Ujarassiornermut Immikkoortortaqarfik immikkoortortaqarfimmi pisortassarsiorneqarpoq
Aatsitassanut suliassaqarfimmi paasisimasaqarpit aammalu immikkoortortaqarfimmi nunani tamalaani sunnersimaneqartumi siuttuunissaq piumassuseqarfigalugu? Aammalu peqatigisaanik sulisoqarnermi aqutsineq pikkoriffigaajuk, sulisunik kajumissuseqalersitsisinnaallutit aammalu ineriartorneq atugarissaarnerlu qulakkeersinnaallugit? Taava Inuussutissarsiornermut, Niuernermut, Aatsitassanut, Inatsisit Atuutsinneqarnerannut Naligiissitaanermullu Naalakkersuisoqarfimmi ujarassiornermut immikkoortortaqarfimmut pisortatut atorfik immaqa ilinnoortuuvoq.
Atorfimmut nassuiaat
immikkoortortaqarfimmut pisortatut Ujarassiornermut Immikkoortortaqarfimmut pingaarnertigut missingersuutinut aqutsinermullu akisussaaffeqalissaatit aammalu Naalakkersuisoqarfimmut pisortaanerup ataaniilissallutit. Immikkoortortaqarfimmi ineriartortitsineq aammalu immikkoortortaqarfimmi sulisunut suliatigut isumasioqataasarneq isumagisarissavatit. Immikkoortortaqarfimmut ersarissumik sammiviliissaatit aammalu Naalakkersuisoqarfimmi immikkoortortaqarfiit akimorlugit suleqatigiinnermut pitsaasumik taperseeqataassallutit. Aatsitassaqarfinnut, qarasaasiatigut paasissutissaasivinnut, nittarsaassinermut, paasissutissiisarnermut politikkikkullu sullissinermut tunngatillugu suliassat ataqatigiissaartassavatit, aammalu periusissianut akuerineqareersunut tunngatillugu ilisimatusarnermut suliassaqarfik nassuiaasissallugu.
suliassat allaffissornermut tunngassutillit:
Immikkoortortaqarfiup akisussaaffeqarfiinut tunngatillugu Naalakkersuisup, naalakkersuisoqarfimmi pisortaanerup allallu immikkoortortat siunnersorneqartarnerat.
Missingersuutinik ukiumoortumillu pilersaarutinik suliaqarneq.
Qulequttat geofysiskininut, geologiskinut aatsitassarsiorlunilu misissuinermut tunngasut pillugit apeqquteqaatinut akissuteqaatinik ataqatigiissaarineq.
Paasissutissanik nalunaarsukkanik nalunaarutiginnittarnermut, uninngasuutiginninnermut, paasissutissiisarnermut pitsaassusaannillu qulakkeerisarnermut suleriaasissanik qulakkeerineq.
Politikkikkut isummernissamut tunngavissianik, allakkianik, ujarassiornermut nalunaarusianik il.il. pitsaassutsitigut qulakkeerineq ataqatigiissaarinerlu.
Avataaneersunut suleqatigisartakkanut ataqatigiissaarineq isumaqatigiissuteqartarnerillu.
Tamatuma saniatigut immikkoortortaqarfiup Kalaallit Nunaanni aatsitassaqarneranut periarfissaqarfinnik nittarsaassineranut tapersiisussaassaatit, kiisalu suleqatigiissitaliani assigiinngitsuni suliffiup iluani avataanilu peqataasassallutit. Kalaallit Nunaanni avataanilu angalasarnissaq naatsorsuutigisariaqarpat.
Ilisarnaatit
Ujarassiuumik/geofysikerimik aallussilluartumik, misilittagalimmillu allaffissornermik aqutsinermillu misilittagaqartumik, sulisussarsiorpugut. Qinnuteqartoq eqqortoq aatsitassanut suliassaqarfimmi misilittagaqarpoq, aammalu
minnerpaamik pinngortitalerinermi ilinniagartuutut allagartaqarluni,
teknikkikkut allaffissornikkullu aqutsinermik misilittagaqarluni,
ineriartortitsisartumik misigittartumillu aqutseriaaseqarputit,
ineriartortitsinissaq suliniutillu eqqarsaatigalugit sulinermik aaqqissuussisarnermik annertuumik misilittagaqarpoq,
suliassanik suliarinninnissamut piffissamullu killigititanik naammassinninnissamut sakkortuumik akisussaassuseqarlutit misigisimasarpoq, suliaqartunik assigiinngitsunik suleqateqarnissamik piumassuseqartoq piginnaasaqarluni, kiisalu
tuluttut allattariarsorluni oqaluinnarlunilu piginnaaneqarluartoq.
