Sanaartornermut immikkoortortaqarfimmi aqutsisoq

Namminersorlutik Oqartussat illuliornermut sanaartornermullu suliassaannik sunniuteqarluarnerulersitseqataarusuppit aammalu aningaasaqarnermik aqutsinermi ineriartortitseqataarusullutit?

Sanaartornermut immikkoortortaqarfik atituunik suliassaqarfeqarluni ulluinnarni ulapaarfiusarpoq, ilanngullugu Namminersorlutik Oqartussat Sanaartugassanut Iluarsagassanullu Aningaasaateqarfiata allaffissornikkut aqunneqarnera, tassungalu aningaasaqarnikkut immikkoortortaqarfimmi aqutsisumik sulisussarsiorpugut.

Sanaartornermut immikkoortortaqarfimmi suliassaqarfiit inissisimaffiillu assigiinngitsut isumagineqarput, ilanngullugu Namminersorlutik Oqartussat Sanaartugassanut Iluarsagassanullu Aningaasaateqarfiata allaffissornikkut aqunneqarnera, kiisalu Aningaasanut inatsimmi sanaartugassanut aningaasaliissutinik aqutsinissamut Prisme-mi modulimik ingerlaavartumik ineriartortitsineq. Tamatuma saniatigut immikkoortortaqarfimmi Namminersorlutik Oqartussat qitiusumi sanatitsisutut suliaqarnerat kiisalu illuutinik allanillu sanaartugassanik sanaartornissaq, ilusilersuinissaq aaqqissuussinissarlu pillugit aalajangersakkat, isumagineqarput. Tassani ilaatinneqarpoq illuliornerit immikkoortuini tamaginni ingerlanneqartarneri, kiisalu illuliortiternermut sanaartornermullu suliassani aningaasaqarneq taakkuninngalu aqutsineq. 

Immikkoortortaqarfik assigiinngisitaartorpassuarnik akisussaaffeqarfeqarpoq, taamaalillunilu atituunik suliassaqarfeqarluni, amerlanersai aningaasaqarnermut tunngassuteqarlutik. Aaqqiissutissat tapersiivigisartakkagut inuiaqatigiinnut innuttaasunullu, aamma nunatsinni ataatsimoortumik ineriartortitsinermut suliniutissat suliniuteqarnerillu ineriartortitsisussarpassuit piviusunngortinneqarnissaannut, pingaaruteqarput.

Naalakkersuisoqarfiup nammineq akisussaaffeqarfiisa saniatigut immikkoortortaqarfik illuliortiternermut sanaartornermullu suliassani aningaasaqarnikkut aqutsinermut atatillugu Naalakkersuisoqarfinni suliassaqarfinnut akisussaasuusuni suliassanut akisussaasuusunut ataqatigiissaarisarpoq ikiuuttarlunilu aammalu allaffissornikkut aqutsinerup taassuma ilaa annertooq isumagisaralugu.

Atorfik pillugu

Immikkoortortaqarfimmi aqutsisutut illuliornermut sanaartornermullu suliassaqarfimmi aningaasaqarnermi siuttuussaatit. Tamatuma kingunerisaanik Sanaartugassanut Iluarsagassanullu Aningaasaateqarfimmut naatsorsuuserineq ingerlatsinermilu aningaasaqarneq isumagisarissavat, kiisalu suliassani aningaasaqarnerup nakkutiginissaa aqunneqarneralu kiisalu suliassaqarfimmi sulisunut allanut nalunaarusiortarneq siunnersuisarnerlu, qulakkiissallugit. Tamatuma saniatigut aningaasaateqarfimmi aningaasaqarnerup tamarmiusup paasisimaarilersinnissaa isumagisarissavat, kiisalu ukiumoortumik aningaasanut inatsisip suliarineqarnerata ingerlanerani aammalu suliassaqarfimmi Nunap karsianut naatsorsuutinut ukiumoortumik naammassinnittarnermut, ikiuuttassallutit.

Tamatumunnga atatillugu suliassaqarfimmi aningaasaqarnikkut ingerlatsinermi suleriaasissanik nakkutiginninnermillu ineriartortitsineq isumagisarissavatit.

Maannakkorpiaq immikkoortortaqarfimmiipput allaffimmi pisortaq aammalu sulisut sisamat. Allaffimmi pisortaq Sanaartornermut immikkoortortaqarfimmut immikkoortortaqarfiup pisortaata ataaniippoq.

Qinnuteqartoq piukkunnartoq

Qinnuteqartoq piukkunnartoq allaffissornerup/aningaasaqarnerup iluanni ilinniarsimasuuvoq. Pisortani aamma/imaluunniit politikkikkut allaffissornikkut aqutsinerup iluanni misilittagaqarneq iluaqutaassaaq, kisianni piumasaqaataanngilaq.

• Prisme imaluunniit aningaasaqarnermi periaaseq taamaaqataa misilittagaqarfigaat ilisimasaqarfigalugu
• Excel-imi sulisinnaavutit
• cBrain F2 misilittagaqarfigigukku imaluunniit ilisimasaqarfigigukku iluaqutaassaaq
• Illuliornerup sanaartornerullu iluanni suliassami aningaasaqarnermut misilittagaqarneq imaluunniit ilisimasaqarneq iluaqutaassaaq
• Tulleriissaartumik periaaseqarlutit sulisarputit aammalu ilisimasassat paasilertorsinnaavatit aammalu najoqqutassat paasiuminartumik paasissutissiissutigisinnaallugit
• Anguniagaqallaqqissuuvutit – akisussaaffimmik tigusinissaq suliniuteqarnissarlu piumassuseqarfigalugu piginnaaneqarfigaat.
• Nammineerlutit sulisarputit, kisianni qaqugu immikkoortortaqarfimmi suleqatitit allat isumasioqatigissanerlugit aamma nalunagu.

