AC-fuldmægtigi cyber-imi paasissutissanilu sillimaniarnermik suliaqartussaq

Cyberimi aamma paasissutissanik isumannaallisaanermi immikkoortortaqarfitsinni AC-fuldmægtig-imik pikkorissumik tunniusimasumillu sulisussarsiorpugut. AC-fuldmægtig-itut Kalaallit Nunaanni sillimaniarnermut tunngatillugu ilisimasaqarnermik siuarsaanissamut qitiusumik inissisimassaatit.

Immikkoortortaqarfimmi nutaami, Kalaallit Nunaanni cyberimi aamma paasissutissanik isumannaallisaaneq pillugu paasissutissiiinermik suliaqarfiusussami, sulilissaatit. Immikkoortortaqarfimmi sulisut sisamaapput, taakkunani immikkoortortaqarfimmi aqutsisoq ilaavoq, sulisutullu immikkoortortaqarfimmi sulisut peqatigalugit aammalu immikkoortortaqarfiup suleqatigisaannut isumasiorneq ingerlanneqartassaaq.

Akisussaaffeqarfiit:

AC-fuldmægtig-itut suliassatit pissanganartorujussuupput, tassani Kalaallit Nunaanni pisortaqarfinni innuttaasullu akornanni cyberimi aamma paasissutissanik isumannaallisaanerup qaffassarnissaanut periusissiamik inerisaallutillu atuutilersitsissaatit, suliniutinillu ingerlatsissallutit.

Immikkoortortaqarfimmi tunngaviusumik cyberimi aamma paasissutissanik isumannaallisaaneq ukkatarineqartarpoq, tassanilu Kalaallit Nunaanni pisortaqarfiit suliffeqarfiit innuttaasullu suliassaqarfiit akimorlugit cyberimi aamma paasissutissanik isumannaallisaanerup pitsanngorsarnissaanut siunnersuisarlutalu ilitsersuissaagut. Taamaattumik attaveqartariaatit aqqutigalugu suliassaqarfiit akimorlugit suleqatiginnissinnaanerit, soqutigisalinnullu suliatsinnik ingerlatitseqqissinnaanerit pingaaruteqarpoq.

Taakkua saniatigut suliassat allat pissanganartut tassaasinnaapput:

Sillimaniarnermi navianaataasinnaasuut, periutsit pitsaasullu pillugit tunngaviusumik paasissutissat pillugit attaveqarnissamut periusissiamik suliaqarneq atuutilersitsinerlu

Sillimaniarnermut navianaataasinnaasut periuserineqartartullu kingulliit pillugit paasissutissiineq aammalu Kalaallit Nunaanni pisortaqarfiit innuttaasullu navianaataasinnaasunik ilisimasaqarnissaanik qulakkeerinninniarneq tunngavigalugu paasissutissiineq

Nuna tamakkerlugu digitalinngortitsinermik periusissiami ineriartortitassatut suliniutigineqartut pillugit suliniummik ingerlatsineq, suliassat siulliit tassaapput:

• Nittartakkanik inerisaasartuutigut pikkorissorsuit peqatigalugit innuttaasunut, suliffeqarfinnut pisortaqarfinnullu cyberimi aamma paasissutissanik isumannaallisaaneq pillugu ilisimasassanik, ilitsersuutinik sakkussanillu aallerfissamik nittartagaliorneq, nittartakkap ineriartortinneqarnissaanut aqutsisuunissannut periarfissaqassaatit
• Suliniummik ingerlatsinermut immikkoortortaqarfik peqatigalugu qitiusumik allattoqarfimmi ISO 27001/2-mik atuutilersitsineq, immikkoortortaqarfimmilu ISO-mi pitsaassutsit malillugit aqutsinissamut ilusissamik ineriartortitsineq

Cyberimi aamma paasissutissanik isumannaallisaaneq pillugu pikkorissarnernik workshopinillu pilersaarusiorneq ingerlatsinerlu

Kommunit ISO 27001/2mik atuutilersitsinissaannut ikiuunneq

Innuttaasut, pisortaqarfiit suliffeqarfiillu cyberimi sillimaniarneq pillugu ilisimasaqalernissaat anguniarlugu nittartakkatigut pikkorissaanernik, allatigulluunniit sulianik akisartunik ineriartortitsineq

