Tasiilami Prinsesse Margrethep Meeqqat angerlarsimaffia immikkoortortaqarfimmi pisortap tullianik sulisussarsiorpoq

Tasiilami Prinsesse Margrethep Meeqqat angerlarsimaffia immikkoortortaqarfimmi pisortap tullianik sulisussarsiorpoq

Meeqqat inissinneqarsimasut pillugit suliaqarusuppit allanngueqataarusuppillu? Taamaappat illerpiaq ujartorpatsigit.

Atorfik ulloq 1. juni 2024 imaluunniit isumaqatigiissuteqarnikkut inuttalerneqassaaq.

Prinsesse Margrethep Meeqqat Angerlarsimaffianut tunngasoq:

Prinsesse Margrethep Meeqqat angerlarsimaffia Tunumi Tasiilamiippoq ulloq unnuarlu paaqqinnittarfik Namminersorlutik Oqartussani Isumaginninnermut Aqutsisoqarfimmit aqunneqartoq. Ulloq Unnuarlu Inissitsiterinermullu Immikkoortortaqarfik akisussaasutut aqutsisuupput.

Prinsesse Margrethep Meeqqat angerlarsimaffia meeqqanut inuusuttunullu marlunnik immikkoortortaqarpoq aamma Nasippimi immikkoortortaq (satellit) tassungalu atasoq ulluunerani paaqqinnittarfik Qaaligaaq.

Immikkoortortat taaku marluk ima inuttalerneqarsimapput, eqimattammi mikisumi arfineq marluk eqimattamilu angisuumi arfineq marluk pingasunit 14-inut ukiullit. Amerlanerit Tasiilameersuupput eqqaanilu nunaqarfimmeersuullutik. Meeqqat inuuniarnikkut misigissutsikkullu ajornartorsiuteqarsinnaapput, isumassorneqarluarnissamik, ilusilersukkamik atugaqarnissamik inersimasumillu attaveqakulanissamik annertuumik pisariaqartitsisinnaapput.

Nasippi ulloq unnuarlu paaqqinnittarfiuvoq inersimasunut arfinilinnut timikkut tarnikkullu piginnaasakillisimasunut ilaannakortumik nammineersinnaasunut. Innarluutilinnut immikkoortortami (satellit) illersukkamik sannaveqarpoq, Qaaligaaq, tassanilu najugaqartut illersugaasumi akissarsiaqarlutik suliffeqarsinnaapput. Sannavimmi inuit akornanniinnissaq atuisullu sanalunnissaat pingaarnerpaavoq. 

Prinsesse Margrethep Meeqqat angerlarsimaffia nunaqarfimmi inuerunnikumi illuaraateqarpoq, angallateqarpoq, minihaliuteqarpoq qamuteralaateqarlunilu. Tamanna meeqqanut peqatigalugillu sammisassaqarnissamut periarfissaqarluartitsivoq

Tasiilaq pinngortitamiippoq kusanarluinnartumi aammalu piniarnermik aalisarnermillu pinngortitami ukioq naallugu misigisassaqartitsisarluni. Illoqarfimmi ilaatigut timersortarfeqarpoq timigissartarfilimmik, silami arsaattarfik nutaaq, sisoratarfik majuartaatilik, meeqqanut annernut sunngiffimmi ornittagaq, ulluunerani paaqqinnittarfik aammalu pisiniarfiit arlallit.

Atorfik pillugu:

Pisortap tullianut, pisortap taartissaanut atorfik neqeroorutigaarput. Pisortaq peqatigalugu ulloq unnuarlu paaqqinnittarfiup ingerlanissaanik qulakkeerinninneq akisussaaffigissavat.

Perorsaanermut tunngasut, sulisoqarnissamut akisussaaffik, aningaasaqarnikkut aqutsineq minnerunngitsumillu ulloq unnuarlu paaqqinnittarfimmi najugaqartut sunniuteqarfigissavatit. Pisortaq pisortallu tullia akunnerminni suliassat pisinnaasallu qanoq agguarneqassanersut isumaqatigiissutigiissapput.

Neqeroorutigaavut:

• Aqutsisoqatigiinnik, pisortat tulliinik immikkoortortani aqutsisunik allanik suleqateqarluarneq

• Suleqatigiit assigiinngisitaartunik piukkunnartunillu piginnaasaqarluartut

• Ingerlaatsinut nutaanut namminerlu ullup ingerlanerani sunniuteqarnissamut annertuumik sunniuteqarsinnaaneq

• Suliffeqarfik ineriartortitsinermik ilinniartitsinermillu pingaartitsisoq

• Perorsaanermut aqutsinermullu tunngasutigut sulinermi ineriartortitsineq

• Ulloq Unnuarlu Inissitsiterinermullu Immikkoortortaqarfimmik aqutsisuusunik oqaloqateqarneq

• Sullivigisami pisortarisamik qaninnerpaamik suleqateqarneq.

• Sulianut tunngasutigut isumasioqateqartarneq kiisalu pisortanik allanik isumasiuisarnermik aaqqissuussineq

• Pisortat ukiumoortumik isumasioqatigiinneranni ataatsimeersuarnerannilu peqataasarneq

Kissaatigaarput:

• perorsaasutut ilinniarsimasutit, ajornanngippat aqutsinermut allaffissornermullu tunngasunik misilittagaqartutit.

