Studieadjunkt, adjunkt imaluunniit lektor Peqqissaanermik ilinniartitaanermut Ilisimatusarfimmi Peqqissutsimut Pinngortitamullu Institutti
Ilisimatusarfimmi ilinniartitsisut ilisimatusartullu atorfiisa aaqqissugaanerat pillugu isumaqatigiissut" 1. november 2010-meersumut naleqqiussinikkut studieadjunktimik, adjunktimik imaluunniit lektorimik 2024-mi oktobarip aallaqqaataani imaluunniit isumaqatigiissuteqarnikkut sulilertussamik ujarlerpugut.
Suliassat
Peqqissaasutut ilinniakkap fagiani teorii periutsimilu kiisalu ilisimasanik suliassaqarfinni allani ilinniartitsineq.
Suliassanik allaaserinninnermi aamma projektiliornermi ilitsersuineq.
Suliffinnik misiliiffiusunik aamma ilinniartunik suliffimmik misiliisunik suleqateqarneq.
Ilinniartitsinermut atatillugu pilersaarusiornernik ineriartortitsinernillu suliassat.
Aningaasaateqarfinnut qinnuteqarnernut suliaqaqataaneq aamma/imaluunniit ilisimatuutut misissuinerni piusuni peqataaneq.
Ineriartortitsinermi ilisimatuutullu misissuinermi instituttip avatangiisaanik eqeersimaartumik ineriartortitseqataaneq aamma ikorfartuineq.
Qinnuteqartumut naatsorsuutigisavut
Tunngaviusumik ilinniakkani ilinniartitsinermik aamma ilitsersuisarnermik misilittagaqarneq iluaqutaassaaq.
Ilisimatuutut misissuinermik aamma ineriartortitsilluni suliaqarnermik misilittagaqarneq iluaqutaassaaq.
Napparsimasunut peqqissaasutut misilittagaqarneq.
Naleqquttumik kandidatitut, masteritut imaluunniit ph.d.-tut ilinniagaqarsimaneq.
Kalaallit Nunaanni periarfissanik nukittuffinnillu qitiutitsisumik ilinniakkamut periuseqarneq.
Kalaallit Nunaanni inuusuttunut peqqinnissaqarfimmullu toraagaqarluni iluatsitsilluarfiusumik ilinniakkap ilusilersorneqarneranut tapersiineq.
Suliffiup ilinniarfiullu avatangiisiisa pitsaasuuginnarnissaanut tapersiisussamik eqeersimaartumik tunniusimasumillu kinaassuseqarneq.
Neqeroorutigaagut
Suliatigut ilinniartitsinerullu iluani unammillernartut ilikkagaqarfiusartut aamma avatangiisimi arlalinnik kultureqarfiusumi piginnaanngorsaaneq.
Sulisut ilinniartullu atugarissaarnissaannik pingaartitsiviusumi suliffimmi avatangiisit pitsaasut.
Suleqatit kajumissuseqartut, qanimut suleqatigiittartut akunnerminnilu avitseqatigiillutillu tapersersoqatigiittartut.
Suliatigut ilinniartitsinerullu iluani ineriartornissamut periarfissat.
Suliassanut annertuumik sunniuteqarsinnaalluni namminersorluni sulineq.
Qinnuteqaat:
Kalaallit Nunaanni sulisinnaatitaanissamut qinnuteqaatip immersorneqarsimasup atorfininnissamut qinnuteqaammut ilanngunneqarnissaa piumasarineqarpoq. Sulisinnaatitaanissamut qinnuteqaammut immersugassaq nittartakkami uani nassaarineqarsinnaavoq Autorisation (nun.gl)
Atorfininnissamut qinnuteqaat, allaganngorlugu qinnuteqaatip saniatigut, ukuninnga imaqassaaq:
Ilanngussaq 1: Curriculum Vitae saqqummersissimasat allattorsimaffiat ilaatigut ilanngullugu.
Ilanngussaq 2: Bacheloritut kandidatitullu, masteritut imaluunniit ph.d.-tut ilinniakkamik naammassinnissimanernut uppernarsaatit.
Ilanngussaq 3: Ilanngussat allat naleqqussinnaasut
Naliliisarneq atorfinitsitsisarnerlu, adjunktinut lektorinullu atorfinnut
Qinnuteqartut nalilerneqarnerat malittarisassat atuuttut naapertorlugit naliliisartunit ilisimasalinnit ingerlanneqartarpoq. Qinnuteqartut piffissap qinnuteqarfiusup naareernerani naliliisartut inuttalersornerinik ilisimatinneqassapput. Qinnuteqaatit takkussuuttut naliliisartoqatigiinnit misissorneqassapput, tamanna pereerpat taakkua Instituttimi aqutsisumut innersuusiussallutik.