Ingerlatsinermi suliassat:

• Sillimaniarnermi navianaataasinnaasunik nalilersuinerit suussusersinerillu
• Paasissutissanik isumannaallisaaneq pillugu pisortaqarfinnut suliffeqarfinnullu siunnersuineq ilitsersuinerlu
• Politikkinik suleriutsinillu suliaqarneq
• Soqutigisalinnik sullissineq

Naatsorsuutigaarput:

• Suliassat aalajangersimasut pilersaarusiornissaat aaqqissuunnissaallu eqqarsaatigalugit akisussaassuseqarnissat
• Suliassat, paasissutissat, piffissaq sakkussallu oqimaaqatigiisillugillu pingaarnersiorsinnaassagitit
• Sulianik naammassisaqarusussuseqartuunissat aammalu killigititanik missingersuutinillu malinnissinnaanissat
• Suliassaqarfigisat suliffeqarfiullu suliassaqarfigisaasa akornanni ataqatigiissusermik paasinnissinnaanissat
• Suleqatikkuminartuunissat, suliassaqarfiullu iluani suleqaterpassuassannut attaveqarsinnaanissat attassisinnaanissallu
• Suleqatinnut soqutigisalinnullu pisortatigoortumik pisortatigoortuunngitsumillu attaveqarsinnaanissat

Piginnaanitit:

• Naleqquttumik ingerlariaqqiffiusumi ilinniarsimanissaq, allaffissornerup, inatsisilerinerup, inuiaqatigiinni pissutsinut taakkunanngaluunniit ilisimasaqalerfiusinnaasumi allami ilinniarsimanissaq
• ITmik digitalinngortitsinermillu misilittagaqarneq iluaqutaasinnaavoq
• Suliniummik aqutsinermik misilittagaqarneq
• Paasissutissani isumannaallisaanermik paasissutissanillu illersuinermi ilisimasaqarneq iluaqutaasinnaavoq
• Suliffeqarfinni politikkimik aqunneqartuni sulinermik misilittagaqarneq
• Kalaallisut, qallunaatut tuluttullu oqalussinnaaneq allassinnaanerlu

Atorfininnermut atatillugu ilinniartitsisoqassaaq. Atorfininnermi piginnaasat aallaavigalugit ilinniartitsinissaq ataqatigiissarneqassaaq.

Atorfininnermut atugassarititaasut

Atorfininnissamut naatsorsuutaavoq sillimaniarneq pillugu akuerineqarnissat atorfeqarnerillu tamakkerlugu isumannaallisaaneq pillugu akuersissutip attanneqarnissaa.

Digitalinngortitsinermik Aqutsisoqarfik pillugu

Digitalinngortitsinermut Aqutsisoqarfimmi siunissami digitalimik atuineq isumannaatsoq anguniarneqarpoq, aqutsisoqarfimmiillu inuiaqatigiit digitalimik aaqqissuussanik isumannaatsumik assigiissakkanillu atuisinnaanissaat qulakkeerniarneqarluni.

Digitalinngortitsinermik Aqutsisoqarfimmi Kalaallit Nunaanni aammalu Namminersorlutik Oqartussaqarfimmi IT-qarnermi atortunik digitalinngortitsinermik suliaqartarpugut. Aqutsisoqarfimmi suliassaqarfiit assigiinngillat, aqutsisoqarfiullu suliassaannut naatsorsuutit aamma assigiinngitsuullutik. Kalaallit Nunaanni digitalinngortitsinermik suliaqarnerput tulluusimaarutigeqaarput, suliarlu maniguulluta suliaralutigu. Suliassat suliarinissaannut ilisimasaqartariaqarlutalu piginnaaneqartariaqarpugut, tamannalu ulluinnatsinnik ulapaartitsillunilu allanngorartitsivoq. Ulluinnarni sulisut naammagisimaarinninnissaat anguniarlugu suliat pillugit inuttullu assigiinngissutsit ataqqillugit suleqatigiinneq qitiutillugu sulivugut – sulianillu pitsaasumik naammassinninnissaq ukkataralutigu.

