Inatsisinik atuutitsinermi suliassaqarfimmi aamma naligiissitaanermi fuldmægtigitut atorfik pissanganartoq

Inatsisitigut isumannaatsuuneq pillugu tamatumalu peqatigisaanik naligiissitaaneq pillugu suliassat suliarerusuppigit? Suliassat suliarineqarneranni tunniusimaneq nammineernerlu pingaartinneqartorujussuulluni, nammineerlutit allanngorartumillu sulerusuppit? Taava suliffissaqartippatsigit.

Inuussutissarsiornermut, Niuernermut, Aatsitassanut, Inatsisit Atuutsinneqarnerannut Naligiissitaanermullu Naalakkersuisoqarfik, inatsisinik atuutsitsinnermut suliassaqarfik pingaarnerutillugu, inatsisinik atuutsitsinermut suliassaqarfimmut naligiissitaanermullufuldmægtigissarsiorpoq. Qinnuteqartumut uppernarsarneqarsinnaasunik piginnaasalimmut, atorfik immikkut siunnersortitut neqeroorutigineqarsinnaavoq.

Inuussutissarsiornermut, Niuernermut, Aatsitassanut, Inatsisit Atuutsinneqarnerannut Naligiissitaanermullu Naalakkersuisoqarfimmi atorfinitsinneqassaatit, tassani pingaarnertut inatsisit atuutsinneqarnerannut suliassaqarfik aamma naligiissitaaneq pillugu suliassat suliarissavatit. Suliassaqarfimmi politikkikkut anguniakkat piviusunngortinnissaat naalakkersuisoqarfimmi suliarisarpagut. Ilaatigut inatsisiliorneq, matumani naalagaaffiup inatsisai Kalaallit Nunaannut atuuttut ilanngullugit, nunat assigiinngitsut akornanni isumaqatigiissutit, periusissiat aamma suliniutit sulianut ilaapput.

Maannakkut inatsisinik atuutsitsinermut suliassaqarfik immikkoortortami pisortamik inuttaqarpoq. Inatsisinik atuutsitsinermut susassaqarfimmi suliassaqarfiit suli Kalaallit Nunaannit tiguneqanngitsut pillugit qallunaat oqartussaasui qanimut suleqatigisarpagut. Naalakkersuisut suliassaqarfimmut takorluugaannut pingaarnersiuinermilu salliutitaannut tulluartumik inatsisinik atuutsitsinermut suliassaqarfiup ineriartortitsinissaa suleqatigiinnermi tassani siunertarineqarpoq. Taamaalilluta inatsisinik atuutsitsinermut suliassaqarfimmi pinerluttulerinermi kiisalu eqqartuussisarnermik inatsiseqartitsineq pillugit inatsisiliornermi naalagaaffimmi oqartussaasut suleqatigisarpagut. Aammattaaq Kalaallit Nunaanni Eqqartuussiveqarneq pillugu Siunnersuisoqatigiit ataatsimiinneranni peqataasarpugut kiisalu Nunani Avannarlerni Ministerit siunnersuisoqatigiiffiata ataani atorfilittat ataatsimiititaliaanni peqataasarluta. 

Naligiissitaaneq pillugu allaffik Inatsisit atuutsinneqarnerannut suliaasaqarfiup ataaniippoq aamma allaffiup pisortaanik fuldmægtigimillu inuttaqarluni. Suiaassutsit akornanni naligiissitaanermut politikkikkut anguniakkat piviusunngortinneqarnissaat naligiissitaanermut allaffiup suliarai. Ileqqoq malillugu taasisinnaatitaaneq, naartuersitsinissamut pisinnaatitaaffik il.il. pillugit naligiissitsineq arnat sorsuutigisarsimavaat. Ullumikkut naligiissitsineq annertunerusumik ataatsimoorussamik suliniutaavoq, tassanilu kikkut tamarmik assigiimmik periarfissinneqarnissaat inuunermillu kissaatigisaminnik inuuneqarnissaminnut kiffaanngissuseqartinneqarnissaat pineqarpoq.Naligiissitaaneq suliassaqarfinnut allanut aamma tunngassuteqarpoq. Taamaammat inatsisiliornerit politikkillu inuiaqatigiinnut atituumik ingerlateqqinneqarnissaat pingaarutilittut suliassaavoq. Suliassaqarfinnut, naligiinngiffiusunut, aamma suliassutsit pillugit suliniutit piujuartitsisinnaasumik ineriartortoqarnissaanik siuarsaanermut ilanngussisinnaasut, suliniutit ukkatarissavaat.

Pinerluttulerineq pillugu inatsiseqartitsineq aamma pinerluttulerinermi eqqartuussisarneq suliaqarfiginerussavat, kisianni aamma naligiissitaaneq aamma assigiinngisitsineq akiorniarlugu inatsisiliorneq suliarisussaassavatit.

Suliassat tamatigoortuupput suliarisat assigiinngitsut kulturillu akornanni suleqateqarsinnaanermut kiisalu nammineq suliassaqarfigisanut namminerisamik akisussaassuseqarsinnaanermut piumasaqaateqarfiusut.

