Ilisimatusarfimmi uumassusilerinermi SILA-mi bacheloritut ilinniakkamut nutaamut studieadjunkti

Ilisimatusarfiup Peqqissaanermik Pinngortitamillu Ilisimatusarfiani Uumassusilerinermi SILA-mi Bacheloritut ilinniakkamut nutaamut studieadjunkti.

2025-mi februaarimi Ilisimatusarfiup Peqqissaanermik Pinngortitamillu Ilisimatusarfiani uumassusilerinermi ilinniartoqatigiit siulliit aallartissapput. Ilisimatusarfimmi ilinniartitsisut ilisimatusartullu atorfiisa aaqqissugaanerat pillugu isumaqatigiissut 1. november 2010-meersumut innersuussinikkut studieadjunktissarsiorpugut, ilinniakkap SILA-p aallartinneqarnissaanut 2024-p ingerlanerani piareersaasussamik aamma 2024-mi septembarip aallaqqaataani imaluunniit isumaqatigiissuteqarnikkut atorfinittussamik.

Peqqissaasutut bachelorinngorniarluni, napparsimasunik sullissinermi siunnersortinngorniarluni (kliniskvejleder) pikkorissaanernilu ataasiakkaani Peqqissaanermik Pinngortitamillu Ilisimatusarfimmi ilinniarnissat periarfissaareerput. Kalaallit Nunaanni Peqqissutsimik Ilisimatusarfik aammattaaq instituttip ataaniippoq, taannalu ilisimatusarfiuvoq ingerlassaqarfiusoq ineriartortorlu. Instituttimi atorfillit 7-10-jupput, arlalinnik professoreqarpoq, lektoreqarpoq attuumassuteqartunillu ilisimatusartoqartoqarluni. 45-50-it missaannik bachelorinngorniartunik aamma 10-12-it missaannik ph.d.-nngorniartunik institutti maannakkut ilinniartuuteqarpoq.

Immikkoortortaqarfimmi Aviâja Lyberth Hauptmann pisortaralugu studieadjuktissaq suleqatigiinnut ilanngussaaq. Suleqatigiit peqatigiillutik suliassarpassuarnik isumaginnittarput:

Suliassat:

• Uumassusilerinermi SILA-mi bachelorinngorniarfimmi ilinniartitsinissamut pilersaarusiornermi studieadjunkti suleqataassaaq. Tamassumunnga ilanngullugu fagimut TUTTU-mut pilersaarusiornermut suleqataaneq, fagimi tassani ilaatigut matematikki, kisitsisitigut paasissutissat aamma aavarneq qiutinneqassapput.
• Studieadjunktip allaffissornikkut suliassat, pingaartumik 2024-mi, isumagissavai, ilaatigut uumassusilerinermik ilinniakkamut tapersiisartussanik suleqatinik pilersitsinerit, tamassumunnga ilanngullugit ilisimatusarfiit allat Kalaallit Nunaannilu suliffeqarfeqarfik.
• Ataqatigiissaarineq, ataatsimiinnernik ingerlassat aamma malittarinninnerit, ilaatigullu suliassani ilaassapput nittartakkatigut, allakkatigut nutaarsiassatigut allatigullu tusagassiuutilerinikkut pileriartortut pillugit paasissutissiorneq, immikkoortortaqarfimmi pisortaq qanimut suleqatigineratigut.
• Suliassat takkuttartut ilaatigut tassaajumaarput atuakkianik ujarlerneq aamma misissuinerit, aningaasaateqarfinnut qinnuteqartarnerit, aaqqissuussanik pilersaarusiortarneq ingerlassisarnerlu.
• 2025-mi tamassumalu kingorna suliassat pingaarnerit tassaajumaarput ilinniartitsinerit, pingaartumik fagimi TUTTU-mi, kiisalu ilinniartitsisooqatigiit atorfillit suleqatiginerisigut ilinniartitsinermi sammisassanik ataqatigiissaarinerit.