• patajaattuusutit, akuersaartuusutit, ersarittuusutit, tusarnaartuusutit, akaarinnittuusutit qanilliuminartuullutillu

• sulisunik sulianut inummullu atatillugu ajornartorsiutit pillugit siunersiuisinnaasutit oqaloqateqarsinnaasutillu

• tamakkiisumik isiginnillaqqissuusutit aalajangiinissamut merserisaqanngitsutit kiisalu akisussaaffimmik tigusisinnaasutit.

• utaqqisinnaassuseqartutit suliatigut inuttullu unammilligassanut qununngitsutit.

• Sullivimmi kulturikkut assigiinngisitaarfiusumi sulisinnaasoq qununngitsorlu.

• Kalaallisut danskisullu marluinnik oqaaseqartuuneq oqalutseqarluniluunniit sulineq misilereersimagaanni iluaqutaasinnaavoq

• namminersorlutit sulisinnaasutit taamalu pisussaaffeqarluni suleqatigiinnermut suleqataasinnaasutit.

Pikkorissarnernut assigisaanullu kiisalu tammarsimaarnermut peqataasinnaanermut atatillugu Tasiilap pigisaani avataanilu angalasoqarsinnaavoq.

Akissarsiat atorfininnermilu atugassarititaasut

Akissarsiat atorfininnermilu atugassarititaasut, tassunga ilanngullugit atorfinitsitaanermi soraarnermilu angalanissamut akiliunneqarnissamut pisattallu nassiunneqarnerannut Kalaallit Nunaanni Namminersorlutik Oqartussat kattuffiullu isumaqatigiinniarsinnaatitaasup attuumassuteqarfigisap akornanni isumaqatigiissutaasut atorfininnerup nalaani atuuttut naapertorlugit ingerlanneqassapput.

Inissiaq

Atorfininnermi malittarisassat qaqugukkulluunniit atuuttut naapertorlugit sulisunut inissiamik pequsersorsimanngitsumik innersuussisoqarsinnaavoq. Qinnuteqartut atorfitsik aqqutigalugu ineqartinneqareersut imaluunniit kommunimiit Namminersorlutik Oqartussanilluunniit pigineqartunik ineqartut inissaqartinneqarsinnaanngillat. Malittarisassat qaqugukkulluunniit atuuttut naapertorlugit inissiamut innersuussutigineqartumut akiliutit qularnaveeqqutillu akilerneqassapput. Atorfimmut atatillugu ini atorfeqarnermut tunngavoq atorfeqarnerullu unitsinnerani qimanneqassalluni.

Ineqarnermut akiliut aamma inissiap pitsaassusia nikerarsinnaapput inissiap qanga sananeqarsimanera, piginnittua il.il. apeqqutaallutik. Sulisutut ataavartumik initaarnissaq utaqqinarsinnaavoq, taamaammat utaqqiisaasumik inissiisoqarsinnaasarpoq, matumani aamma najugaqatigiiffiit minnerusut imaluunniit akunnittarfinni inissiat pineqarput, taakkulu akileraarusersorneqassallutik. Sulisunut- imaluunniit utaqqiisaasumik inigisami angisuunik qimminik qitsunnilluunniit uumasuuteqaqqusaanngilaq.

Paasissutissat amerlanerusut

Atorfik paasisaqarfiginerorusukkukku forstander Prinsesse Margrethes Børnehjem-mit Olga Maratse attaveqarfigisinnaavat – mail: pmbktaforstander@outlook.dk tlf. . +299 98 35 10.

Namminersorlutik Oqartussat Kalaallillu Nunaat pillugit paasisaqarnerorusukkuit, ugguuna paasissutissat allat www.naalakkersuisut.gl, ataani Atorfiit atuarsinnaavatit.

Naalakkersuisut pillugu

Pissanganartunik ujarlerpit sulinerillu aqqutigalugu ulluinnarni inuunermut sunniuteqarnissat kissaatigaajuk, taamaaliornikkullu siunissamik ilusilersueqataallutit? Taava Namminersorlutik Oqartussani sulinissaq ilinnut tulluuppoq. Suliamut tunngatillugu sulisutut piginnaasaqarnissaq, pissutsinut misissuilluarsinnaaneq kiisalu allanngornernut piareersimajuarneq assut pingaartitaraagut. Tamakku saniatigut ulluinnarni suliassannik ilusilersuisinnaanerit uippakajaalertannginnissallu pingaaruteqarput.

Namminersorlutik Oqartussat tassaapput, Qitiusumik Allattoqarfik 650-it missaanik sulisulik naalakkersuisoqarfinnut arfineq-pingasunut aqutsisoqarfinnullu arlalinnut agguataarsimasut. Katilluta inuit 2500-t sinnerlugit Namminersorlutik Oqartussanut atassuteqarpugut. Qitiusumik Allattoqarfiup suliassaraa Naalakkersuisut aalajangernissaannut tutsuiginartumik tunngavissinnissaat kiisalu politikkikkut aalajangikkat piviusunngortinnissaat.

Namminersorlutik Oqartussat pillugit annertunerusumik uani atuarsinnaavutit http://www.naalakkersuisut.gl/job

Qinnuteqaat nassiuguk