Marlunnik ilinniartitsisussarsiorpugut Perorsaanermik Ilinniarfimmut / Socialpædagogisk Seminarium (PI/SPS) Ilulissani
Pissanganartunik unammilligassanik avatangiisinillu nutaanik ilisimasassarsiorusukkuit, una takujuk.
Perorsaanermik Ilinniarfimmi Ilulissaniittumi ilinniartitsisutut atorfiit marluk neqeroorutigaagut. Tassani pikkorissarnernik ingerlatsinernik, inunnik isumaginninnermi perorsaaasutut sammivilimmik ilinniarnerit, inunnik isumaginninnerup iluani siunnersuinermi ikiortitut ilinniarnerit ingerlataralutigit.
Perorsaanermi Ilinniarfimmi 60-it missaanni sulisoqarpugut inussiarnersumi, suliffimmik ilikkariartuinnarnissamillu siunertaqarluni avatangiisilimmi.
Perorsaanermik Ilinniarfik 300 missaaniittunik ilinniartoqarpoq ilinniakkanut arfineq-pingasunut agguaqqasunut: Ulluunerani meeqqanik sullissinermi ikiortinngorniarneq, isumaginninnermi ikiortinngorniarneq, socialassistentitut ilinniarneq, perorsaasutut sammivilimmik bacheloritut ilinniarneq, pædagogassistentitut inuussutissarsiummik ilinniarneq, siunnersuinermi ikiortitut ilinniagaq, inulerinermi siunnersorti aammalu immikkut pisariaqartitsisunut sammivilimmi perorsaanilerinermi ilinniarneq.
Perorsaanermi Ilinniarfiup Kalaallit Nunaat tamakkerlugu makkunannga sullillugu ingerlatsisarpoq:
Perorsaanermi sulisunik piukkunnartunik ilinniartitsineq
Pikkorissaaneq, ilinniaqqinnerit ilinniareernerullu kingorna qaffassarnerit inunnik isumaginninnermi siunnersuinermi immikkullu pisariaqartitsisunut sammivilimmik perorsaanilerinermi ilinniarneq
Ineriartortitsinissamut isumassarsisitsiniarneq perorsaanermi iluani sulinermi ilinniarnermilu.
Ilinniartitsisunik ujaasivugut, ilimanarluni Socialassistentinngorniartuni (SAU) aammalu pædagogassistentinngorniartuni (DPAU) ilinniartitsinerusussanik.
Socialassistentinngorniartuni (SAU) danskisoornermik ilinniartitsisarsinnaassaatit.
Ilinniarneq qaammatini qulingiluani ingerlanneqartarpoq Isumaginninnermi Ikiortitut ilinniakkamiik Perorsaasutut Sammivilimmik Bacheloritut Ilinnialernissamut aqqutissaalluni.
Danskisut ilinniartitsinerup saniatigut inunnik isumaginninnerup iluani aammalu perorsaanilerinerup iluani akuleriissinnaasunik ilinniartitsisinnaanissaq naatsorsuutigineqassaaq.
Pædagogassistentinngorniartuni (DPAU) inunnik isumaginninnerup iluani perorsaanilerinerullu iluani Perorsaanermi Ilinniarnermi ilinniartitsisinnaanissaq naatsorsuutigineqassaaq. Ilinniarneq ukiuni marlunni ingerlanneqartarpoq ilinniartitsinerillu atuagarsoriarnernik aggersagaanikkut ingerlanneqartarluni, tamannalu sapaatip akunnerini marlunni pingasunilluunniit sivisussuseqartarpoq. Atuagarsoreernerup kingorna ilinniartut suliffimmut suliartoqqittarput imaluunniit sungiusarluni ilinniarfimminnut (praktikplads) utertarlutik.
Tassani ilinniakkaminnik naammassinnittut Perorsaasutut Sammivilimmik Bacheloritut Ilinniartunngussagaluarunik semesterini siullerni sisamani alluisinnaatitaapput.
Perorsaanermi tarnip pissusaanik ilisimasaqarluaruit, nalinginnaasumik perorsaanilerinermik ilisimasaqarluaruit imaluunniit ilinniartitsissutissat tamaasa ilinniartitsissutigisinnaagukkit, tassaavutit ujartugarput.
Tamatigoortumik, suleqatigiikkusussusermik pigisalimmik minnerunngitsumillu ineriartortitserusuttumik ilinniartitsisussamik ujaasivugut. Perorsaanerup iluani ilinniartitserusulluinnartumik aammalu suleqatigiilluarusuttumik suleqatissarsiorpugut, avatangiisiminut suliaminullu nuannersussamik isigisumikm unammillernartut suleqatigiinnikkut qaangertarmata.
Perorsaanermi Ilinniarfimmi ilinniartitsisoqatigiinnut ilanngutissaatit ilinniartitsinerup ingerlanerani ineriartorneranilu peqataaffigisinnaalerlugu, Perorsaanermi Ilinniarfiup siunertarisaa naapertorlugu Nunatsinni perorsaanerup iluani suleriutsimut peqataasitsineq sunneeqataaffigalugulu.
