Skip to main content
100

Dette jobopslag er udløbet

Allagarsiuteqqitaq – Inunnik Isumaginnittoqarfik Ilulissat Meeqqanut Inuusuttuaqqanut Ilaqutaariinnullu isumaginninnermut siunnersortimik pissarsiorpoq

Ilulissani Inunnik Isumaginnittoqarfik Meeqqanut Inussuttuaqqanut Ilaqutaariinnullu isumaginninnermut siunnersortimik pissarsiorpoq. piaartumik isumaqatigiissuteqarnikkulluunniit sulilertussamik.

Inunnik isumaginnittoqarfimmi meeqqanut inuusuttuaqqanut ilaqutaariinnullu sullissisut allat suleqatigissavatit. Inunnik Isumaginnittoqarfimmi Aqutsisut Ilulissani qaninnertut qullersarineqassallutik.

Suliassat akisussaaffiillu:

  • Meeqqat qanoq inuuneqarnersut kommunimi nakkutigalugit, ikiorsiinissarlu pisariaqartillugu nalunaarnissaq, (sumiginnaasoqartillugu imaluunniit innarluutilinnut) imaluunniit naartusoq ikiortariaqartillugu. Annertunerusumik ilaqutariit ulorianartorsiortut pillugit annertusisamik nalunaartussaatitaaneq, tassani meeraq ikiortariaqartillugu nalunaartarnissat pineqarlutik.
  • Saaffiginnissutinik tigooraaneq meeqqat inuusuttuaqqat ilaqutariillu pillugit siunnersuisarnerit ingerlallugit.
  • Illup iluani avataanilu suliffeqarfiit akimorlugit suleqatit suleqatigalugit meeqqat pillugit immikkoortortaqarfimmi misissuinerit.
  • Sulisunut pisortaq suleqatigalugu meeqqanut  Meeqqat tapersersorneqarnissaanut Inatssartut Inatsisaat tunngavungalugu ikiorsiinissamut nalilersuineq, taassuma ataani tapersersortinik pisariaqartitsisoqarnersoq, angerlarsimaffiup avataanut inissiisoqassanersoq imaluunniit kinguneqartitsisoqassanersoq nalilersorlugu.
  • Pilersaarusiorluni, suleqatigiit ataatsimiinnerini meeqqanut iliuusissanik innersuussinerit, isumaginninnikkut misissuinerit, meeqqanik ilaqutariinnillu Teamleder suleqatigalugu suliffeqarfiit akimorlugit ataatsimiititaliamut innersuussinerit. Aammalu Meeqqanut ilaqutariinnullu Teamleder taamatullu Isumaginninnermut pisortaq suleqatigalugu isumaginninnermut ataatsimiititaliamut innersuussinerit.
  • Kommunimi meeqqanik ilaqutariinnut inissinneqarsimasumik nakkutilliineq, taassuma ataani angajoqqaarsianut akulikitsumik attaveqartarneq, sapinngisamillu angajoqqaanut ilaquttanullu attaveqartarneri nakkutigalugit.
  • Meeqqanik ulloq unnuarlu paaqqinnittarfinnut imaluunniit kommunip avataani efterskolertunut inissinneqarsimasunut nakkutilliineq sullissisutullu inissisimaneq, taassuma ataani meeqqanut angajoqqaajusut ilaqutaasullu attavigalugit.
  • Angerlarsimaffiup avataanut inissiineq unitsinneqarpat suliniutinik aallartitsineq, (kinguneqartitsineq) taamaalilluni meeqqap inuusuttuaqqalluunniit siunissaa aaqqissorneqarniassammat.
  • Meeqqanut peqqussutit tunngavigalugit aalajangerneqarsimasut, ikiorsiissutitut aningaasatigut tapersersorneqarnerit isumaginnittoqarfimmi aningaasatigut nakkutilliisoq suleqatigalugu nakkutilliinerit.
  • Meeqqat kinguaassiutitigut kanngutsaatsuliorfigineqannginnissaannut suliniarnermut suleqataaneq.
  • Nunaqarfinni meeqqanut sullissisunut oqaloqatiginnittartutut inissisimaneq.
  • Sumiiffimmi isumaginninnermi pingaartartunut suleqataaneq.
  • Atuarfimmi isumaginninnermi siunnersortimik taamatullu Najorti qanimut suleqateqarneq
  • Meeqqanik oqaloqateqarneq

