Immikkoortortaqarfimmi pisortassarsiorpoq

Ineqarnermut Attaveqaasersuutinullu Naalakkersuisoqarfik Immikkoortortaqarfimmi pisortassarsiorpoq

Sulisunik aqutsinermik, suliniutinik aqutsinermik, pisortani aqutsinermik, aningaasanik aqutsinermik, immikkoortortaqarfiullu suliassaqarfiinik misilittagalimmik, Iluarsagassanut allattoqarfimmi immikkoortortaqarfimmi pisortassamik Ineqarnermut Attaveqaasersuutinullu naalakkersuisoqarfik pissarsiorpoq.

Piaartumik atorfinitsitsisoqassaaq.

Atorfik pillugu

Ineqarnermut Attaveqaasersuutinullu Naalakkersuisoqarfimmi immikkoortortaqarfiit sisamaasut, Iluarsagassanut allattoqarfik ilagaat. Inissiat ilanngullugit Namminersorlutik Oqartussat illuutaannik nutarterineq, aserfallatsaaliuinerlu inuiaqatigiinnut pingaarutilerujussuullunilu politikkikkut eqqumaffigineqartorujussuuvoq. Suliassat il.il. isumagineqarnissaat pillugit Naalakkersuisoqarfiit isumaqatigiissusiorfigineqarsimasut suliassaat immikkoortortaqarfiup isumagisarai. Naalakkersuisoqarfiit suliakkiisarlutillu aningaasaliissutinik atugassiisarput, immikkoortunullu pilersaaruteqarsimappat taanna malillugu suliassat tulleriiaarneqartarlutik. Tassunga tunngatillugu inissianut tunngatillugu INI A/S qanimut oqaloqatigineqartassaaq, pisullu ilaanni aamma attartortut. Nuna tamakkerlugu suliassaqarfiuvoq.

Immikkoortortaqarfimmi pisortaq ataaseq, allaffimmi pisortaq ataaseq, sulisullu tallimat immikkoortortaqarfimmi massakkut atorfeqarput.

Naalakkersuisoqarfimmi sanaartornermut immikkoortortaqarfik pingaarnertut suleqatigineqarpoq, aammali naalakkersuisoqarfimmi attaveqaasersuutinut, ineqarnermut, sanaartornermut il.il. immikkoortortaqarfiit suleqatigineqarlutik.

Immikkoortortaqarfimmi sulisut naalakkersuisoqarfiillu suliakkiisartut akornanni oqaloqatigiilluartarnissaq, Iluarsagassanut allattoqarfimmi immikkoortortaqarfimmi pisortatut qulakkiissavat. Aserfallatsaaliuinermut, nutarterinermullu naalakkersuisoqarfiit teknikkikkut suliatigullu paasisimasaqanngillat, taamaattumillu suliassaqarfik pillugu suliassaqarfimmik ilisimasaqanngitsunut Iluarsagassanut allattoqarfik paasissutissiisinnaasariaqarpoq, suliassaqarfiillu pingaarnertut pingaarnersiorneqarnissaannut, suliassallu pingaarnersiorneqarnissaanni aalajangiinissami eqqortumik tunngavissamut ikiuutaasariaqarluni. Tassunga tunngatillugu suliniutini ataasiakkaani atuisut, attartortullu oqaloqatigineqarnissaat, attaveqarfigineqarnissaallu eqqarsaatigineqartariaqarsinnaassaaq.

