Skip to main content
100

Inuit Pisinnaatitaaffii pillugit Siunnersuisoqatigiit inerisaarusussusilimmik allatseqarfimmi pisortassarsiorput

Allatseqarfimmi pisortassarsiorpugut, taannalu Inuit Pisinnaatitaaffii pillugit Siunnersuisoqatigiit peqatigalugit inerisaaqataanermik FN’illu inuit pisinnaatitaaffii pillugit isumaqatigiissutai aallaavigalugit suliaqarnikkut sunniuteqaqataanissamik peqataarusussuseqassaaq

 

Kalaallit Nunaanni inuit pisinnaatitaaffii pillugit timitaliinissamut nukittorsaanissamut piumassuseqarluarpit aammalu innuttaasut qinikkattalu akornanni oqalliseqataalersitsinissamik pilersitseqataarusuppit? Inuiaqatigiit kalaallit iluanni pisunik aalassaataasartunillu ilisimasaqarluartuuvit eqeersimaariffiginnittuullutillu?

Sullitassaraatit siunnersuisoqatigiit 13-inik ilaasortaqartut, taakkulu siunnersuisoqatigiit

Inuit Pisinnaatitaaffii pillugit Siunnersuisoqatigiit allatseqarfimmi pisortatut aalajangikkamittut suliakkiissutaat nammineerluni naammassisassaralugit. Illit akisussaaffigiligassaraat allatseqarfeeqqap ulluinnani ingerlanneqarnera, illillu akunnermuliuttutut attaveqaataalissaatit siunnersuisoqatigiit akornanni taakkulu pingaarnertut suleqataanermikkut attaveqarfigisaannut.

 

Illit tassaavutit imminut aquttoq, periallaqqissoq eqinnaatsorlu.

 

Atorfik pillugu

Atorfik piffissaq tamakkerlugu atorfiuvoq allatseqarfilllu Nuummiissaaq. Kissaatigineqarpoq atorfinitsitsineq pissasoq ulloq 1. december 2019, taamaattorli qinnuteqartoq tulluarsorinartoq naleqqussorinartorlu utaqqisinnaavarput.

 

Ulluinnarni allatseqarfiup ingerlanneqarnera suliassaraat Siunnersuisoqatigiillu siulittaasuat peqatigalugu siuttuussaatit inerisaanermut qaammarsaatinik paasissutissanillu suliaqartarnissami, kiisalu Siunnersuisoqatigiit suliaqarfissatut aalajangigaat pilersaarusiortassallugit ataqatigiissaartassallugillu.

 

Suliassatit ilaatigut makkupput:

  • Siunnersuisoqatigiit taakkulu ilaasortaat sullitassaralugit suliassanillu takkussortunik suliaqarneq
  • Tusarniaanerit soqutiginaateqarsinnaasut akissutaannik ataqatigiissaasarnissaq
  • Inuit pisinnaatitaaffiinut tunngasunik nalunaarusiornernut akissutaasartut ataqatigiissartarnissaat
  • Institut for Menneskerettigheder (DK) suleqatigisarnissaa Kalaallit Nunaannut sulfat tunngasut pineqartillugits
  • Inuit pisinnaatitaaffii pillugit ilisimanninnerulernissamut suliniutinik aallartitsisarnerit
  • Siunnersuisoqatigiit avammut attaveqaataannik suliaqarneq – nittartagaaq kiisalu facebook
  • Suleqateqarneq attaveqartarnerlu inatsisilerituunut, allaaserinnittartunut, nioqqutissiornermik sulialinnut il.il.
  • Siunnersuisoqatigiit ataatsimiinnissaasa allatullu pisoqartitsisarnissat pilersaarusiorneqarneri
  • Ataatsimiinnerit imaqarniliorneqarneri

 

  • Qarasaasiatigut allagarsiat oqarasuaatillu ulluinnarni akissuteqarfigineqartarnissaat
  • Aningaasaqarnermi aqutsinermut akisussaasuuneq kiisalu naatsorsuuserisup kukkunersiuisullu ataqatigiissarneqartarnerinne
  • Qanimut Siunnersuisoqatigiit siulittaasuannik oqaloqateqartarneq siunersiunnersuuteqartarnerlu
  • Siunnersuisoqatigiinnut kattusimassutaaneq attaviunerlu

 

Illit ujartugarput, taassaassaaq:

  • Inuit pisinnaatitaaffii aallaavigalugit iserfiginnilluni sulisinnaassuseqarneq

  • Inuit pisinnaatitaaffiisa ilisimaneqarnerinik siammarsaanissamut piumassuseqarluartuunissaq politikikkullu sunniisinnaassuseqartuunissaq
  • Pitsaasumik paasissutissiaqartarnermik tulluusimaarutiginnittuuneq. Patajaatsumik tunuliaqutaqarneq naleqquttumillu misilittagaqarneq
  • Imminut nammineerluni aquttuuneq, pilersitserusussuseqartoq isumassarsiassaqarluartorlu
  • Suliassanik pingaarnersiuisinnaallnit, aallartitsisinnaaneq, aallartitat ingerlassinnaallugit inaarsinnaallugillu
  • Siulittaasumut siunnersiueqateqartarsinnaasoq pisinnaasaqarfigissallugulu annertuumik isiginnissinnaaneq
  • Sapissanagit atorsinnaallugillu atortut IT atorlugu atorneqartut kiisalu programmit atugaasut soorlu Office pakken, Wordpress kiisalu Facebook.
  • Ulluinnarni kisimiilluni sulisinnaasoq
  • Akunnerit suliffissat eqqarsaatigalugit nikerartumik sulisarsinnaasoq
  • Kalaallisut aamma qallunaatut oqalussinnaasoq allassinnaasorlu tuluttullu paasinnissinnaalluni
  • Sapissanagu attaveqarfiit pilersissinnaaneri akuuffigisinnaanerilu

