Skip to main content
175

Dette jobopslag er udløbet

Qanorooq tusagassiortussarsiorpoq (Initalimmik)

Ullormut nutaarsiassat pingaarnerpaat assitalersorluakkat tv-kkut tusagassiarerusukkukkit KNR-ip nutaarsiassaqartitsiviani suleqatitaarerusuppatsigit.

KNR-ip nutaarsiassaqartitsiviani tusagassiortut ilanngutassiaminnik allaaserisaminnillu radiokkut, tv-kkut nittartakkakkullu saqqummiussuimmata, tusagassiuutit assigiinngitsut arlalit atorlugit sulinissat piareersimaffigissavat.

Atorfilli una tv-kkut nutaarsiassiornermik toqqaannarnermillu annerusumik suliaqarfiuvoq.

Qanorooq ullormut ataasiarluni tv-kkut nutaarsiassiisarpoq, sapaatillu akunneranut pingaarnersiukkanik eqikkaalluni minutsinik 25-nik sivisussusilimmik sapaatip akunnerata naanerani KNR-ikkut DR-ikkullu aallakaatitassamik aallakaatitassiortarpoq.

Suliffeqarfimmi ulapaarfiusumi suleqatigiilluarfiusumilu tusagassiortut nutserisullu katillugit 30-it missaanniittut peqatigalugit sulissaatit.

Nunatsinni nutaarsiassat, kalaallisut danskisullu suliarilluakkat aaqqissuisoqarfimmi kujataani ataatsimik avannaanilu ataatsimik aamma tusagassiortulimmi suliarissallugit pingaartipparput.

 Ilinnit naatsorsuutigaavut:
- tusagassiortutut assigisaanilluunniit ilinniagaqarsimanissat
- isorinnissinnaassuseqarnissat inuiaqatigiinnilu pissutsinik ilisimasaqarluarnissat
- tunniussimasuunissat eqaatsumillu suleriaaseqarnissat
- suleqateqallaqqissuunissat isumagissaartuunissalu

Kalaallisut oqallorissuunissat toqqaannarnermillu nuannarisaqarnissat pingaartipparput.

Suleriapallannermik ullormullu sammisanik allanngorartunik nuannarisaqarnissat pingaaruteqarpoq. Oqaluttuatsialammik pissutsinik piviusmik tunngavilimmik takunnissinnaassaatit saqqummiussisinnaassallutillu.

Suleqateqallaqqillutillu namminersullaqqissuunissat pingaartippavut.

Februarip aallaqqaataa 2022 imaluunniit isumaqatigiissuteqarnikku atorfinitsitsisoqassaaq.

 

Aningaasarsiatigut atorfinitsitaanermilu atugassarititaasut
Akissarsiat atorfininnermilu atugassarititaasut, tassunga ilanngullugit atorfinitsitaanermi soraarnermilu angalanissamut akiliunneqarnissamut pisattallu nassiunneqarnerannut Kalaallit Nunaanni Namminersorlutik Oqartussat kattuffiullu isuma- qatiginniarsinnaatitaasup attuumassuteqarfigisap akornanni isumaqatigiissutaasut atorfininnerup nalaani atuuttut naapertorlugit ingerlanneqassapput.

Najugaqartitaaneq
Atorfimmut atasumik sulisunut inissiamik pequteqanngitsumik innersuussisoqarsinnaavoq tamatumunnga malittarisassat qaqugumulluunniit atuuttut malillugit.

Malittarisassat qaqugukkulluunniit atuuttut naapertorlugit inissiamut innersuussutigineqartumut akiliutit qularnaveeqqutillu akilerneqassapput. Ineqarnermut akiliut aamma inissiap pitsaassusaa nikerarsinnaapput inissiap qanga sananeqarsimanera, piginnittua il.il apeqqutaallutik.

Atorfimmut atatillugu ini atorfeqarnermut tunngavoq atorfeqarnerullu unitsinnerani qimanneqassalluni. Sulisutut ataavartumik initaarnissaq utaqqinarsinnaavoq, taamaattumik utaqqiisaagallartumik inissiisoqarsinnaasarpoq, tassunga ilanngullugu najugaqatigiiffinnut minnerusunut imaluunniit akunnittarfimmi inissianut inissiisoqarallarsinnaalluni.

 Atorfik pillugu paasissutissat amerlanerusut aaqqissuisumut Arnaq Nielsenimut +299 361525, arn@knr.gl -imut imaluunniit pisortamut Alice Sørensenimut +299 36 15 67, als@knr.gl-imut saaffiginnissuteqarnikkut pissarsiarineqarsinnaapput.

Qinnuteqaat “Qanoruumi tusagassiortoq”-mik allanneqassaaq, CV-mik ilinniakkanut atorfigisimasanullu uppernarsaatinik aamma imaqassalluni.

 

https://knr.gl/kl/atorfiup-nassuiarnera?VID=10-21