Ima neqeroorfigisinnaavatsigit:

• Suliffik, nammineersinnaanerup aalajangiisinnaassuseqarnerullu annertuumik pingaartinneqarfigisaat

• Suliffik, tunniusimasunik pikkorissunillu immikkoortortaqarfimmi sulisulik

• Suliffik ammasumik pissusilersorfiusoq, sulisullu ataasiakkaat piginnaasaannik ataqqinniffiusoq

Suliassatit

• Inatsisit atuutsinneqarnerannut suliassaqarfimmi inatsisissatut nalunaarutissatullu siunnersuutinik suliaqarneq pillugu naalagaaffimmi oqartussanut ataqatigiissaarineq

• Naligiissitaanermi- aamma assigiinngisitsineq akiorniarlugu suliassaqarfinni inatsisissatut siunnersuutinik nalunaarutinillu suliaqarneq

• Politikkikkut aqutsisut aalajangiinissaminnut tunngavissaannik suliaqarneq aamma politikkikkut aalajangiussanik piviusunngortitsinermut peqataaneq

• Nunat Avannarliit Ministeriisa Siunnersuisoqatigiivisa ataanni atorfilittatataatsimiititalianni peqataaneq

Illit piginnaasatit

• Inuiaqatigiit pissusiinik ilinniakkanik naleqquttunik ilinniagaqarsimasutit

• Inatsisiliornermik, ajornanngippat inatsisinik atuutsitsinermut suliassaqarfimmit aamma/ imaluunniit naligiissitaanermit misilittagaqaruit iluaqutaassaaq

• Suliffimmi politikkikkut aqunneqartumi sulinermik misilittagaqaruit ilaqutaassaaq

• Nammineerlutit akisussaaffik tigusinnaagit, nammineerlutillu sulisinnaallutit

• Suleqatigiinnermi sunneqatigiittarneq oqartussaasoqarfiillu assigiinngitsunik suliallit akornanni suleqatigiinneq pingaartikkitit

• Suliannut suleqatinnullu ammasumik inussiarnersumillu pissuseqartutit

• Ilusilersorluakkamik suleriaaseqartutit, aamma tunniussivissatut killiffiliussat pitsaassuserlu ukkatarigitit

• Allannguinissamut piareersimasutit suleqatikkuminartuullutillu

Kalaallit Nunaanni inuiaqatigiinni pissutsinik kulturimillu ilisimasaqarneq iluaqutaasorujussuussaaq, piumasaqaataananili.

Suliaq nikerartoq pissanganartorlu, ilaanni ulapiffiusinnaaqisoq, aammali qinnuteqaateqartumut eqqortumut unamminarlunilu pissanganarluartoq ilimagisinnaavat. 

Piffissaq suliffissaq tassaavoq sapaatip-akunneranut nalunaaquttap-akunneri 40-t.

Paasissutissat annertunerusut:

Inuussutissarsiornermut, Niuernermut, Aatsitassanut, Inatsisit Atuutsinneqarnerannut Naligiissitaanermullu Naalakkersuisoqarfik pillugu annertunerusumik paasisaqarusukkuit, immikkoortortaqarfimmi pisortaq Trine Foldager allaffigisinnaavat email una atorlugu: trif@nanoq.gl imaluunniit +299 546647-mut imaluunniit +45 53669493-mut sianerlutitpaasisaqarnerusinnaavutit.

Aningaasarsiatigut atorfinitsitaanermilu atugassarititaasut

Akissarsiat atorfininnermilu atugassarititaasut, tassunga ilanngullugit atorfinitsitaanermi soraarnermilu angalanissamut akiliunneqarnissamut pisattallu nassiunneqarnerannut Kalaallit Nunaanni Namminersorlutik Oqartussat kattuffiullu isumaqatiginniarsinnaatitaasup attuumassuteqarfigisap akornanni isumaqatigiissutaasut atorfininnerup nalaani atuuttut naapertorlugit ingerlanneqassapput.

Najugaq

Atorfimmut atatillugu malittarisassat qaqugukkulluunniit atuuttut naapertorlugit sulisunut inissiamik pequsersorsimanngitsumik innersuussisoqarsinnaavoq. Inissamik innersuussisoqarsinnaanngilaq, pineqartoq atorfimmut atatillugu ineqareersuuppat, imaluunniit ineqarsimappat kommunep inaataanik Namminersorlutillu oqartussalluunniit inaataanik. Malittarisassat qaqugukkulluunniit atuuttut naapertorlugit inissiamut innersuussutigineqartumut akiliutit qularnaveeqqutillu akilerneqassapput. Atorfimmut atatillugu ini atorfeqarnermut tunngavoq atorfeqarnerullu unitsinnerani qimanneqassalluni.

Ineqarnermut akiliut aamma inissiap pitsaassusaa nikerarsinnaapput inissiap qanga sananeqarsimanera, piginnittua il.il apeqqutaallutik. Sulisutut ataavartumik initaarnissaq utaqqinarsinnaavoq, taamaattumik utaqqiisaagallartumik inissiisoqarsinnaasarpoq, tassunga ilanngullugu najugaqatigiiffinnut minnerusunut imaluunniit akunnittarfimmi inissianut inissiisoqarallarsinnaalluni, taakkulu akileraarusersorneqassallutik. Sulisunut inissiani utaqqiisaasumiklluunniit inigisani angisuunik uummasuuteqarsinnaaneq soorlu qimmeqarsinnaaneq qitsuuteqarsinnaanerluunniit periarfissaqanngilaq

Qinnuteqaatit, CV, ilinniarsimasanut pikkorissaatigisimasanullu uppernarsaatit kiisalu paasissutissat allat pisariaqarsinnaasut "qinnuteqaat nassiuguk" toorlugu nassiutikkit.E-mail-ikkut qinnuteqaatinik tigusineq ajorpugut.

Qinnuteqaat nassiuguk