Namminersorlutik Oqartussat

Oqaatsit pingasut atorlugit Namminersorlutik Oqartussat allaaserissagukkit tassaapput pissanganartoq, unammillernartoq pingaaruteqartorlu. Pissanganarpoq assigiinngitsunik suliassaqartaqigatta. Unammillernarpoq suliassat katitigassaagajummata. Pingaaruteqarpoq aalajangiisarnivut innuttaasumut pingaaruteqartarmata. Sulinera innuttaasumut siunertaqarpat suliffiga siunertanissaaq - Janus Chemnitz Kleist

Namminersorlutik Oqartussat Qitiusumik Allaffeqarfeqarput 650 missaanik sulisulimmik. Qitiusumik Allaffeqarfiup aqqanilinnik naalakkersuisoqarfeqartup arfineq-pingasunillu aqutsisoqarfeqartup suliassaraa qinikkat tassalu Naalakkersuisut aalajangiinissaminni tunngavissaqartarnissaat qulakkiissallugu. Tamanna qulakkeerneqassaaq allaffeqarfimmi atorfilittanik nukittuunit pikkorissunik sulisulinnik.  

Namminersorlutik Oqartussat naalakkersuisoqarfii aqqanillit, aqutsisoqarfiit arfineq-pingasut immikkoortortaqarfiillu qiusup avataaniittut suliffeqarfiuvoq angisooq Kalaallit Nunaanni innuttaasunik tamanik sullissisartoq. Namminersorlutik Oqartussani sulisut 2500 missaaniipput.

Namminersorlutik Oqartussat suliffittut

Namminersorlutik Oqartussani atorfeqarnikkut Kalaallit Nunaanni inuiaqatigiinni sunniuteqaqataanissamut, allanngortitseqataanissannut ineriartortitseqataanissannullu periarfissinneqassaatit.  Naalakkersuinermik suliallit, innuttaasut, tusagassiorfiit soqutigisaqaqatigiiffiillu sullittarpagut taamaammat amerlaqisunik pissanganartunik assigiinngiiaartunillu suliassaqartarluta. Suliassat tamakku suliarinissaannut assigiinngiiaartorpassuarnik tunuliaqutaqarluta suleqatigiiaarpugut, taamaammat tamatigoortunik suleqateqalertussaassaatit.

Kalaallit Nunaanni Namminersorlutik Oqartussani sulinikkut sulisut pisortallu akornanni qanilaartumik suleqatigiittarneq misigissavat tunniussimallutillu piginnaasavillu atorluarneratigut Kalaallit Nunaata siunissaa nammineerlutit sunniuteqaqataaffigisinnaassavat.  

Suleqatitaassaraatsigit?
Alakkaruk www.naalakkersuisut.gl/job taannalu aqqutigalugu  Namminersorlutik Oqartussani atorfeqalernissamut periarfissat malinnaaffigisinnaavatit  jobagent-itsinullu ilanngullutit.
 

Naalakkersuisoqarfiit aqutsisoqarfiillu

1. Naalakkersuisut Siulittaasuata Naalakkersuisoqarfia

2. Pinngortitamut Avatangiisinullu Naalakkersuisoqarfik.

   • Aatsitassanik Suliassaqarfinnut Avatangiisinut Aqutsisoqarfik

3. Isumaginninnermut, Ilaqutariinnut, Naligiissitaanermut Inatsisinillu Atuutsitsinermut Naalakkersuisoqarfik

   • Isumaginninnermut Aqutsisoqarfik

4. Inuussutissarsiornermut, Suliffeqarnermut, Niuernermut Nukissiuuteqarnermullu Naalakkersuisoqarfik

   • Atuisartoqarnermut Unammilleqatigiinnermullu Aqutsisoqarfik

5. Aalisarnermut Piniarnermullu Naalakkersuisoqarfik

6. Aningaasaqarnermut Akileraartarnermullu Naalakkersuisoqarfik

   • Akileraartarnermut Aqutsisoqarfik

   • Aningaasaqarnermut Sulisoqarnermullu Aqutsisoqarfik

7. Ilinniartitaanermut, Kultureqarnermut, Ilisimatusarnermut Ilageeqarnermullu Naalakkersuisoqarfik

   • Ilinniartitaanermut Aqutsisoqarfik

   • Digitaliseeriinermut Aqutsisoqarfik

8. Peqqissutsimut Naalakkersuisoqarfik

   • Peqqissutsimut Pitsaaliuinermullu Aqutsisoqarfik

9. Namminiilivinnermut, Nunanut Allanut Nunalerinermullu Naalakkersuisoqarfik

10. Kommuninut, Nunaqarfinnut, Isorliunerusunut, Attaveqaqatigiinnermut Ineqarnermullu Naalakkersuisoqarfik

11. Aatsitassanut Ikummatissanullu Naalakkersuisoqarfik