Kalaallit oqaasii inuiaqatigiinnilu pissutsit ilisimasaqarfigigukkit annertuumik iluaqutaassaaq. 

Ilinniarsimasatigut qaffasissumik inissisimanerup saniatigut naatsorsuutigaarput inuttut arlalinnik piginnaasaqarfeqartutit, ilanngullugu atituumik paasisimaarinninnerup aammalu sukumiisortanik paasinnittarnerup akornanni oqimaaqatigiissitsisarlutit, namminersorneq ataatsimooqateqarnerlu akuleriissinneqarnerat iluaqutaasutut takusinnaagit, kiisalu oqaasissanik oqimaalutaallaqqissutit, oqaloqatikkuminartuusutit aammalu ullup suliffiusup ingerlanerani illaqataalluarsinnaasutit.

Neqeroorutigaagut

Sanaartornermut immikkoortortaqarfimmi sulineq avatangiisini pissanganartuni suliatigullu unammillernartuni ingerlanneqarpoq, sulinerup nuannarinera akisussaaffeqarnerlu angusaqarfiulluartumik ingiaqatigiilluarlutik, aammalu ineriartornissamut akisussaaffeqarnissaq suliatigullu ineriartoqqinnissaq periarfissaqarluarfiulluni.

• Suliffik nutaaliornermik nutaanillu eqqarsarnermik ukkatarinniffiusoq
• Naalakkersuisoqarfimmi politikkikkut aalajangiinissanut suliat ingerlaneri qanillugit suliffiusoq
• Tunniusimalluartumik suleqateqarluni suliffimmilu avatangiisit oqaloqatikkuminartut ammasullu
• Inuttut suliatigullu pissanganartunik unammilligassaqarfiusoq

Imminnut oqaluuteriaaseq persuarsiorfiunngitsumik ingerlasarpoq, aammalu ulluinnarni ulapaarfiusuni qiimanartumik isumagissaarneq malunnartarpoq, kisianni aamma sulinerup ilaqutariittullu inuunerup ataqatigiittussaanerat ataqqineqarluni.

Atorfininnissap ullua

Ulloq 1. qaammat imaluunniit erseqqinnerusumik isumaqatigiissuteqarneq malillugu.

Soqutiginnippit?

Apeqqutissaqaruit attaveqarfigisinnaavat Allaffimmi pisortaq Malene J. Kieler, malk@nanoq.gl

Aningaasarsiatigut atorfinitsitaanermilu atugassarititaasut

Akissarsiat atorfininnermilu atugassarititaasut, tassunga ilanngullugit atorfinitsitaanermi soraarnermilu angalanissamut akiliunneqarnissamut pisattallu nassiunneqarnerannut Kalaallit Nunaanni Namminersorlutik Oqartussat kattuffiullu isumaqatiginniarsinnaatitaasup attuumassuteqarfigisap akornanni isumaqatigiissutaasut atorfininnerup nalaani atuuttut naapertorlugit ingerlanneqassapput.

Najugaq

Atorfimmut atatillugu sulisunut inissiamik innersuussisoqarsinnaanngilaq. Qinnuteqartoq Namminersorlutik Oqartussani atorfeqarnermini sulisutut ineqartinneqareersimaguni sulisutut ineqarsinnaatitaanini tigummiinnarsinnaavaa. Atorfimmut atatillugu ini atorfeqarnermut tunngavoq, taamaalilluni atorfeqarnerup unitsinnerani qimanneqassalluni.

Qinnuteqaatit, CV, ilinniarsimasanut pikkorissaatigisimasanullu uppernarsaatit kiisalu paasissutissat allat pisariaqarsinnaasut "qinnuteqaat nassiuguk" toorlugu nassiutikkit.

E-mail-ikkut qinnuteqaatinik tigusineq ajorpugut.

Naalakkersuisut pillugu

Pissanganartunik ujarlerpit sulinerillu aqqutigalugu ulluinnarni inuunermut sunniuteqarnissat kissaatigaajuk, taamaaliornikkullu siunissamik ilusilersueqataallutit? Taava Namminersorlutik Oqartussani sulinissaq ilinnut tulluuppoq. Suliamut tunngatillugu sulisutut piginnaasaqarnissaq, pissutsinut misissuilluarsinnaaneq kiisalu allanngornernut piareersimajuarneq assut pingaartitaraagut. Tamakku saniatigut ulluinnarni suliassannik ilusilersuisinnaanerit uippakajaalertannginnissallu pingaaruteqarput.

Namminersorlutik Oqartussat tassaapput, Qitiusumik Allattoqarfik 650-it missaanik sulisulik naalakkersuisoqarfinnut arfineq-pingasunut aqutsisoqarfinnullu arlalinnut agguataarsimasut. Katilluta inuit 2500-t sinnerlugit Namminersorlutik Oqartussanut atassuteqarpugut. Qitiusumik Allattoqarfiup suliassaraa Naalakkersuisut aalajangernissaannut tutsuiginartumik tunngavissinnissaat kiisalu politikkikkut aalajangikkat piviusunngortinnissaat.

Namminersorlutik Oqartussat pillugit annertunerusumik uani atuarsinnaavutit http://www.naalakkersuisut.gl/job

Qinnuteqaat nassiuguk