Royal Arctic Line A/S Nuummi Sullitanut kiffartuussivimmi inniminniisarfimmilu suleqatigiinnut aqutsisussarsiorpoq

Sullisserusussuseqarpit? Inunnik ukkataqarpit, sulisunullu kaammattuisinnaallutit, aallussisuullutit isumassarsiortitsisinnaallutillu?

Taava illit Royal Arctic Linep Nuummi qullersaqarfiani sullitanut kiffartuussivimmi inniminniisarfimmilu suleqatigiinnut aqutsisussatut pisariaqartippatsigit. Immikkoortortaqarfimmi sulisut qulingiluat aqutsisuuffigilissavatit, illillu umiarsuaatileqatigiiffiup tuniniaanermut pisortaanut attaveqassaatit.

Sinerissami nassiussaleriviit saniatigut, Sullitanik kiffartuussivik inniminniisarfillu tassaapput Royal Arctic Linep sullitanik qanimut sullissivia. Immikkoortortaqarfiup pingaarnertut suliassarai sullitanut Nunatsinnilu umiarsualivinnut assartugassanik inniminniinerit, aammalu nunatsinnit nunaniillu avataaneersunit saaffiginninnerit akissuteqarfiginissaat, tassani soorunami sullitat aallaqqaataaniit naammassinissaannut assigiimmik kiffartuunneqarnissaat ukkatarineqarluni. 

Atorfik 

Suliassat arlallit sullitanik kiffartuussivimmit isumagineqartarput, taakkualu pingaarnertut akisussaaffigissavatit. Tuniniaanermut pisortap immikkoortortaqarfiillu allat suleqatigalugit ullumikkut kiffartuussinitsinni suliat malinnaatinnissaat pitsanngorsarnissaallu isumagissavat. Aammattaaq sulisutit ineriartortissavatit, kiffartuussinerup qaffasissumik pitsaassuseqarnissaa, sulisullu ataasiakkaat aamma suleqatigiittut anguniakkat naammassiumallugit suleqatigiinnut siunertaasut iluanni pitsaasumik atugaqartillugit siuariartortillugillu.

Pingaarnertut suliassat makkuupput:

· Immikkoortortaqarfik aqullugu ineriartortillugu ataavartumik ataatsimiittarnikkut sulisullu takutitsinerinik nalilersuinikkut

· Sullitanit saaffiginninnerit ajornakusoornerit akineqarnissaat

· Sullitanit nunatta avataaneersunit suleqatigisaniillu mailikkut saaffiginnissutit akineqarnissaannut akisussaaneq

· Ingerlatsinermi allannguisoqartillugu arlaannilluunniit pisariaqartitsisoqartillugu avammut saqqummiussinissamut akisussaaneq

· Akiligassanik D365-ikkut konteriineq

· Assarsugalerinermut aaqqissuussinerput atorlugu suliaqarneq

Qinnuteqartumut naatsorsuutigisagut

Suliatigut piginnaasat

· Aqutsinermik misilittagaqarneq

· Sullitanik kiffartuussinermik assigisaaniilluunniit misilittagaqarneq

· Aningaasaqarnermik paasisimasaqarneq

· IT-mik pitsaasunik piginnaaneqarneq – tassunga ilanngullugu Windows Office-pakke

· Oqaatsitigut pitsaasunik piginnaaneqarneq, kalaallisut, danskisut tuluttullu (oqalussinnaaneq allassinnaanerlu)

Inuttut piginnaasat

· Aqutsinermut piginnaaneqarluarneq – sulisunut kaammattuisinnaaneq, isumassarsiortitsisinnaaneq ineriartortitsisinnaanerlu ilanngullugit

· Akisussaassuseqarneq, iliuuseqarsinnaassuseqarneq nammineersinnaassuseqarneq aammalu suleqatigiittut naammassisaqarsinnaassuseqarneq

· Sullitat eqqarsaatigisinnaavatit kiffartuussisinnaassuseqarlutillu

· Ammasuuvutit, kissalaartuullutit, kajumissuseqarlutit paasinnissinnaassuseqarlutillu

· Piffissami ulapaarfiusumi ataatsimut isiginnissinnaassuseqassaatit allannguuteqarnissamullu piareersimasuussallutit

· Naammassinnittarnissamut aaqqiissuteqartarnissamullu immikkoortortaqarfiup umiarsuaatileqatigiiffiullu anguniagaanut angusaqarusussuseqassaatit

Neqeroorutigaavut 

Suliffeqarfik atugarissaarnissamik ataatsimooqatigiinnermillu pingaartitsisoq, sulinermut ilinniarnissamullu avatangiisit pitsaasut pilersikkumallugit. Aaqqissuussaaneq uagut piinnarata illilli iluatsitsilluarnissannik tunngaveqarluni ingerlatsisoq piginnaasannillu ineriartortitseqataarusuttoq.

Tamatuma saniatigut neqeroorutigaagut akissarsiat ajunngitsorsiassallu unammillersinnaalluartut, misilittakkannut piginnaasannullu naapertuuttut.

Paasissutissat sukumiinerusut 

Paasissutissat sukumiinerusut pissarsiarineqarsinnaapput tuniniaanermut pisortap, John Aage Nielsenip, oqarasuaatikkut +299 34 91 13-imut saaffigineratigut.

Atorfininneq: Sukkanerpaamik, qinnuteqartorli uagutsinnut tulluarneq utaqqisinnaavarput. Qinnuteqarfissaq kingulleq: maajip 22-iani 2024
Qinnuteqaatit: ingerlaavartumik suliarineqassapput
Oqaloqatiginninnerit: Nuummi ingerlaavartumik ingerlanneqassapput

Atorfik una qinnuteqarfigiuk