Skip to main content
84

Dette jobopslag er udløbet

Suliffeqarfissuup aningaasaqarnerani pisortaq

KNI A/S naatsorsuuserinermi pisortamut suleqataasussamik isumasioqatigisartagassamillu siumungaaq iliuuseqarsinnaasumik piaartumik isumaqatigiissuteqarnikkulluunniit atorfinissinnaasumik suleqatissarsiorpoq.

Suliffeqarfissuup aningaasaqarneranik sulisut suliaqartut piginnaaneqarluartut namminnerlu sulinermik ingerlataqartuusut arfineq-marluk pisortaaffigilissavatit. Atorfimmi atorfinikkaanni suliffeqarfimmi tamarmi sulisut attavigisartakkat amerlasuut suliffeqarfiutigisallu arlallit attavigineqartassapput. Taamaattumik sulisut qanorluunniit suliaqaraluarpata attaveqaqatigilluarsinnaassagitit suleqatigisinnaassagitillu naatsorsuutigaarput.

Atorfimmik soqutiginartumik unammillernartumillu nammineerluarsinnaaffiusumik atorfeqarnissannik matumuuna neqeroorfigaatsigit. Sulisut piginnaaneqarluartut tunniusimalluartut persuarsiorfiuunngitsumi sulisut suleqatigilissavatit. Atorfik suliffeqarfiup Sisimiuni qitiusumik allaffeqarfiani inissisimavoq.

Atorfinittussap naatsorsuuserinermi pisortaq qaninnertut pisortarissavaa.

Suliffeqarfissuup aningaasaqarnerani pisortatut akisussaaffigissavatit:

  • Aqutsineq, tamatumani immikkoortortaqarfimmi sulisut piginnaanerisassaanik inerisaaneq ilanngullugu
  • Suliffiup iluani suleriaatsinik suleriutsinillu nassuiaatissanik malinnaaviginninneq
  • Piffissami aalajangersimasumi naatsorsuutit - piffissami aalajangersimasumi naatsorsuutinik naammassinnittarnermik kingornalu nalunaarusiortarnermik misilittagaqarputit
  • Ukiumoortumik naatsorsuutit - ukiumoortumik nalunaarusiortarnermik naammassinnittarnermik misilittagaqarputit, tamatumani kukkunersiuisunik qanimut oqaloqateqarsinnaaneq ilanngullugu
  • Missingersuutit - missingersuusiortarnermik kingornalu ilimagisatut naatsorsuutigineqartunik malinnaaviginneqqittarnermik misilittagaqarputit
  • Aningaasat ingerlaartarnerat – aningaasat ingerlaarnerinik nalunaarusiortarneq uterfiginnittuartarnerlu
  • ERP systemitsinniit AX 4.0-miit Microsoft Dynamics 365-imut ikaarsaarluta nutarterinitsinnut peqataaneq
  • Aningaasalersuinitsinnut atatillugu nalunaarusiortarnitsinni ineriartortitsinitsinnut peqataaneq, tamatumani niuernermik ingerlatatsinnut nalunaarusiortariaatsitigut atortussaqartitsinermik ineriartortitsineq ilanngullugu

Qanoq ittuunerit
Inuttut nukittuujuvutit sulianullu tamanut malinnaaneq iluarisimaartarlugu, tassami ulluinnarni ingerlatsinermut peqataarusuttaravit. Pisortatut alapernaatsuuvutit, kajumissaarisarlutit, tatiginninnermik pilersitsisarlutit sulisuillu tapersorsornissaat paasisimasaqarfigalugu. Pitsanngorsaajuarnissaq siunertaralugu nutaanik siunnersuuteqartoqarnissaanut isumasioqatiginnittarnerlu ammaffigisuuatit.

 

Naggataatigut minnerunngitsumillu taama ittuutitsinissami nassuiarneqartut tigussaasunngortillugit atuuttunngortinnissaannut piginnaaneqarputit piffissaatillugulu pitsaassusilinnik tunniussaqartarlutit. Suleriaaseq sukkasuumik ingerlanneqartarpoq tunniussinissamullu killiliunneqartut eqquutsinneqarnissaat pingaartinneqarnersaavoq.

 

 

 

Piginnaaneqarfigisat
Takorloorparput atorfimmut qinnuteqartoq atorfimmi assingusumi misilittagaqassasoq, Cand. merc. aud, HD qaffaseqataanilluunniit assingusumik ilinniakkamik naammassinnissimasuussasoq. Qarasaasiamik atuinermik pikkoriffeqarluarputit nalinginnaasumillu ERP-systeminik paasisimasaqarluarlutit.

 

KNI-p neqeroorutigai

  • Immikkut isumaqatigiissuteqarnikkut akissarsiassat atugassarititaasullu pitsaasut qinnuteqartunut piukkunnarluartunut naammaginartut
  • Atorfimmut atatillugu inissaqartitsisoqassaaq, tassungalu qularnaveeqqut ineqarnermullu akiliutissat inatsisit malillugit akilerneqartassapput
  • Piginnaasat ineriartortinnissaanni periarfissat pitsaasut
  • Suliffik ulluni tamani assigiinngitsuusuni assigiinngissitaarfiusoq, pissanganartoq unamminartorlu.

 

Atorfik pillugu annerusumik paasisaqarumaguit naatsorsuuserinermi pisortaq Per Jensen attavigisinnaavat sianerfigalugu uunga mobil +299 52 87 27 e-mailerfigaluguluunniit uunga pje@kni.gl

 

Qinnuteqaat
Qinnuteqaat sukumiisoq tunngavilersugaq, ilinniarsimanermut siusinnerusukkullu sulisimanermut nalu-naarsukkanik imalik (CV), oqaaseqaatit aammalu sulisitsisorisimasavit attaveqarfiginissaanut paasissutissaq, tigoreersimassavarput kingusinnerpaamik ulloq 30. april 2021.

 

Qinnuteqaat uunga nassiunneqassaaq:     
KNI A/S
Sulisoqarnermut immikkoortortaqarfik
Postboks 319
3911 Sisimiut
E-mail: jobs@kni.gl

KNI  Kalaallit Nunaanni tamarmi 1.000-it sinnerlugit sulisoqartoq Nunatsinni niuernermik ingerlatsisut annersaraat.  Suliffeqarfissuup niuernikkut tallimanik ingerlataqartup ukiumut 2,5 mia. kr. kaaviiaartittarpai.

Tamannalu ingerlanneqarpoq ulluinnarni nioqqutissanik atortussanillu nioqquteqarnikkut, ikummatissaqartitsinikkut, toqoraaveqarnikkut, illoqarfinni nunaqarfinnilu nioqqutinik quersuarniit tuniniaanikkut, mittarfeqarfitsigut nittartakkakkullu tuniniaanikkut.

KNI pillugu paasisaqarnerorusukkuit www.kni.gl-mut iserlutit paasisassarsiorsinnaavutit.