Politikkip, ingerlatsinerup ineriartortitsinerullu akornanni ajornartorsiutiginagu sulisarputit, aammalu politikkerimut tunngasunut siunnersuisinnaallutit. Aatsitassanut suliassaqarfiup iluani allaffissornikkut aaqqissuussaanermi imaluunniit ujarassiornermik ilisimatusarnermut aaqqissuussaanermi sulinermiit misilittagaqaruit, kiisalu aaqqissuussaanerni politikkikkut aqunneqartuni misilittagaqaruit, iluaqutaassaaq.
Kalaallit oqaasii kulturiallu ilisimasaqarfigigukku iluaqutaassaaq. Qinnuteqartunut Kalaallit Nunaata avataaneersunut sungiusimasanit allaanerusuni kulturikkut atugaqarluni sulinissap inuunissallu piginnaasaqarfiginera, piumassuseqarfiginera kajumigineqarneralu pingaartinneqassaaq.
Uagut pilluta
Ujarassiornermut Immikkoortortaqarfiup Naalakkersuisoqarfimmi inissisimanerani pingaarnermi ilaatinneqarput:
Kalaallit oqartussaasuinut ujarassiornikkut siunnersuineq.
Aatsitassarsiorluni misissuinermut attuumassutilimmik ilisimatusarnermik suliaqarneq aammalu paasissutissanik qaffasissumik pitsaassusilinnik nutaanik pissarsititsineq.
Kalaallit Nunaanni aatsitassanut periarfissaqarfiusunut nittarsaassineq.
Naalakkersuisoqarfippiami sulisut 35-t missaanniippugut. Naalakkersuisoqarfiup aatsitassanut suliassaqarfimmi pingaarnertigut pilersaarusiorneq isumagisaraa, aammalu aatsitassanut tunngasunik suliaqarnerit pillugit politikkikkut oqallinnissanut tunngavissat suliarineqarneranni kiisalu aatsitassanut suliassaqarfimmi aalajangiinerit atuutsinneqalernissaanni peqataasarluni. Tamatuma saniatigut Naalakkersuisoqarfiup ataaniipput immikkoortortat marluk: Aatsitassanut Ikummatissanullu Aqutsisoqarfik aamma Atuisartoqarnermut aamma Unammilleqatigiinnermut Aqutsisoqarfik. Atorfik aaqqissuussaanermi Ujarassiornermut Immikkoortortaqarfimmi inissisimavoq, tassaniillutik immikkoortortaqarfimmi pisortaq 1 aammalu ilisimatuussutsikkut sulisut 11. Ujarassiornermut Immikkoortortaqarfiup Aatsitassanut Ikummatissanullu Aqutsisoqarfik, De Nationale Geologiske Undersøgelser for Danmark og Grønland (GEUS), aammalu Kalaallit Nunaanni nunanilu allani kattuffiit allat qanimut suleqatigai.
Akissarsiat atorfeqartitaanermilu atugassarititaasut:
Atorfik akissaateqarfimmi LR 38-mi maanna inissisimavoq.
Aningaasarsiat aalajangersimasunik aningaasarsianut ilallit LR 38-mi 1. April 2022-miit qaammammut 56.910,- koruuniupput ukiumullu 682.930,- koruuniullutik.
Aallaaviatigut isumaqatigiissutini atugassarititaasut naapertorlugit atorfinitsitsisoqassaaq, qinnuteqartoq tjenestemandi-tut atorfeqareersimaguni Nunatsinni pisortani tjenestemandit pillugit inatsisit malillugit tjenestemandinut atugassariti-taasut naapertorlugit atorfinitsinneqarsinnaavoq.
