Inatsisileritooq.

Erngup nukinganik innaallagissiorfiliornissamik neqerooruteqartitsinermut inatsisileritooq, Pisortat nukissiamik pilersuinerat, Nunalerineq Silallu pissusia

Ulloq atorfiniffissaq: 1. juuli 2024 imaluunniit sukumiisumik isumaqatigiissuteqarnikkut.

Nunalerinermut, Imminut Pilersornermut, Nukissiutinut Avatangiisinullu Naalakkersuisoqarfik Nunalerinermut, Nukissiornermut Silallu Pissusianut Immikkoortortaqarfimmi Inatsisilerinermi Fuldmægtigitut / Immikkut Ittumik Siunnersortitut / Siunnersortaanertut atorfimmi ataatsimi sulisussarsiorpoq.

Atorfik pillugu

Oqartussaasut suliaanni ineriartortitsinernilu, immikkoortortaqarfimmi nukissiornerup, silap pissusiata nunalerinerullu iluani isumagineqartussani inatsisinut tunngasunik assigiinngitsunik suliassaqarfimmi qitiusumik inissisimassaatit.

Suliassatit naleqqussarneqassapput, taamaalillutillu piginnaaneqarfinnut naleqqunnerpaanik suliaqassaatit. Suliassat ilaatigut tassaapput:

• Naalakkersuinikkut nukissiutit ataavartut, nunalerineq silallu pissusia pillugu suliniutinut atatillugu inatsisilerinermi siunnersortitut misissueqqissaarnermilu suliassat
• Kalaallit erngup nukinganik isumalluuteqarfiinik neqerooruteqartitsinermut aamma Parisimi isumaqatigiissummut ilaalernissamut, kiisalu nunalerinermik ineriartortitsinermut atugassanik inatsisinik misissueqqissaarnerit
• Immikkoortortaqarfinnut allanut oqartussaasunullu, taakkununngalu Nukissiorfiit aamma NunaGreen ilanngullugit, suliassaqarfiit akimorlugit ataqatigiissaarinermi suliassat
• Naalakkersuinikkut suliassanik sullissinerit, taakkununnga ingerlatitseqqinnermi suliassat, soorlu tusagassiorfinnut nalunaarutit, oqalugiaatissat paasisititsiniaanernullu tapiliussassat il.il. suliarineqartarneri ilanngullugit.

Nukissiorneq

Nukissiornermik suliassaqarfimmi suleqatitit peqatigalugit Nukissiorfinnut, nukissiamik pilersuinermi ulluinnarni pilersaarusiornermik ingerlatsinermillu suliaqartumut, kiisalu NunaGreen-imut, Nuummi, kiisalu Qasigiannguani Aasiannilu erngup nukinga pillugu suliani angisuuni marluusuni sanaartortuusumut attaveqaataassaatit. Aamma suleqatigiinnut, Kalaallit Nunaanni erngup nukinganik isumalluuteqarfiit annerpaat neqerooruteqartitsivigineqarnissaannik suliassaqartunut inatsisitigut piginnaaneqarfitit atorlugit suleqataassaatit.

Silap pissusia

Ukiut kingulliit ingerlanerini silap pissusia naalakkersuinikkut oqallisissani sallinngoriartorsimavoq, maannalu immikkoortortaqarfimmiit Parisimi isumaqatigiissummut ilaalernissaq pillugu aalajangiiffigisassatut siunnersuutip, Inatsisartut isumaqatigiillutik akuerisaata piviusunngortinneqarnissaa sulissutigineqarpoq. Nunami namminermi silap pissusia pillugu politikki suliassaqarfiuvoq tiguneqarsimasoq, aammalu Kalaallit Nunaat Kunngeqarfik Danmarkimut (Danmark, Kalaallit Nunaat, Savalimmiut) ilaasutut nunani tamalaani silap pissusia pillugu isumaqatiginninniartarnernut ilaavoq. Suliassaqarfimmi nunamut namminermut tunngasuni, ilaatigut nunami namminermi silap pissusianut periusissiornermut atatillugu, aammalu nunanut tamalaanut tunngasuni, Parisimi isumaqatigiissummut ilaalernissap naammassineqarfissaani inatsisilerinikkut suliassaqaaluttussaavoq.

Nunalerineq

Nunalerinerup aammalu Kalaallit Nunaata imminut pilersornerata tamarmiusup nukittorsaavigineqarnissaat naalakkersuinikkut annertuumik kissaatigineqarpoq. Immikkoortortaqarfimmi suliniutit assigiinngitsut, nunalerinermik ineriartortitsiviusussani, imminut pilersornermik annertusititsiviusussani aammalu piujuartitsiviunerusumik nunalerinermi aningaasaqarnermut tunisassiornermullu tunngasut suliarineqarput. Maannarpiaq Inatsisartuni inuussutissarsiutinik siuarsaanissamut inatsisissatut siunnersuut, naalakkersuinikkut anguniakkanut tapertaasussaq suliarineqarpoq.

