Ineqarnermut Attaveqaasersuutinullu Naalakkersuisoqarfik Aqutsinermut Allattoqarfimmi fuldmægtig-imik/afdelingsleder-imik pissarsiorpoq

Aqutsinermut Allattoqarfimmi suleqatigiinni sulisumik amigaateqarpoq. Fuldmægtig-iuit/afdelingsleder-iuit immikkoortunik tappiffeqartoq ataqatigiissaarillaqqillutillu? Politikkikkut allaffissornikkullu kissaatit tusarnaarsinnaavigit, aammalu aaqqiissutissanik atorsinnaasunik pilersitsiniarnermi suleqataasinnaavit? Suleqatitit qaffasissumik kiffartuussiniarnerini aammalu Naalakkersuisoqarfimmi allakkianut kukkunersiuinernullu tunngasunik ikiorusuppigit? Taamaappat illiuvoq Naalakkersuisoqarfiup Aqutsinermut Allattoqarfiani atorfissaqartitarput.

2024-imi juuli aallaqqaataani imaluunniit isumaqatigiissuteqarnikkut piaartumik atorfinitsitsisoqassaaq.

Atorfik pillugu

Aqutsinermut Allattoqarfik Naalakkersuisoqarfimmi immikkoortortaqarfiit sisamaasut ilagaat, tassanilu ineqarneq, sanatitsineq, sanaartornermut oqartussaqarfik attaveqaasersuutinullu suliassat isumagineqarput. Naalakkersuisoqarfimmit sulisut 40-t missaanniipput. Immikkoortortaqarfik arfineq-marlunnik sulisoqarpoq naalakkersuisoqarfiullu politikkikkut allaffissornikkullu qullersatut aqutsisuinut sulisoqarfiulluni. Immikkoortortaqarfimmi suliaasartuni assersuutitut taaneqarsinnaasut tassaapput naalakkersuisoqarfimmut Naalakkersuisumullu saaffiginnissutinik ataqatigiissaarineq isumaginninnerlu, Naalakkersuisunut Inatsisartunullu suliassat taakkunanngaanniillu suliat, allakkat, tusarniaanerit, nutserinerit, pitsaassutsinik qulakkeerinninnerit, allagaataasivimmut nalunaarsuinerit, workshopit ilanngullugit suliniutinik aqutsineq ineriartortitsinermilu suliat, illup iluani malitassanik saqqummiineq suleqatinullu ilinniartitsinerit, malittarisassat, assersuutigalugulu sulianik suliaqarnermi, pisiniarnermi, kiffartuussinermi, sulisunut aaqqissuussinermi il.il. suleriaatsit ilitsersuutillu.

Fuldmægtig-imik/afdelingsleder-imik immikkoortortaqarfimmi sulisut aamma naalakkersuisoqarfiup aqutsisui suleqatigalugit Naalakkersuisoqarfiup suliassaanik ataqatigiissaarinermi aamma Naalakkersuisoqarfimmi sulisut allat qanimut suleqatigalugit Naalakkersuisumut kiffartuussinermi qitiusumik suliassanik isumaginnissinnaasumik ujarlerpugut.

Naatsorsuutigaarput tullinguuttuni allassimasut amerlanersaat pikkoriffigalugillu piginnaasaqarsigissagitit:

• Atuagarsornikkut attuumassutilimmik ilinniagaqassasutit.
• Oqalunnikkut taamatullu allakkatigut attaveqaqateqarnissamut piginnaaneqarluassasutit, aammalu pitsaassutsimik qulakkeerisarnermut nukittussuseqassasutit mikisualunnullu tappissuseqassasutit.
• Allakkatigut taamatullu oqalunnikkut kalaallisut danskisullu qaffasissunik piginnaaneqassasutit, tuluttullu minnerpaamik oqaloqateqarsinnaanissamik piginnaaneqassasutit.
• Aaqqissuussaalluartumik, pitsaasumik sulisinnaassasutit siulliullutillu suliniuteqarsinnaassasutit.
• Ataqatigiissaarinermut suleqateqarnermullu piginnaaneqarluassasutit, taamatullu namminersorlutit sulisinnaassuseqassasutit, aammalu ulapaarnerup naligigaluarpaguluunniit eqaatsumik aaqqiisinnaanermik takutitsisinnaassuseqassasutit.
• Ilikkartikkuminartuussasutit, kisiannili aamma nammineq misiliisarlutit ilinniarsinnaassasutit.
• Ilakkuminartuusutit suleqatikkuminartuussasutillu aammalu torersumik aaqqiissutissanillu inerneqartitsinissamillu siunnerfeqarlutit sulisartutit.
• Aaqqissuussaanermi qullersaqarfiusumi sulinissamut qunusuissuseqassasutit, tunniusimassasutit, naapertuisuussasutit, allanngortoqarnissaanut piareersimasuussasutit naleqqussarsinnaassuseqassasutillu.
• Aaqqissuussaanerit periutsillu pioreersut nuannarisuussagitit.
• Kalaallit kulturiannik kiisalu inuiaqatigiinni pissutsit ilisimasaqarfigissavatit.

