Naalakkersuinikkut aqunneqartumi ingerlatsivimmi sulissallutit piumassuseqarpit? Inatsisilerituutut sulinermi piginnaaneqarluartuuguvit, ulluinnarnilu pisoqarfiusuni ingerlatsineq nuannarigukku, taava immaqa naalakkersuisoqarfitsinni Inuussutissarsiornermut niuernermullu immikkoortumi inatsisilerituussaraatsigit.

Nunanut Allanut, Inuussutissarsiornermut Niuernermullu Naalakkersuisoqarfik pillugu
Nunanut Allanut, Inuussutissarsiornermut Niuernermullu Naalakkersuisoqarfik inuussutissarsiornermut aamma niuernermut immikkoortortaqarfimmut, avataani inissisimasunut Atuisartoqarnermut Unammilleqatigiinnermullu Aqutsisoqarfimmut, Inatsisilerinermut /allaffissornermullu immikkoortortaqarfimmut kiisalu nunanut allanut immikkoortortaqarfimmut aaqqissuussaavoq.

Inuussutissarsiornermut niuernermullu immikkoortoqartarfik Namminersorlutik Oqartussat qitiusumik allaffissuata ilagaa, pisortaqarfittut suliassat inuussutissarsiornermik siuarsaanermut, takornariartitsinermut, sermimik aamma imermik nunatta avataanut nioqquteqarnermut kiisalu nunat tamalaat akornanni Kalaallit Nunaata soqutiginarsarlugu ussassaarutigisarnera suliarisarai.

Atorfik pillugu
Inuussutissarsiornermut niuernermullu immikkoortortaqarfimmi inatsisilerituutut ulluinnarni  sulinermi Naalakkersuinermik suliaqartunut inuiaqatigiinnullu avatangiiserisanut qanimut suleqatigiittoqartarpoq. Suliassat pissanganarlutillu soqutiginartut assigiinngisitaartullu suliassaraatit, soorluttaaq  inatsisissanik ilusilersuisarnermi, malittarisassiortarnermilu suliassaqarfimmi pineqartumi aalajangeeqataasassasutit. Taamaattumik ulluinnaat sukkasuunik iliuuseqarfiusartut eqqarsarasuarfiusartullu piareersimaffigissavatit. Taamaatuttaaq ingillutit inatsisissanut siunnersuusiortarnissat, immikkuualuttortassai ilanngullugit eqqarsaatigeriigassanik piareersimaffigissavatit.

Inatsisilerituutut ulluinnarni suliassatit inuussutissarsiornermut niuernermullu suliassaqarfimmi ilaatigut makkuninnga ilaqassapput:

• Inatsisissanut siunnersuusiortarneq, naalagaaffiup inatsisiliorneranut atasunik peqqussutissatut siunnersuusiortarneq aamma inatsisinik malittarisassanillu allaffissornikkut atortuulersitsisarnerit
• Inatsisinut tunngasutigut siunnersuisarneq aammalu inuussutissarsiornermut niuernermullu immikkoortortaqarfimmi suliassanik isumaginnittarneq
• Attaveqartarnerit aammalu suleqatigiinnernik danskit pisortaqarfiinni oqartussaasunut isumaginnittarnerit, tamatumani aamma danskit inuussutissarsiornermut ministeriaqarfiannut, danskit nunanut allanut ministeriaqarfiannut, sillimaniarnermut danskit aqutsisoqarfiannut, danskit inuussutissarsiornermut aqutsisoqarfiannut aammalu danskit finansministeriaqarfiannut
• Attaveqartartuusutut suliat nunat tamalaat akornanni isumaqatigiissutinut kattuffinnullu assigiinngitsunut atatillugu, soorlu ukununnga IAEA, EU il.il.
• Naalakkersuisoqarfimmi aqutsinikkut qullersaqarfimmut siunnersuisarneq isumasioqateqartarnerillu

Naalakkersuisoqarfimmi persuarsiunngitsumik periaaseqarlutalu ileqqoqarpugut, namminerisamillu iliuutsit pingaartinneqartarput ilalersorneqartarlutillu.