Atorfimmut atuuttoq tassaavoq, piffissap suliffiusussap qanoq sivisutiginissaa killilersugaanngimmat, aammalu qaangiuttoornermi ajunngitsorsiassat akilerneqarnissaat ullullu sulinngiffissat annaaneqartut ajunngitsorsiassarsissutiginissaat atorneqarsinnaanngillat.
Piffissap suliffiusussap sivisussusissaa aallaavittut sapaatip akunneranut nalunaaquttap akunnerinik 40-nik sivisussuseqarpoq.
Akissarsianut atorfeqartitaanermullu tunngasutigut piumasaqaatit, taakkununnga ilanngullugit atorfinikkiartorluni soraarlunilu angalanermut aamma pequtit nassiunneqarnerinut akiliunneqarsinnaatitaaneq, Namminersorlutik Oqartussat aamma pineqartup kattuffiata isumaqatigiinniarsinnaatitaasup akornanni isumaqatigiissutit piffissami atorfiniffiusumi atuuttut naapertorlugit pissapput.
Najugaq
Atorfimmut atatillugu malittarisassat qaqugukkulluunniit atuuttut naapertorlugit sulisunut inissiamik pequsersorsimanngitsumik innersuussisoqarsinnaavoq. Inissamik innersuussisoqarsinnaanngilaq, pineqartoq atorfimmut atatillugu ineqareersuuppat, imaluunniit ineqarsimappat kommunep inaataanik Namminersorlutillu oqartussalluunniit inaataanik. Malittarisassat qaqugukkulluunniit atuuttut naapertorlugit inissiamut innersuussutigineqartumut akiliutit qularnaveeqqutillu akilerneqassapput. Atorfimmut atatillugu ini atorfeqarnermut tunngavoq atorfeqarnerullu unitsinnerani qimanneqassalluni.
Ineqarnermut akiliut aamma inissiap pitsaassusaa nikerarsinnaapput inissiap qanga sananeqarsimanera, piginnittua il.il apeqqutaallutik. Sulisutut ataavartumik initaarnissaq utaqqinarsinnaavoq, taamaattumik utaqqiisaagallartumik inissiisoqarsinnaasarpoq, tassunga ilanngullugu najugaqatigiiffinnut minnerusunut imaluunniit akunnittarfimmi inissianut inissiisoqarallarsinnaalluni, taakkulu akileraarusersorneqassallutik. Sulisunut inissiani utaqqiisaasumiklluunniit inigisani angisuunik uummasuuteqarsinnaaneq soorlu qimmeqarsinnaaneq qitsuuteqarsinnaanerluunniit periarfissaqanngilaq
Qinnuteqaatit, CV, ilinniarsimasanut pikkorissaatigisimasanullu uppernarsaatit kiisalu paasissutissat allat pisariaqarsinnaasut "qinnuteqaat nassiuguk" toorlugu nassiutikkit.
E-mail-ikkut qinnuteqaatinik tigusineq ajorpugut.
Naalakkersuisut pillugu
Pissanganartunik ujarlerpit sulinerillu aqqutigalugu ulluinnarni inuunermut sunniuteqarnissat kissaatigaajuk, taamaaliornikkullu siunissamik ilusilersueqataallutit? Taava Namminersorlutik Oqartussani sulinissaq ilinnut tulluuppoq. Suliamut tunngatillugu sulisutut piginnaasaqarnissaq, pissutsinut misissuilluarsinnaaneq kiisalu allanngornernut piareersimajuarneq assut pingaartitaraagut. Tamakku saniatigut ulluinnarni suliassannik ilusilersuisinnaanerit uippakajaalertannginnissallu pingaaruteqarput.
Namminersorlutik Oqartussat tassaapput, Qitiusumik Allattoqarfik 650-it missaanik sulisulik naalakkersuisoqarfinnut arfineq-pingasunut aqutsisoqarfinnullu arlalinnut agguataarsimasut. Katilluta inuit 2500-t sinnerlugit Namminersorlutik Oqartussanut atassuteqarpugut. Qitiusumik Allattoqarfiup suliassaraa Naalakkersuisut aalajangernissaannut tutsuiginartumik tunngavissinnissaat kiisalu politikkikkut aalajangikkat piviusunngortinnissaat.
Namminersorlutik Oqartussat pillugit annertunerusumik uani atuarsinnaavutit http://www.naalakkersuisut.gl/job