Piginnaasat kissaatigineqartut:

  • Ilinniarsimanissaq Isumaginninnermi Siunnersortitut.
  •  Suliamut tunngassutilinnut pikkorissarnissamut piumassuseqarneq soqutiginninnerlu aammalu ilinniaqqissinnaanerit suliamut attuumassutillit.
  • Meeqqanut tunngatillugu sullissinermik misilittagalik ilanngullugit meeqqanut inuusuttunullu ikiorsiinermut peqqussut malillugu ikiorsiisarnermik suliaqartarsimanerit takussutissallit.
  • Suleqatinik aqutsisunillu suleqatiginnilluarsinnaaneq.
  • Isumaginnittoqarfimmi sullissisutut sullissinermi aaqqissuussaanikkut aqutsinikkullu aaliangersakkanik malinnissinnaaneq suleqatinillu suleqateqarluarsinnaaneq.
  • Suleqatinik avataaneersunik pitsaasumik suleqateqarnermut misilittagaqarneq, suleqatigiit ataatsimiinnerini, suliaqarfiit akimorlugit ataatsimiinnerni imaluunniit immikkoortortaqarfiit akimorlugit sullissinermi.
  • Maligassiuisoq, sullitanut attaveqatiginninnermut pikkorissoq
  • Tarnikkut nukittooq, akerleriinnernik aqutsisinnaaneq
  • Tulleriiaarluakkamik sulisinnaaneq, tatiginartoq akisussaassuseqartorlu.
  • Aalajaatsoq peqqissaartorlu

Piffissaq qaninnerusoq isigalugu meeqqanik ilaqutariinnillu sullissinerup pitsaanerusunngortinnissaa, taassuma ataani misissuinerni ikiorsiissutinillu naleqquttunik meeqqat pillugit peqqussutit tunngavigalugit nassaarniarnermi pitsanngorsaanerit.

Piffissaq ungasinnerusoq isigalugu meeqqat pisariaqartitaannik pisinnaatitaaffiannillu inuiaqatigiinnit annertuunerusumik paasineqarnissaannik suliaqarneq, kiisalu angajoqqaat susassaqarfiinik pisussaaffiinillu.

Akissarsiaqartitsineq atorfinititsinerlu:

Akissarsiaqartitsineq atorfinitsitinerlu pissapput kattuffimmut isumaqatigiinninniarsinnaatitaasumut isumaqatigiissutit sukkulluunniit atuuttut naapertorlugit.

Atorfimmut atatillugu inissaqartitsisoqarsinnaavoq, taannalu akilerneqartassaaq qularnaveeqqusiinermut akiliutissamut il. il. malittarisassat atuuttut naapertorlugit.

 

Pinerluuteqarsimannginnermut uppernarsaat

Pisortatigoortumik pinerlussimannginnermut uppernarsaat (Straffeattest) meeqqanillu pinerliisimannginnermut uppersarsaat (Børneattest) naammaginartut tunngavigalugit atorfinitsitaaneq pissaaq, taakkulu qinnuteqartup akuersineratigut Rigspolitiinut sulisitsisumiit aaneqassapput.

Atorfimmut tunngatillugu annertunerusumik paasisaqartoqarsinnaavoq immikoortoqarfinni Aqutsisuungallartoq attaviginerisigut: Makkak Jørgensen e-mail: makj@avannaata.gl tlf. 387563

Qinnuteqaat ilinniarsimaneq suliffigisimasallu pillugit paasissutissat, ilinniarsimanermut uppernarsaatit il.il. ilanngullugit Sulisoqarnermut Immikkoortortamut kingusinnerpaamik  6 november 2019 uunga nassiuteqquneqarput:

 

Avannaata Kommunia

Sulisoqarnermut immikkoortortaqarfik

Postboks 1023

3952 Ilulissat

Imaluunniit mailimut:

hr@avannaata.gl