Ilinnut piginnaaneqarfinnullu tunngasut

Inatsisilerinermi sulisunik, nukissiutit ataavartut silallu pissusianut politikki, kiisalu nunalerinermik ineriartortitsineq pillugu naalakkersuinikkut suliat qanillugit sulerusuttumik pissarsiorpugut. Naalakkersuinikkut aaqqissuussaanermi aamma/imaluunniit inuussutissarsiutinik ingerlataqartuni namminersorluni sulinermik misilittagaqaruit, aammalu nukissiutit ataavartut paasisimasaqarfigigukkit iluaqutaassaaq. Tamatuma peqatigisaanik ingerlatsinermi inatsigit paasisisimasaqassaatit aamma/imaluunniit suliassaqarfiup ilikkarnissaanut piumassuseqassallutit.

Annertuumik qunusuissuseqassaatit, aammalu suliassanik, inernissaat siumoortumik ilisimanngisatsinnik suliaqarnissaq nuannerissallugu. Suliatigut piginnaaneqarluarnissaq pingaaruteqarpoq, suliassat nutaat iserfigisinnaassagakkit, aammalu misilissimanngisaraluatsinnulluunniit aaqqiissutissanut nassaaqataasinnaassagavit. Aamma ulluinnaat tamatigut suliassannik pilersaarusiornissamut ataqatigiissaarinissamullu piumasaqaateqarfiusunik saniatigut suliassaqarfiusartut ingerlattarnissaat nuannerissavat.

Naatsorsuutigaarput:

• Inatsisilerinermi ingerlaqqiffiusumik kandidatitut ilinniarsimassasutit (cand.jur-itut assigisaatulluunniit)
• Aaqqissuussaanermi naalakkersuinikkut aqunneqartumi sulinermik misilittagaqarneq aamma/imaluunniit paasisimasaqassasutit, tassungalu naalakkersuinikkut aalajangiisarnermi suliat ingerlasarnerinik paasisimaarinninneq ilanngullugu
• Nunalerinermik, nukissiutinik silallu pissusianik suliassaqarfinnik soqutigisaqassasutit ajornanngippallu misilittagaqassasutit, imaluunniit suliassaqarfiit iserfiginissaannut piumassuseqassasutit
• Allakkatigut oqaluinnarnikkullu oqaatsit paasinartut ersarissullu atorlugit ajornartorsiutinik pisariusunik ingerlatitseqqinnissamut pikkorissuseqassasutit
• Namminersorlutit, aaqqiissutissanik siunnerfeqarlutit aammalu suliassanut annernut paasisimaarinnillutit sulisinnaassasutit
• Suliassat assigiinngisitaartut suliaralugit nuannerissagit, aammalu pisariaqartillugu aallutassanut allanut nooriaannaaneq piginnaaneqarfigissagit
• Ajornartorsiutinik aaqqiiniarnermi eqaatsumik, peqqissaartumik misissueqqissaarfiusumillu sulisinnaassasutit
• Oqaatsit arlallit, tassalu kalaallisut, danskisut tuluttullu, atorlugit pitsaasumik ingerlatitseqqissinnaassuseqassasutit
• Kalaallit kulturiannik nunarsuarmillu avatangiisumik paasisimaarinnittuussasutit, aammalu avataaniit sullissisunik assigiinngitsorpassuarnik, assigiinngitsunik soqutigisaqarsinnaasunik tatiginarlutit ileqqorissaarlutillu suleqataasinnaassasutit

Nunalerinermut, Imminut Pilersornermut, Nukissiutinut Avatangiisinullu Naalakkersuisoqarfik pillugu

Naalakkersuisoqarfimmi sulisut 45-t missaanniippugut, taakkunanngalu Nunalerinermut, Nukissiutinut Silallu Pissusianut Immikkoortortaqarfimmi sulisut qulit missaanniipput, ilinniartut ilanngullugit. Tamatuma saniatigut pisortat pilersuisoqarfiat Nukissiorfiit, Innaallagissiornermut Oqartussaasut, Pinngortitaleriffik aamma Asiaq Naalakkersuisoqarfimmut immikkoortortaqarfittut inissisimapput.

Naalakkersuisoqarfimmi suliassat inuiaqatigiinnut pingaarutillit Kalaallit Nunaannut iluaqutaasumik isumagisaraagut. Ulluinnarni sulisut akunnerminni nuannersumik, aammalu suliat inernerinut namminneerlutik sunniuteqarsinnaanerinut inissaqartitsiviusumik pissuseqarput.

