqanullu suliniutinik ingerlatseqataassaatit

Illit:
Naatsorsuutigaarput ilinnut tunngasut ataani allassimasut:

• Katsorsaanermik ilinniarsimanissat naatsorsuutigaarput, soorlu psykolog, familieterapeut, pædagog imaluunniit socialrådgiveri ilinniaqqissimasoq
• Nunatsinni tamakkiisumik katsorsaanermik suliaqarnermik misilittagaqassaatit
• Nukittooq pilersitsiniallaqqissoq inissaqartitsiuartoq piumassuseqarluartorlu
• Sulianik naammassinninniarluni ingerlatsinermut ineriartortitseqataalluni pitsanngorsaaqataalluni peqataalluartartoq
• Erseqqissumik tappissumillu allattariarsorlunilu oqaluttariarsorsinnaasoq
• Inoqatinnut pitsaasumik isiginnittaaseqarputit, ingerlalluartunut ukkasillaqqissoq piumassuseqartorlu
• Inuit assigiinngitsut attavigisinissaannut soqutiginnipputit pikkoriffigalugulu, killiffiat aallaavigalugu ingerlariaqqinnissaannut tapersersuillaqqissuullutit
• Ammasuuvutit attaviginnillaqqissuutit
• Suliffeqarfimmi ineriartortuartumi sulilernissat soqutiginartippat
• Qinnuteqartut marluinnik oqaasillit (kal/qall) piumaneqarnerupput

Neqoroorutigaavut:
Suliffik unamminartoq, suliat imarisaannut sunniuteqarnissamut periarfissaqartitsisoq, suliffeqarfimmi ineriartortumi allanngoriartortumilu nammineerluinnarluni annertuumik akisussaaffeqartitaaneq. Pingaartilluinnarparput patajaatsumik suliassanut suliffimmullu pulatikkiartuaarneqarnissaq, pimoorulluinnarparputtaaq suleqatigiinnermi silaannaap pitsaasup aqutsisut peqatigilluinnarlugit attattuarnissaa kiisalu pilersitsisinnaaneq nutaaliorsinnaanerlu inissaqartittuarpavut.

Meeqqanik pinerliisimannginnermut aammalu pineqaatissinneqarsimannginnermut uppernarsaat:
Atorfik taanna meeqqanik pinerliisimannginnermut aamma pineqaatissinneqarsimannginnermut uppernarsaammik piumasaqaateqartussaatitaaneq pillugu inatsit naapertorlugu uppernarsaatinik piumasaqaateqarfiuvoq. Inatsit naapertorlugu kommuneuppernarsaatinik naammaginartutut isigineqartunik pereerpat atorfininneq aallartinneqarsinnaavoq. Taamaattumik malugeqqussavarput kommunep uppernarsaatit naammaginartutut isigineqartut, meeqqanik pinerliisimannginnermut uppernarsaat rigspolitinit, aammalu pineqaatissinneqarsimannginnermut uppernarsaat politinit pippagit atorfininnissaq inissinneqassammat.
Meeqqanik pinerliisimannginnermut uppernarsaat kommunemit aaneqassaaq pineqartumit akuersissuteqarnikkut, pineqaatissinneqarsimannginnermullu uppernarsaat nammineq illoqarfigisami politiqarfimmut aaneqassaaq.

Akissaatinut atorfinitsitaanermullu tunngatillugit atugassarititaasut:
Akissarsiaqarnermut atorfinitsitaanermullu atugassarititaasut Namminersorlutik Oqartussani isumaqatigiissut atuuttoq, NPK imaluunniit Kalaallit Nunaannilu kattuffiup allap isumaqatiginninniarsinnaatitaasup isumaqatigiissutaat atuuttut malillugit atorfinitsitsisoqassaaq.

Atorfinititsineq qaammatini pingasuni misiliutitaqassaaq.

Inissiaq:
Atorfimmut atatillugu inissamik innersuussisoqarsinnaavoq, tassungalu qularnaveeqqut, ineqarnermut akiliutit, atuineq il.il. akilerneqartassapput, Kalaallit Nunaanni Namminersorlutik Oqartussat Kommunit il.il. inissiaataanni najugalinnik ineqarnermut akiliuteqartitsisarneq pillugu malittarisassat sukkulluunniit atuuttut naapertorlugit. Atorfimmut atatillugu inissiamik ataavartumik atorfinitsitaanerup kinguninnguagut attartorneqartussamik attartortitsisoqarsinnaanngippat, sulisut utaqqiisaasumik ineqarsinnaatitaasut, utaqqiisaasumik inissaannik neqeroorfigineqassapput, tassungalu ineqarnermut, atuinermut il.il. qulaani taaneqartoq innersuussutigalugu akiliuteqartoqassaaq. Ineqarnermut akiliutit pillugit annertunerusumik paasisaqarniaraanni, atuineq il.il. ilanngullugit uunga innersuussisoqarpoq: www.iserit.gl

Atorfiniffissaq ullulerneqassaaq suliffimmut atasumik inissaqartitsisoqarnera apeqqutaatillugu. Inatsisit atuuttut naapertorlugit atorfininnermut atatillugu angalaneq pisattanillu nassiussineq akilerneqassapput.

Qinnuteqaatip:
Qinnuteqaatip ilisarnaataata Atorfiup ilisarnaataa 728/21 aamma ilinniagaqarsimaneq siornatigullu sulisimanermik pillugit paasissutissartalik, soraarummeersimanermut uppernarsaatitalik qinnuteqaateqarnissamut piffissarititaasup qaangiutinnginnerani sulisoqarnermut immikkoortortaqarfimmit tiguneqareersimassaaq.

Imatut qinnuteqaateqassaatit:
Atorfik qinnuteqarfigerusutat takugukku, uagutsinnut qinnuteqaammik nassiutissavat nittartagarput aqqutigalugu.
Atorfimmut qinnuteqarfiginiakkannut link-i, atorfimmi inuttassarsiorneqartumi takusinnaavat.

MALIGIUK: Qinnuteqaatit pappilissatigut mailikkulluunniit tiguneq ajorpagut, inussiarnersumik qinnuteqaatit nittartagaq aqqutigalugu nassiuguk.