Qinnuteqartumut naatsorsuutigisavut:

• Uumassusilerinermi kandidatitut ilinniagaqarsimanissaa suliassaqarfinni ukunani pingaarnertut suliamik piginnaasaqartumik: kisitsisitigut paasissutissat/matematikki, piujuartitsineq/uumassusillit assigiinngisitaarnerat aamma/imaluunniit Issittumi pinngortitami pissuseqatigiinneq.
• Kalaallit Nunaat aamma nunatsinni ilinniartitaanerup aaqqissuussaanera pillugit ilisimasaqarluartuunissaa.
• Ilinniartitsinermik misilittagaqartuunissaa.
• Pinngortitamik ilisimatusarnerup iluani ilinniakkami Kalaallit Nunaannut naleqquttumik immikkut periuseqarnissamut taperseerusussuseqartuunissaa, iluatsitsilluarfiusumik ilinniakkamik pilersitsinermut tapersiilluni Kalaallit Nunaannilu periarfissanik aamma nukittuffinnik takunnissinnaasuunissaa, tassa Kalaallit Nunaanni inuusuttunut suliffeqarnermullu toraagaqartuusunik.
• Peqqissaanermik Pinngortitamillu Ilisimatusarfimmi Pinngortitamut Immikkoortortaqarfittaassami sulinermi ilinniarnermilu kulturimik peqqissumik pilersitseqataarusuttuunissaa.
• Kalaallit Nunaanni uumassusilerinermik suliaqarnermi pisaatsinik misilittagaqartuunissaa, tamassumunnga pingaartumik ilanngullugit ornigulluni sulinermik aamma piniarnermik misilittagaqarneq iluaqutaassaaq.

Neqeroorutigaagut:

• Sulisut ilinniartullu atugarissaarnissaannik pingaartitsiviusumi suliffimmi avatangiisit pitsaasut.
• Suleqatit kajumissuseqartut, qanimut suleqatigiittartut akunnerminnilu avitseqatigiillutillu tapersersoqatigiittartut.
• Suliffik sunniuteqangaatsiarnissamut periarfissalik.
• Suliatigut ilinniartitsinerullu iluani ineriartornissamut periarfissat.

Qinnuteqaat.

Studieadjunktitut atorfininnissamut qinnuteqaat, allaganngorlugu qinnuteqaatip saniatigut, ukuninnga imaqassaaq:

Ilanngussaq 1: Curriculum Vitae.

Ilanngussaq 2: Bacheloritut kandidatitullu ilinniagaqarsimanermik uppernarsaatit.

Ilanngussaq 3: Ilanngussat allat naleqqussinnaasut

Studieadjunktitut atorfeqartitaanermut piffissaliussaq ukiunik arfinilinnik sivisussusiligaavoq ukiunik marlunnik sivitsorneqarnissaanut periarfissalik. Tamassuma kingorna lektorip pitsaasumik nalileereernerani atorfillit ilisimatusarfimmi studielektoritut atorfinitsivinneqarsinnaapput.

Attavissat/paasissutissat:

Atorfik pillugu paasisaqarnerorusukkuit Immikkoortortaqarfiup pisortaata Aviâja Lyberth Hauptmannip, ph.d., Ilisimatusarfik, alha@uni.gl attaviginissaanut tikilluaqqusaavutit imaluunniit Instituttimi pisortaagallartoq Carsten Juul Jensen oqarasuaammut uunga + 299 385903.

Ilisimatusarfik, Peqqissaanermik Pinngortitamillu Ilisimatusarfik aamma Uumassusilerinermi SILA-mi Bacheloritut ilinniagaq pillugit atuarnerusinnaavutit ugguuna: www.uni.gl

Ilisimatusarfik pillugu

Ilisimatusarfik 1987-imi pilersinneqarpoq. Maannakuugallartoq ilinniarneqarsinnaasut assigiinngitsut qulingiluaallutik taamatuttaaq Ilisimatusarfiup neqeroorutigai diplom-imut masterimullu saniatigut ilinniarnerit. Ilisimatusarfik issittumi universitetiuvoq nunarsuup ilaani pilertortumik ineriartorfiusumi nutaanik ilisimasaqalerfiusoq nutaaliorfiusorlu. Siulersuisut tassaapput Ilisimatusarfiup qullersai. Ulluinnarni aqutsineq rektorimit direktørimillu ingerlanneqarpoq. Instituttit sisamaasut Instituttini Siunnersuisoqatigiinnit siunnersorneqartumik siulersorneqarput.