Ineriartortitsinermi pissanganartorpassuarnik suliaqarpugut, aammalu atorfinni ineriartorsinnaallutit misiginissat uagutsinnut pingaaruteqarpoq.

Naalakkersuisoqarfiup aqutsisuisa nukittuumik ataavartumillu qaffasissusilimmik toqqissisimanissaq pingaartippaat. Naalakkersuisoqarfimmi uninngaannannginnerput, pimoorussinerput akisussaaffinnillu tigusisarnerput ilisarnaatigaarput. Naalakkersuisoqarfik ataaseq ataatsimoorfigaarput, assigiinngissutsigut nukittoqqutigalugit. Taamaattumik avatangiisini toqqissisimanartuni sulisinnaanerit, tamatumunngalu tapertatut tunniussaqarsinnaanerit takusinnaassavat.

Neqeroorutigaavut

- Akisussaaffik annertooq, taamatullu pitsaasumik allannguinissamut periarfissaqarneq

- Suliffeqarfik pilerinartoq, ataqqinniffiusumik tatiginniffiusumillu silaannaqarfiusoq

- Suliassaqarfik tamatigoortoq pissanganartorlu, nunami namminermi nunarsuarmilu annertuumik aallunneqartoq

Aningaasarsiatigut atorfinitsitaanermilu atugassarititaasut

Akissarsiat atorfininnermilu atugassarititaasut, tassunga ilanngullugit atorfinitsitaanermi soraarnermilu angalanissamut akiliunneqarnissamut pisattallu nassiunneqarnerannut Kalaallit Nunaanni Namminersorlutik Oqartussat kattuffiullu isumaqatiginniarsinnaatitaasup attuumassuteqarfigisap akornanni isumaqatigiissutaasut atorfininnerup nalaani atuuttut naapertorlugit ingerlanneqassapput.

Najugaq

Atorfimmut atatillugu sulisunut inissiamik innersuussisoqarsinnaanngilaq. Qinnuteqartoq Namminersorlutik Oqartussani atorfeqarnermini sulisutut ineqartinneqareersimaguni sulisutut ineqarsinnaatitaanini tigummiinnarsinnaavaa. Atorfimmut atatillugu ini atorfeqarnermut tunngavoq, taamaalilluni atorfeqarnerup unitsinnerani qimanneqassalluni.

Annertunerusumik paasisaqarusuppit?

Atorfik pillugu annertunerusumik paasisaqarusukkuit immikkoortortaqarfimmi pisortaq Ane Wraae Nielsen, tlf. +299 58 67 89-imut, e-mail: awni@nanoq.gl, saaffigalugu pissarsiarisinnaavatit.

Qinnuteqarnissamut killiliussaq

Qinnuteqaat CV-mik aamma soraarummeernermut uppernarsaatit assilinerinik ilaqartinneqartoq linki matuma kingulianiittoq aqqutigalugu kingusinnerpaamik 31. maaji 2024-mi nassiunneqassaaq. E-mail-ikkut qinnuteqaatinik tigusisanngilagut.

Naalakkersuisut pillugu

Pissanganartunik ujarlerpit sulinerillu aqqutigalugu ulluinnarni inuunermut sunniuteqarnissat kissaatigaajuk, taamaaliornikkullu siunissamik ilusilersueqataallutit? Taava Namminersorlutik Oqartussani sulinissaq ilinnut tulluuppoq. Suliamut tunngatillugu sulisutut piginnaasaqarnissaq, pissutsinut misissuilluarsinnaaneq kiisalu allanngornernut piareersimajuarneq assut pingaartitaraagut. Tamakku saniatigut ulluinnarni suliassannik ilusilersuisinnaanerit uippakajaalertannginnissallu pingaaruteqarput.

Namminersorlutik Oqartussat tassaapput, Qitiusumik Allattoqarfik 650-it missaanik sulisulik naalakkersuisoqarfinnut arfineq-pingasunut aqutsisoqarfinnullu arlalinnut agguataarsimasut. Katilluta inuit 2500-t sinnerlugit Namminersorlutik Oqartussanut atassuteqarpugut. Qitiusumik Allattoqarfiup suliassaraa Naalakkersuisut aalajangernissaannut tutsuiginartumik tunngavissinnissaat kiisalu politikkikkut aalajangikkat piviusunngortinnissaat.

Namminersorlutik Oqartussat pillugit annertunerusumik uani atuarsinnaavutit http://www.naalakkersuisut.gl/job

Qinnuteqaat nassiuguk