Iluaqutaassaaq politikkikkut aalajangiisarnernik, tassungalu ilanngullugu Inatsisartut ataatsimiinnerannik, Naalakkersuisunut suliassat aammalu suliani sullissinernik, pisortallu ingerlatsinerinik misilittagaqaruit.

Aamma ulaqutaassaaq allakkanik isumaginninnermik, pitsaassutsimik qulakkeerinninnermik, kiisalu IT-mut sakkussanik assigiinngitsunik misilittagaqaruit, taakkununnga F2, Outlook, Microsoft 365, TEAMS, il.il. ilaapput.

Erseqqissaatigissavarput, matumani atorfik assigiinngitsorpassuarnik suliassaqarfiusoq aammalu annertuumik akisussaaffeqarfiusoq pineqarmat. Unnukkut sapaatillu akunnerisa naanerini aammalu piffissakilliorlutit sulisarnissaq naatsorsuutigineqassaaq. Tamanna pingaartumik Inatsisartut ataatsimiinnerisa nalaanni pisarpoq.

Neqeroorutigaavut:

• Suliffik politikkikkut aalajangiisarnerit qanillugit suliaqarfiusoq.
• Sullivimmi avatangiisit pingaartorsiorfiunngitsut naalakkersuinikkut naatsunik aqquteqarfiusut aammalu tunniusimasunik, suliatigut qaffasissunik piginnaaneqarnermik ataqqinaateqarfigisaminnik tunniusimasunillu suleqateqarfiusut.
• Suliffik allanngorartoq.
• Inuttut suliatigullu ineriartorneq.

Paasissutissat amerlanerusut

Atorfik pillugu annertunerusumik paasisaqarusukkuit, Allaffimmi Pisortaq Lisa Hegelund Petersen telefon nr. 34 52 54-imut imaluunniit e-mail lish@nanoq.gl aqqutigalugu attaveqarfigisinnaavat.

Namminersorlutik Oqartussat pillugit annertunerusumik paasisaqarusukkuit Naalakkersuisut nittartagaanni atuagaqarsinnaavutit, uani: www.naalakkersuisut.gl

Atorfinitsitsinissamut atatillugu oqaloqatiginninnerit ingerlaavartumik ingerlanneqassangatinneqarput.

Aningaasarsiatigut atorfinitsitaanermilu atugassarititaasut

Akissarsiat atorfininnermilu atugassarititaasut, tassunga ilanngullugit atorfinitsi- taanermi soraarnermilu angalanissamut akiliunneqarnissamut pisattallu nassiun- neqarnerannut Kalaallit Nunaanni Namminersorlutik Oqartussat kattuffiullu isuma- qatiginniarsinnaatitaasup attuumassuteqarfigisap akornanni isumaqatigiissutaasut atorfininnerup nalaani atuuttut naapertorlugit ingerlanneqassapput.

Najugaq

Atorfimmut atatillugu sulisunut inissiamik innersuussisoqarsinnaanngilaq. Qinnuteqartoq Namminersorlutik Oqartussani atorfeqarnermini sulisutut ineqartinneqareersimaguni sulisutut ineqarsinnaatitaanini tigummiinnarsinnaavaa. Atorfimmut atatillugu ini atorfeqarnermut tunngavoq, taamaalilluni atorfeqarnerup unitsinnerani qimanneqassalluni.

Naalakkersuisut pillugu

Pissanganartunik ujarlerpit sulinerillu aqqutigalugu ulluinnarni inuunermut sunniuteqarnissat kissaatigaajuk, taamaaliornikkullu siunissamik ilusilersueqataallutit? Taava Namminersorlutik Oqartussani sulinissaq ilinnut tulluuppoq. Suliamut tunngatillugu sulisutut piginnaasaqarnissaq, pissutsinut misissuilluarsinnaaneq kiisalu allanngornernut piareersimajuarneq assut pingaartitaraagut. Tamakku saniatigut ulluinnarni suliassannik ilusilersuisinnaanerit uippakajaalertannginnissallu pingaaruteqarput. 

Namminersorlutik Oqartussat tassaapput, Qitiusumik Allattoqarfik 650-it missaanik sulisulik naalakkersuisoqarfinnut arfineq-pingasunut aqutsisoqarfinnullu arlalinnut agguataarsimasut. Katilluta inuit 2500-t sinnerlugit Namminersorlutik Oqartussanut atassuteqarpugut. Qitiusumik Allattoqarfiup suliassaraa Naalakkersuisut aalajangernissaannut tutsuiginartumik tunngavissinnissaat kiisalu politikkikkut aalajangikkat piviusunngortinnissaat. 

Namminersorlutik Oqartussat pillugit annertunerusumik uani atuarsinnaavutit http://www.naalakkersuisut.gl/job

Qinnuteqaat nassiuguk