Suliassaqarfiit assigiinngitsut iluini nutarterinissamik Namminersorlutik Oqartussat annertuumik suliassaqarput. Taamaattumik suliassat suliarineqarnissaanni sulisartunik atorluaanissaq, ukiullu qanoq-ilinerata eqqarsaatigineqarnissaa qulakkeerumallugu misissueqqissaartoqartariaqarpoq, inoqarfinnilu assigiinngitsuni suliassaqarfimmut ilisimasaqarluartariaqarluni. Suliassat akimorlugit eqqarsarsinnaasariaqarpoq, nutaatut aaqqiissutissanik takunnissinnaasariaqarpoq, suliassallu naammassineqarnissaannut immikkoortortaqarfimmut, sanaartugassanik suliassinneqartumut, sulisartunullu iluaqutissanngorlugu suliniutit nalinginnaasut atorneqarsinnaasariaqarlutik. Ilaatigut suliassaqarfiup iluani neqeroortitseriaatsit, malittarisassat il.il. ilisimasaqarfigilluartariaqarput. Naalakkersuisoqarfimmi Sanaartornermut immikkoortortaqarfiup suleqatigilluarnissaa, oqaloqatigilluartarnissaalu aamma pingaaruteqarpoq. Nutaamik sanaartornerni sanatitsisuuneq Namminersorlutik Oqartussat sinnerlugit Sanaartornermut immikkoortortaqarfiup ilaatigut isumagisaraa, Namminersorlutik Oqartussanilu sanatitsisutut oqartussaanerup isumagineqarnerani najoqqutassaliortarluni. Tassunga tunngatillugu sanaartorneq ataavartikkumallugu, inoqarfinni ataasiakkaani suliassat ataqatigiissaartariaqarput.

Namminersorlutik Oqartussat aqutsinissamut tunngavissaq akuersissutiginikuuaat. Namminersorlutik Oqartussani aqutsisut aqutsinermi qanorluunniit misilittagaqarunik, aqutsinissamut tungavissaq pillugu pikkorissaanermi peqataassasut naatsorsuutigineqarpoq. Namminersorlutik Oqartussani sumiluunniit aqutsisut tamarmik ataavartumik nalilersuiffigineqartarput.

Naatsorsuutigaarput:

• Uppernarsakkamik aqutsinermik misilittagaqartutit
• Attuumassuteqartumik teknikkimut ilinniarsimassasutit, misissueqqissaarsinnaasutit, sulianullu ilisimasaqarluartuusutit
• Oqaatsitigut, allattariarsornikkullu attaveqarluarsinnaasutit
• Ersarissumik paasissutissiisinnaasutit, sunniuteqarsinnaasutillu
• Aningaasanik aqutsinermik paasisimasaqarlutillu misilittagaqartutit, suliniutinullu aningaasaliissutit iluini suliniutit ingerlanneqarsinnaaqqullugit immikkoortortaqarfimmi suliniutaasariaqartut qulakkeersinnaagitit
• Nutarterinissamik, aserfallatsaaliugassanillu suliassanut ilisimasaqartutit imaluunniit misilittagaqartutit
• Politikkikkut aqutami sulinermik misilittagaqartutit
• Angusassanut siunnerfeqartuusutit
• Suliaqarfimmik ilisimasaqarluarlutillu paasisimasaqarluartutit

kiisalu tulliuttutigut inuttut piginnaasaqartutit:

• Aaqqissuussaanermi atorfiit qulingiluat akuerisaallutik, aaqqissuussaanermi mikisumi aqutsisinnaasutit
• Kajumissaarisinnaasutit, isumagissaartuusutit aamma
• Suleqatinik suleqateqarluarnissamik pingaartitsisutit
• Aqutsisutut, suliatigullu suliassat naammassineqarnissaannut suliatigut qaffasissumik tunngaveqartutit

Annertunerusumik paasisaqarusuppit?

Naalakkersuisoqarfimmi pisortamut Ruth Lindhardtimut, oqarasuaammut 34 54 53-imut imaluunniit e-mailimut rli@nanoq.gl-imut saaffiginnillutit, atorfik pillugu annertunerusumik paasiniaanissannut tikilluaqqusaavutit. 

Akissarsiat atorfeqartitaanermilu atugassarititaasut:

Atorfik akissaateqarfimmi LR 38-mi - maanna inissisimavoq.