Ilisimatusarfik sisamanik instituteqarpoq:

• Ilinniartitsinermik Ilisimatusarfik
• Inuiaqatigiilerinermik, Aningaasaqarnermik Tusagassiornermillu Ilisimatusarfik
• Kulturimik, Oqaatsinik Oqaluttuarisaanermillu Ilisimatusarfik
• Peqqissaanermik Pinngortitamillu Ilisimatusarfik

Allaffissornikkut aqutsisoqatigiiffik pillugu

Allaffissornikkut aqutsisoqatigiiffiup ilisimatusarfik tamakkerlugu sullitaraa. Ilisimatusarfiup direktørianit aqunneqarpoq. Allaffissornikkut aqutsisoqatigiiffik Ilinniarfissuarmi Ilimmarfimmilu immikkoortortaqarpoq. Immikkoortortat faginik ingerlatsiviusunik qanimut suleqateqartarput soorlu namminneq akunnerminni aamma taamaattartut. Allaffissornikkut aqutsisoqatigiiffimmi suliassat tassaapput: ilinniartut pillugit-, sulisut pillugit aqutsineq, Siulersuisuniik, Akademisk Rådimik kiisalu ilimmarfimmi sulisunik ilinniartunillu sullissineq. Allaffissornikkut aqutsisoqatigiiffiup Ilimmarfiup ilutaanik sanaartornermik nakkutiginninneq aamma ingerlataraa.

Aningaasarsiatigut atorfinitsitaanermilu atugassarititaasut

Akissarsiat atorfininnermilu atugassarititaasut, tassunga ilanngullugit atorfinitsitaanermi soraarnermilu angalanissamut akiliunneqarnissamut pisattallu nassiunneqarnerannut Kalaallit Nunaanni Namminersorlutik Oqartussat kattuffiullu isumaqatiginniarsinnaatitaasup attuumassuteqarfigisap akornanni isumaqatigiissutaasut atorfininnerup nalaani atuuttut naapertorlugit ingerlanneqassapput.

Najugaq

Atorfimmut atatillugu sulisunut inissiamik innersuussisoqarsinnaanngilaq. Qinnuteqartoq Namminersorlutik Oqartussani atorfeqarnermini sulisutut ineqartinneqareersimaguni sulisutut ineqarsinnaatitaanini tigummiinnarsinnaavaa. Atorfimmut atatillugu ini atorfeqarnermut tunngavoq, taamaalilluni atorfeqarnerup unitsinnerani qimanneqassalluni.

Qinnuteqaatit, CV, ilinniarsimasanut pikkorissaatigisimasanullu uppernarsaatit kiisalu paasissutissat allat pisariaqarsinnaasut "qinnuteqaat nassiuguk" toorlugu nassiutikkit.

E-mail-ikkut qinnuteqaatinik tigusineq ajorpugut.

Naalakkersuisut pillugu

Pissanganartunik ujarlerpit sulinerillu aqqutigalugu ulluinnarni inuunermut sunniuteqarnissat kissaatigaajuk, taamaaliornikkullu siunissamik ilusilersueqataallutit? Taava Namminersorlutik Oqartussani sulinissaq ilinnut tulluuppoq. Suliamut tunngatillugu sulisutut piginnaasaqarnissaq, pissutsinut misissuilluarsinnaaneq kiisalu allanngornernut piareersimajuarneq assut pingaartitaraagut. Tamakku saniatigut ulluinnarni suliassannik ilusilersuisinnaanerit uippakajaalertannginnissallu pingaaruteqarput.

Namminersorlutik Oqartussat tassaapput, Qitiusumik Allattoqarfik 650-it missaanik sulisulik naalakkersuisoqarfinnut arfineq-pingasunut aqutsisoqarfinnullu arlalinnut agguataarsimasut. Katilluta inuit 2500-t sinnerlugit Namminersorlutik Oqartussanut atassuteqarpugut. Qitiusumik Allattoqarfiup suliassaraa Naalakkersuisut aalajangernissaannut tutsuiginartumik tunngavissinnissaat kiisalu politikkikkut aalajangikkat piviusunngortinnissaat.

Namminersorlutik Oqartussat pillugit annertunerusumik uani atuarsinnaavutit http://www.naalakkersuisut.gl/job

Qinnuteqaat nassiuguk