Aqutsisoqarfik nunalu tamakkerlugu digitalinngortitsinermut periusissiaq digitalimik.gl aqqutigalugu paasisaqarnerusinnaavutit.

Aningaasarsiatigut atorfinitsitaanermilu atugassarititaasut

Akissarsiat atorfininnermilu atugassarititaasut, tassunga ilanngullugit atorfinitsitaanermi soraarnermilu angalanissamut akiliunneqarnissamut pisattallu nassiunneqarnerannut Kalaallit Nunaanni Namminersorlutik Oqartussat kattuffiullu isumaqatiginniarsinnaatitaasup attuumassuteqarfigisap akornanni isumaqatigiissutaasut atorfininnerup nalaani atuuttut naapertorlugit ingerlanneqassapput.

Najugaq

Atorfimmut atatillugu malittarisassat qaqugukkulluunniit atuuttut naapertorlugit sulisunut inissiamik pequsersorsimanngitsumik innersuussisoqarsinnaavoq. Inissamik innersuussisoqarsinnaanngilaq, pineqartoq atorfimmut atatillugu ineqareersuuppat, imaluunniit ineqarsimappat kommunep inaataanik Namminersorlutillu oqartussalluunniit inaataanik. Malittarisassat qaqugukkulluunniit atuuttut naapertorlugit inissiamut innersuussutigineqartumut akiliutit qularnaveeqqutillu akilerneqassapput. Atorfimmut atatillugu ini atorfeqarnermut tunngavoq atorfeqarnerullu unitsinnerani qimanneqassalluni.

Ineqarnermut akiliut aamma inissiap pitsaassusaa nikerarsinnaapput inissiap qanga sananeqarsimanera, piginnittua il.il apeqqutaallutik. Sulisutut ataavartumik initaarnissaq utaqqinarsinnaavoq, taamaattumik utaqqiisaagallartumik inissiisoqarsinnaasarpoq, tassunga ilanngullugu najugaqatigiiffinnut minnerusunut imaluunniit akunnittarfimmi inissianut inissiisoqarallarsinnaalluni, taakkulu akileraarusersorneqassallutik. Sulisunut inissiani utaqqiisaasumiklluunniit inigisani angisuunik uummasuuteqarsinnaaneq soorlu qimmeqarsinnaaneq qitsuuteqarsinnaanerluunniit periarfissaqanngilaq

Qinnuteqaatit, CV, ilinniarsimasanut pikkorissaatigisimasanullu uppernarsaatit kiisalu paasissutissat allat pisariaqarsinnaasut "qinnuteqaat nassiuguk" toorlugu nassiutikkit.

E-mail-ikkut qinnuteqaatinik tigusineq ajorpugut.

Naalakkersuisut pillugu

Pissanganartunik ujarlerpit sulinerillu aqqutigalugu ulluinnarni inuunermut sunniuteqarnissat kissaatigaajuk, taamaaliornikkullu siunissamik ilusilersueqataallutit? Taava Namminersorlutik Oqartussani sulinissaq ilinnut tulluuppoq. Suliamut tunngatillugu sulisutut piginnaasaqarnissaq, pissutsinut misissuilluarsinnaaneq kiisalu allanngornernut piareersimajuarneq assut pingaartitaraagut. Tamakku saniatigut ulluinnarni suliassannik ilusilersuisinnaanerit uippakajaalertannginnissallu pingaaruteqarput.

Namminersorlutik Oqartussat tassaapput, Qitiusumik Allattoqarfik 650-it missaanik sulisulik naalakkersuisoqarfinnut arfineq-pingasunut aqutsisoqarfinnullu arlalinnut agguataarsimasut. Katilluta inuit 2500-t sinnerlugit Namminersorlutik Oqartussanut atassuteqarpugut. Qitiusumik Allattoqarfiup suliassaraa Naalakkersuisut aalajangernissaannut tutsuiginartumik tunngavissinnissaat kiisalu politikkikkut aalajangikkat piviusunngortinnissaat.

Namminersorlutik Oqartussat pillugit annertunerusumik uani atuarsinnaavutit http://www.naalakkersuisut.gl/job

Qinnuteqaat nassiuguk