Ilinnit suut naatsorsuutigaagut?
Politikkip silarsuaani, kommunini, naalakkersuisoqarfinni imaluunniit allani assigusuni misilittagaqareeruit iluaqutaassaaq, taamaattorli aamma ilinniakkaminnik naammasserlaat qinnuteqarnissaannut kaammattorpavut. Suliffiup iluani avataanilu akisusaaffimmik tigusisinnaanissat, suliassanik ingerlatsisinnaanissat uatsinnut pingaaruteqarneruinnarpoq.

Piginnaanernut misilittakkanullu tunngatillugu kissaatit

• Inatsisilerituutut naammaginarluartunik suliassannut piginnaaneqarlutit ilinniarsimanissat
• Suliassatigut siammasissumik isiginnittuuneq, sukkasuumillu ajornartorsiutinik paasinnipallattarneq
• Inunnut oqaloqatigiinnikkut aamma allatatigut attaveqallaqqissuuneq
• Naammaginartunik kalaallisut, danskisut aamma tuluttut piginnaasaqarnissaq
• Suliassakkaartumik sulianik aallussillaqqissuuneq namminersorumatunerlu
• Suliassami aaqqiissutissarsisarnernut akisussaassuseqallaqqinneq
• Nunatsinni pissutsinik ilisimasaqarluarneq

Atorfininnissamut tunngatillugu
1. december 2022 imaluunniit isumaqatigiissusiornikkut.

Kandidatit eqqortunik piginnaassutsinik uppernarsaatillit, specialkonsulentitut chefkonsulentitulluunniit atorfininnissaat periarfissarisinnaavaat.

Ilassutitut paasissutissat
Atorfiit pillugit annerusumik paasisaqarumaguit Immikkoortortaqarfimmi Pisortamut Marte Lona-mut attaveqarnissamut tikilluaqqusaavutit: mlon@nanoq.gl kiisalu oqarasuaatikkut (+299) 34 65 68.
 

Aningaasarsiatigut atorfinitsitaanermilu atugassarititaasut
Akissarsiat atorfininnermilu atugassarititaasut, tassunga ilanngullugit atorfinitsitaanermi soraarnermilu angalanissamut akiliunneqarnissamut pisattallu nassiunneqarnerannut Kalaallit Nunaanni Namminersorlutik Oqartussat kattuffiullu isumaqatiginniarsinnaatitaasup attuumassuteqarfigisap akornanni isumaqatigiissutaasut atorfininnerup nalaani atuuttut naapertorlugit ingerlanneqassapput.

Najugaq
Atorfiup aappaanut atatillugu periarfissat ilagaat sulisunut inissiamik pequsersorsimanngitsumik innersuussisoqarsinnaanera malittarisassat qaqugukkulluunniit atuuttut naapertorlugit. Inissamik innersuussisoqarsinnaanngilaq, pineqartoq atorfimmut atatillugu ineqareersuuppat, imaluunniit ineqarsimappat kommunep inaataanik Namminersorlutillu oqartussalluunniit inaataanik.  Malittarisassat qaqugukkulluunniit atuuttut naapertorlugit inissiamut innersuussutigineqartumut akiliutit qularnaveeqqutillu akilerneqassapput. Atorfimmut atatillugu ini atorfeqarnermut tunngavoq atorfeqarnerullu unitsinnerani qimanneqassalluni.

Ineqarnermut akiliut aamma inissiap pitsaassusaa nikerarsinnaapput inissiap qanga sananeqarsimanera, piginnittua il.il apeqqutaallutik. Sulisutut ataavartumik initaarnissaq utaqqinarsinnaavoq, taamaattumik utaqqiisaagallartumik inissiisoqarsinnaasarpoq, tassunga ilanngullugu najugaqatigiiffinnut minnerusunut imaluunniit akunnittarfimmi inissianut inissiisoqarallarsinnaalluni, taakkulu akileraarusersorneqassallutik. Sulisunut inissiani utaqqiisaasumiklluunniit inigisani angisuunik uummasuuteqarsinnaaneq soorlu qimmeqarsinnaaneq qitsuuteqarsinnaanerluunniit periarfissaqanngilaq

Qinnuteqaatit, CV, ilinniarsimasanut pikkorissaatigisimasanullu uppernarsaatit kiisalu paasissutissat allat pisariaqarsinnaasut "qinnuteqaat nassiuguk" toorlugu nassiutikkit. 
E-mail-ikkut qinnuteqaatinik tigusineq ajorpugut.

Qinnuteqaat nassiuguk