Pisartakkanik Isumaginniffimmi, TNI/TNI Basis-imi ilinniartumik pissarsiorpoq
Kommuneqarfik Sermersooq pisartakkanut immikkoortortami ataatsimik ilinniartussarsiorpoq 1. august 2024 aallarnerfigalugu isumaqatigiissuteqarnikkulluunniit sulilertussamik.
Pisartakkanik isumaginnittoqarfimmit utoqqalinermi utoqqalinersiat - siusinaartumik pensionisiat, erninermut atatillugu sulinngiffeqarnermut aamma ineqarnermut tapiissutit pillugit inatsit atuuttoq malillugu aamma sullissisup/isumaginninnermi siunnersortip aalajangiinerani naliliinerit aalajangersimasut tunuliaqutaralugit sullissinissaq qulakkeerneqassaaq.
Pisartakkanik isumaginnittoqarfik arlalissuarnik suliassaqartarpoq aammalu kommunip iluaniittunik avataaniittunillu arlalissuarnik suleqateqartarluni
Nuummi immikkoortortaq maanna qulaaluat missaannik sulisoqarpoq, tallimanullu agguataakkanik suleqatigiiaaqarpoq – ineqarnermut tapiissutit pillugit suleqatigiit, utoqqalinersiallit pillugit suleqatigiit, erninermut atatillugu sulinngiffeqarnermut, akiligassat pillugit, controllerillu suleqatigiit.
Sungiusarluni suliffiusussaq tamakkerlugu suliffiuvoq, pisartakkanik suliassaqarfimmi immikkoortortami aqutsisoq qaninnertut aqutsisoralugu.
Atorfiup imai:
Pisartakkanut immikkoortortami allaffimmi aningaasaqarnermut suleqataasussamik ilinniartumik ikiortissarsiorpugut assigiinngitsunik suliaqartussamik, ilaatigut makkuninnga:
∙ Siunnersuinermik ilitsersuinermillu sullissinerit makkunani:
∙ Erninermut atatillugu pisartakkanik qinnuteqaatit
∙ Ineqarnermut tapiissutinik qinnuteqaatit
∙ Soraarnerussutisianik/pisartakkanik qinnuteqaatit/tunniussinerit
∙ Oqarasuaatikkut saaffiginnittut
∙ Suliassat allat suleqatigiit suliassaannut tunngasut
Suliassat oqartussaaffeqarfiup sinnerani sulisut qanimut suleqatigalugit pisarput aamma sullissisut kiisalu avataaniittut suleqativut suleqatigalugit pisarlutik.
Qinnuteqartumut naatsorsuutigisat:
TNI/TNI Basisimi ilinniartuunissat naatsorsuutigaarput
Tamatuma saniatigut pingaartipparput, illit:
∙ Ineriartortitsinermik sullissilluarnermillu pingaartitsisuusutit
∙ Suleqatikkuminartoq
∙ Isumalluartuullutillu ilakkuminartuusutit
∙ Aalajaatsuunissaq, pitsaassutsimik ilisimasaqarluartoq immikkuualuttunillu maluginiaasinnaasoq
∙ Allattariarsornermi oqaluttariarsornermilu ersarissumik paatsuugassaanngitsumillu attaveqartartuuvutit.
∙ Namminersorluni sulineq akisussaassutsinillu ilisimaarinnilluartuunissat
∙ Suliassat agguataarneqarnerisa ingerlaavartumik allanngortiterneqarneranni eqaatsumik periaaseqartoq
∙ Ulloq ulapaarfiugaluarpalluunniit ukkatarinnillutit aaqqissuulluakkamillu suliaqarsinnaasoq
∙ Siammasissumik suleqateqarluarsinnaasoq.
∙ Qinnuteqartut marluinnik oqaasillit (kal/dk) atorfinitsinnissaat orniginartinneqarput.
∙ Suliassat takkussuuttut nalinginnaasut
Uagut neqeroorutigaavut:
Misiliilluni sulineq suleqatitsialaat suleqatigalugit aammalu atorfiup imarisaanik sunniuteqarnissamut periarfissalik aaqqissuussaanermi ineriartortumi allanngorartumilu sunniuteqaqataanissaq. Tamakkununnga ilanngullugu qanimut siunersiueqatigiiffimmi suleqatigiilluni suliffik avatangiiseqarnissaa aamma suliniuteqarnissap nutaaliornissallu inissaqartuarnissai anguniartuarparput.
Annertunerusumik paasisaqarusukkuit:
Atorfik ilinnut soqutiginaateqarpat atorfik pillugu tassungalu tunngasumik suliassat itinerusumik paasisaqarfigerusukkukkit uunga saaffiginninnissannut tikilluaqqusaavutit: Immikkoortortami aqutsisuugallartoq Margrethe Møller tlf. +299 367600 imaluunniit e-mail: marm@sermersooq.gl
Pineqaatissinneqarsimannginnermut uppernarsaat:
Atorfik una pineqaatissinneqarsimannginnermut uppernarsaammik pissarsinissamut inatsit naapertorlugu pisussaatitaaffeqarpoq. Inatsit naapertorlugu kommune pineqaatissinneqarsimannginnermut uppernarsaammik pissarsippat atorfinitsitsineq aatsaat pisinnaavoq. Taamaammat maluginiaqqussavarput atorfininnissamut isumaqatigiissusiortoqarsinnaammat kommune pineqaatissinneqarsimannginnermut uppernarsaammik Politiinit aatsaat pissarsereerpat.
Akissaatinut atorfinitsitaanermullu tunngatillugu atugassarititaasut:Akissarsiaqarnermut atorfinitsitaanermullu atugassarititaasut Namminersorlutik Oqartussani isumaqatigiissut atuuttoq, atorfininnerup nalaani Namminersorlutik Oqartussat kattuffiullu pineqartup isumaqatigiinniarsinnaatitaasup akornanni isumaqatigiissutit atuuttut naapertorlugit.Atorfinititsineq qaammatini pingasuni misiliutitaqassaaq.
Inissaq:
Atorfininnermut atatillugu inissiamik innersuussisoqarsinnaanngilaq.
Qinnuteqaat:
Qinnuteqaat qulequtserlugu Atorfiup ilisarnaataa 539-24-mik, ilinniagaqarsimanermut uppernarsaat siornatigullu sulisimanermut uppernarsaatit qinnuteqaammut ilanngullugit, qinnuteqaateqarnissamut piffissarititaasup qaangiutinnginnerani qinnuteqartoqassaaq.
Imatut qinnuteqaateqassaatit:
Atorfik qinnuteqarfigerusutat takugukku, uagutsinnut qinnuteqaammik nassiutissavat nittartagarput aqqutigalugu. Atorfimmut qinnuteqarfiginiakkannut link-i, atorfimmi inuttassarsiorneqartumi takusinnaavat.
Malugiuk:
Qinnuteqaatit pappilissatigut mailikkulluunniit tiguneq ajorpagut, inussiarnersumik qinnuteqaatit nittartagaq aqqutigalugu nassiuguk.
Qinnuteqarnissamut killissarititaasoq: juunip 17.-at, 2024