 

Makku neqeroorutigaavut:

  • Kalaallit Nunaanni inuit pisinnaatitaaffi pillugit nuimanerulersitsinissamut periarfissaq assissaqanngitsoq

  • Avatangiisit, annertuumik qanoq periuseqarnissannut kiffaanngissuseqarneq periarfissarititaasut iluanni inatsisini najoqqutassatut aalajangersakkat naapertorlugit, Inuit Pisinnaatitaaffii pillugit Siunnersuisoqatigiinnit kiisalu Siulittaasumit aalajangerneqarsimasunik
  • Sumiiffik, illit sunneeqataaffigisinnaallugu angusaqarfigisinnaasat suliaqarfigerusutavit suulluunniit aallunneranni
  • Suliffeqarfik, illit iliuuseqarusussutsikkut maligassiuisinnaassutsikkullu atorluarsinnaasat
  • Atorfik, ilinnut periarfissiisoq inuit pisinnaatitaaffiisa iluini nutaanik ingerlaavartumik ilikkagaqartuarnissamut tamatumalu iluani pisunik malinnaajuarnissamut
  • Periarfissiisoq attaveqarfiit ineriartorfiusut akuuffigilernissaannut inuillu pisinnaatitaaffii pillugit suleqataaffigalugit

 

Ilinniarsimasat / misilittagaqarneq

  • Naleqquttumik qaffasissumik ilinniarsimasuunissaq imaluunniit atorfilittut suliaqarsimanikkut/inatsisilerisutut suliaqartarsimanikkut kiisalu allaffissornikkut suliaqarsimanikkut misilittagaqarsimaneq

 

  • Iluarsartuullugu pilersaarusiamik aqutsineq
  • Attaveqaqatigiinnermik ingerlatitseqqiinermillu misilittagaqarneq

 

Akissarsiaqarneq atorfinitsitaanermilu atugassarititat

Akissarsiaqarneq atorfinitsitsitaanermilu atugassarititat inummut ataatsimut atsiukkamik isumaqatigiissuteqarnikkut pissaaq tamatumanilu aallaavigineqassapput atorfinitsitaanermi Namminersorlutik Oqartussat aamma illit kattuffimmut isumaqatiginninniarsinnaatitaasumut ilaasortaaffippit akornanni isumaqatigiissutit atuuttuusut naapertorlugit.

 

Sulineq sivisussuseqassaaq 40 timit sapaatip akunneranut, nikerarsinnaasartumik.

 

Inissaqartitsineq

Atorfimmut atatillugu inissamik innersuussineqarsinnaanngilaq.

 

Qinnuteqarnissamut killiliussaq

15. november 2019

 

Paasissutissat ilassutaasinnaasut

 

Inuit Pisinnaatitaaffii pillugit Siunnersuisoqatigiit

 

Inuit Pisinnaatitaaffii pilllugit Siunnersuisoqatigiit atasimapput 2013-imiilli. Ulloq 1/1 2019 aallarnerfigalugu inatsit nutaaq siunnersuisoqatigiinnut atuutilerpoq, taannalu ammaassivoq siunnersuisoqatigiit allatseqarfimmi pisortamik atorfinitsitsisinnaalersillugu ulluinnarni ingerlanneqarnerani isumaginnittussamik, kiisalu siunnersuisoqatigiit aalajangigaat inerisaanermik suliassaqartitsisut aamma suliarisassallugit.

Inuit Pisinnaatitaaffiinut pillugit Siunnersuisoqatigiinnut siunertaavoq ilaatigut siuarsaaqataaffigissallugu illersussallugillu Kalaallit Nunaanni inuit pisinnaatitaaffii FN’ip Parisimi tunngaviusumik isumaqatigiissutai naapertorlugit kiisalu Kalaallit Nunaanni inuit pisinnaatitaaffii pillugit nalinginnaasumik ilisimasatigut piginnaasaqarfinnillu piorsaaqataanissaq.

Siunnersuisoqatigiit 13-inik ilaasortaqarput, ukiumut marloriarlutik katersuuttartut, siulittaasoqarlutik taamatullu siulittaasoq tulleqarluni.

 

Atorfik pillugu annerusumik paasisaqarusukkuit, taava tikilluaqqusaavutit Inuit Pisinnaatitaaffii pillugit Siunnersuisoqatigiit avataaniit ataqatigiissaarisuat info@humanrights.gl, 229500.