Studieadjunktitut atorfeqartitaaneq ukiunik 6-nik sivisussuseqarpoq, tamatumalu kingorna suli ukiut marluk angullugit sivitsorneqarsinnaalluni. Tamatuma kingorna lektorit naliliinerat tunngavigalugu studielektoritut atorfittut aalajangersimasunngorlugu atorfinitsinneqarsinnaavoq.
Adjunktitut atorfeqartitaaneq nalinginnaasumik ukiunik 4-nik sivisussuseqarpoq, tamatumalu kingorna suli ukiut marluk angullugit sivitsorneqarsinnaalluni. Tamatuma kingorna lektorip naliliinera tunngavigalugu lektoritut atorfittut aalajangersimasunngorlugu atorfinitsinneqarsinnaavoq.
Lektoritut atorfinitsitaaneq pisinnaavoq atorfininnissaq sioqqullugu naliliilluartoqarpat imaluunniit qinnuteqartoq piffimmi allami sammisami lektorimit nalilerneqarsimappat.
Attavigisassat/ilisimatitsissutit:
Atorfik pillugu sukumiinerusunik paasisaqarusukkuit, tikilluaqquneqarputit Institutimi pisortaagallartoq Carsten Juul Jensen, oqarasuaat: +299 385906 attavigissallugu.
Ilisimatusarfik pillugu
Ilisimatusarfik 1987-imi pilersinneqarpoq. Maannakuugallartoq ilinniarneqarsinnaasut assigiinngitsut qulingiluaallutik taamatuttaaq Ilisimatusarfiup neqeroorutigai diplom-imut masterimullu saniatigut ilinniarnerit. Ilisimatusarfik issittumi universitetiuvoq nunarsuup ilaani pilertortumik ineriartorfiusumi nutaanik ilisimasaqalerfiusoq nutaaliorfiusorlu. Siulersuisut tassaapput Ilisimatusarfiup qullersai. Ulluinnarni aqutsineq rektorimit direktørimillu ingerlanneqarpoq. Instituttit sisamaasut Instituttini Siunnersuisoqatigiinnit siunnersorneqartumik siulersorneqarput.
Ilisimatusarfik sisamanik instituteqarpoq:
Ilinniartitsinermik Ilisimatusarfik
Inuiaqatigiilerinermik, Aningaasaqarnermik Tusagassiornermillu Ilisimatusarfik
Kulturimik, Oqaatsinik Oqaluttuarisaanermillu Ilisimatusarfik
Peqqissaanermik Pinngortitamillu Ilisimatusarfik
Allaffissornikkut aqutsisoqatigiiffik pillugu
Allaffissornikkut aqutsisoqatigiiffiup ilisimatusarfik tamakkerlugu sullitaraa. Ilisimatusarfiup direktørianit aqunneqarpoq. Allaffissornikkut aqutsisoqatigiiffik Ilinniarfissuarmi Ilimmarfimmilu immikkoortortaqarpoq. Immikkoortortat faginik ingerlatsiviusunik qanimut suleqateqartarput soorlu namminneq akunnerminni aamma taamaattartut. Allaffissornikkut aqutsisoqatigiiffimmi suliassat tassaapput: ilinniartut pillugit-, sulisut pillugit aqutsineq, Siulersuisuniik, Akademisk Rådimik kiisalu ilimmarfimmi sulisunik ilinniartunillu sullissineq. Allaffissornikkut aqutsisoqatigiiffiup Ilimmarfiup ilutaanik sanaartornermik nakkutiginninneq aamma ingerlataraa.
Aningaasarsiatigut atorfinitsitaanermilu atugassarititaasut
Akissarsiat atorfininnermilu atugassarititaasut, tassunga ilanngullugit atorfinitsitaanermi soraarnermilu angalanissamut akiliunneqarnissamut pisattallu nassiunneqarnerannut Kalaallit Nunaanni Namminersorlutik Oqartussat kattuffiullu isumaqatiginniarsinnaatitaasup attuumassuteqarfigisap akornanni isumaqatigiissutaasut atorfininnerup nalaani atuuttut naapertorlugit ingerlanneqassapput.
Najugaq
Atorfimmut atatillugu sulisunut inissiamik innersuussisoqarsinnaanngilaq. Qinnuteqartoq Namminersorlutik Oqartussani atorfeqarnermini sulisutut ineqartinneqareersimaguni sulisutut ineqarsinnaatitaanini tigummiinnarsinnaavaa. Atorfimmut atatillugu ini atorfeqarnermut tunngavoq, taamaalilluni atorfeqarnerup unitsinnerani qimanneqassalluni.
Qinnuteqaatit, CV, ilinniarsimasanut pikkorissaatigisimasanullu uppernarsaatit kiisalu paasissutissat allat pisariaqarsinnaasut "qinnuteqaat nassiuguk" toorlugu nassiutikkit.
E-mail-ikkut qinnuteqaatinik tigusineq ajorpugut.