Aningaasarsiat aalajangersimasunik aningaasarsianut ilallit LR 38-mi 1. April 2022-miit qaammammut 56.910,- koruuniupput ukiumullu 682.930,- koruuniullutik.

Aallaaviatigut isumaqatigiissutini atugassarititaasut naapertorlugit atorfinitsitsisoqassaaq, qinnuteqartoq tjenestemandi-tut atorfeqareersimaguni Nunatsinni pisortani tjenestemandit pillugit inatsisit malillugit tjenestemandinut atugassariti-taasut naapertorlugit atorfinitsinneqarsinnaavoq.

Atorfimmut atuuttoq tassaavoq, piffissap suliffiusussap qanoq sivisutiginissaa killilersugaanngimmat, aammalu qaangiuttoornermi ajunngitsorsiassat akilerneqarnissaat ullullu sulinngiffissat annaaneqartut ajunngitsorsiassarsissutiginissaat atorneqarsinnaanngillat.

Piffissap suliffiusussap sivisussusissaa aallaavittut sapaatip akunneranut nalunaaquttap akunnerinik 40-nik sivisussuseqarpoq.

Akissarsianut atorfeqartitaanermullu tunngasutigut piumasaqaatit, taakkununnga ilanngullugit atorfinikkiartorluni soraarlunilu angalanermut aamma pequtit nassiunneqarnerinut akiliunneqarsinnaatitaaneq, Namminersorlutik Oqartussat aamma pineqartup kattuffiata isumaqatigiinniarsinnaatitaasup akornanni isumaqatigiissutit piffissami atorfiniffiusumi atuuttut naapertorlugit pissapput.

Najugaq

Atorfimmut atatillugu sulisunut inissiamik innersuussisoqarsinnaanngilaq. Qinnuteqartoq Namminersorlutik Oqartussani atorfeqarnermini sulisutut ineqartinneqareersimaguni sulisutut ineqarsinnaatitaanini tigummiinnarsinnaavaa. Atorfimmut atatillugu ini atorfeqarnermut tunngavoq, taamaalilluni atorfeqarnerup unitsinnerani qimanneqassalluni.

Qinnuteqaatit, CV, ilinniarsimasanut pikkorissaatigisimasanullu uppernarsaatit kiisalu paasissutissat allat pisariaqarsinnaasut "qinnuteqaat nassiuguk" toorlugu nassiutikkit. 

E-mail-ikkut qinnuteqaatinik tigusineq ajorpugut.

Naalakkersuisut pillugu

Pissanganartunik ujarlerpit sulinerillu aqqutigalugu ulluinnarni inuunermut sunniuteqarnissat kissaatigaajuk, taamaaliornikkullu siunissamik ilusilersueqataallutit? Taava Namminersorlutik Oqartussani sulinissaq ilinnut tulluuppoq. Suliamut tunngatillugu sulisutut piginnaasaqarnissaq, pissutsinut misissuilluarsinnaaneq kiisalu allanngornernut piareersimajuarneq assut pingaartitaraagut. Tamakku saniatigut ulluinnarni suliassannik ilusilersuisinnaanerit uippakajaalertannginnissallu pingaaruteqarput.

Namminersorlutik Oqartussat tassaapput, Qitiusumik Allattoqarfik 650-it missaanik sulisulik naalakkersuisoqarfinnut arfineq-pingasunut aqutsisoqarfinnullu arlalinnut agguataarsimasut. Katilluta inuit 2500-t sinnerlugit Namminersorlutik Oqartussanut atassuteqarpugut. Qitiusumik Allattoqarfiup suliassaraa Naalakkersuisut aalajangernissaannut tutsuiginartumik tunngavissinnissaat kiisalu politikkikkut aalajangikkat piviusunngortinnissaat.

Namminersorlutik Oqartussat pillugit annertunerusumik uani atuarsinnaavutit http://www.naalakkersuisut.gl/job

Qinnuteqaat nassiuguk