Iluaqutaasinnaavoq Masterisut imalunniit kandidatitut ilinniarsimasuuneq, Perorsaanermi Ilinniarfimmi ilinniarneqarsinnaasut tamakkerlugit ilinniartitsisinnaarusukkaanni.
Naatsorsuutigaarput perorsaanilerinerup iluani sulinermik misilittagarnissat imaluunniit inersimasunik ilinniartitsinermik misilittagaqartuunikuunissat.
Inuiaqatigiinni assigiinngissusermik isumaginninnermilu pissutsinik nalunngisaqartuussaatit
Namminersorlutit sulisinnassaatit aammali suleqatitit suleqatigilluarlugit sulisinnaassallutit, nammineq atuartitsinissaq pillugu. Taamatullu aamma ataqatigiittumik ineriartorfiusumillu ilinniarneq tamaat isigalugu aammalu ilinniakkat allat tamaasa isigalugit.
Suleqatinnut akuersaartumik periuseqassaatit, tatiginassuseq akisussaassuseqarnerlu suleqatitut ilisarnaatigalugu.
Arlariinnik oqaaseqartuussaatit annermik kalaallisut danskisullu oqaaseqarlutit oqaatsillu arlallit iluini ulluinnarni sulinermi ingerlaarsinnaassallutit.
Atorfiit kingusinnerpaamik augustip aallaqqaataani 2024-mi inuttalerneqarnissaat kissaataavoq.
Qinnuteqarfissaq kingulleq tassaavoq ulloq 19. juli 2024 ullaakkut arfineq pingasunut.
Atorfinittussanik oqaloqateqarnissaq naatsorsuutigineqassaaq sap. ak. 30 immaqaluunnit 31.
Annertunerusumik paasisaqarnerorusukkuit oqarasuaatikkut +299 38 35 50 atorlugu Teamleder Laila Thorsen imaluunniit Pisortap tullia Marianne Nissen attavigineqarsinnaapput. Emailikkut aamma attavigineqarsinnaallutik uunga allalluni allaffik@pi.sps.gl
Perorsaanermi Ilinniarfik pillugu paasisaqarnerorusukkuit nittartagarput alakkartersinnaavat: www.pi.sps.gl
Aningaasarsiatigut atorfinitsitaanermilu atugassarititaasut
Akissarsiat atorfininnermilu atugassarititaasut, tassunga ilanngullugit atorfinitsitaanermi soraarnermilu angalanissamut akiliunneqarnissamut pisattallu nassiunneqarnerannut Kalaallit Nunaanni Namminersorlutik Oqartussat kattuffiullu isumaqatiginniarsinnaatitaasup attuumassuteqarfigisap akornanni isumaqatigiissutaasut atorfininnerup nalaani atuuttut naapertorlugit ingerlanneqassapput.
Najugaq
Atorfimmut atatillugu malittarisassat qaqugukkulluunniit atuuttut naapertorlugit sulisunut inissiamik pequsersorsimanngitsumik innersuussisoqarsinnaavoq. Inissamik innersuussisoqarsinnaanngilaq, pineqartoq atorfimmut atatillugu ineqareersuuppat, imaluunniit ineqarsimappat kommunep inaataanik Namminersorlutillu oqartussalluunniit inaataanik. Malittarisassat qaqugukkulluunniit atuuttut naapertorlugit inissiamut innersuussutigineqartumut akiliutit qularnaveeqqutillu akilerneqassapput. Atorfimmut atatillugu ini atorfeqarnermut tunngavoq atorfeqarnerullu unitsinnerani qimanneqassalluni.
Ineqarnermut akiliut aamma inissiap pitsaassusaa nikerarsinnaapput inissiap qanga sananeqarsimanera, piginnittua il.il apeqqutaallutik. Sulisutut ataavartumik initaarnissaq utaqqinarsinnaavoq, taamaattumik utaqqiisaagallartumik inissiisoqarsinnaasarpoq, tassunga ilanngullugu najugaqatigiiffinnut minnerusunut imaluunniit akunnittarfimmi inissianut inissiisoqarallarsinnaalluni, taakkulu akileraarusersorneqassallutik. Sulisunut inissiani utaqqiisaasumiklluunniit inigisani angisuunik uummasuuteqarsinnaaneq soorlu qimmeqarsinnaaneq qitsuuteqarsinnaanerluunniit periarfissaqanngilaq
Qinnuteqaatit, CV, ilinniarsimasanut pikkorissaatigisimasanullu uppernarsaatit kiisalu paasissutissat allat pisariaqarsinnaasut "qinnuteqaat nassiuguk" toorlugu nassiutikkit.
E-mail-ikkut qinnuteqaatinik tigusineq ajorpugut.