Gå til hovedindhold
128

Dette jobopslag er udløbet

AC-fuldmægtigimik Kalaallit Nunaanni Peqqinnissaqarfimmi pisiortortarnerup pitsanngorsaaviginissaanut tamanik takunnissinnaassuseqarluartumik

 

AC-fuldmægtigimik nalilersuisarnermik nukittuumik aaqqissuussaalluartumillu suleriaasilimmik nunalu tamakkerlugu isiginnittaasilimmik Dronning Ingridip Napparsimmavissuani Nuummiittumi Pisiortortarnermut Immikkoortortaqarfimmut pissarsiorpugut.

 

Immikkoortortaqarfiup Kalaallit Nunaannut Peqqinnissaqarfimmut pisiortuussisarneq akisussaaffigaa. Nioqqutissanik kiffartuussissutinillu pisiniartarnermut sinaakkutissanik pitsaanerpaanik suliassanut tunngasunik periusissianullu tunngasunik pisiniartarnermut atuuttunik pilersitsinissaq anguniagaavoq.

 

AC-fuldmægtigitut Kalaallit Nunaanni suliffeqarfik tamakkerlugu pisiassanik pisiniartarfinnillu atuinermi assigiimmik sammiveqalernissamik assigiissaarnissamillu siunnerfeqartumik suliaqassaatit pisiniariaatsit pitsanngorsarnissaat sipaarnissamullu periarfissanik piviusunngortitsinissaq siunertaralugit. Suliassaq tamanna ilaatigut Peqqinnissaqarfimmi Pisiortortarnermut Ataatsimiititaliamit suliaqarfinnit attuumassutilinnit sinniissutitaqarfigineqartumit ikorfartorneqarpoq.

 

Nalilersuisarnikkut piginnaasatit nukittuut suliassanillu isumaginninnissamut aaqqissuussaalluartumik isiginnittaaseqarnerit tunngavigalugit ajornartorsiutaasinnaasut suussusernissaat, tigussaasunngortinnissaat allaaserinissaallu ingerlassinnaavat kiisalu sinaakkutissat Kalaallit Nunaanni Peqqinnissaqarfiup ingerlanneqarneranut pilersinneqarsimasut iluanni, aningaasaqarnikkut nunallu immikkoortuini, aaqqiissuteqarnissamik siunnerfeqartumik iliuuseqartassallutit.

 

Suliassat akisussaaffiillu pingaarnerit tassaapput:

  • Periusissiat tunngavigalugit aalajangernernik ilaatigut Pisiortortarnermut Ataatsimiititaliami suliassatigut piviusunngortitsisarneq
  • Pisiniarnernut atatillugu pisiortortarnermut politikkimik, najoqqutassanik suleriaatsinillu atuutsitsineq
  • Atuinermik kiisalu atuinermi pisiniartarnermillu pissutsinik, tassunga ilanngullugu assartuinermik atuinermik, malittarinninneq
  • Pisiortortarnermut Ataatsimiititaliap sulineranut, isumaqatigiissutit isumaqatigiinniutigineqarnerinut suliariumannittussarsiuussinernulllu kiisalu aqutsisut nalinginnaasumik aalajangiisarnerinut atugassanik paasissutissatigut tunngavissanik pilersitsineq
  • Suliffeqarfiup iluani pisiniartarnermut tunngasuni ikorfartuineq.

 

Piginnaasatit:

  • Attuumassutilimmik ingerlariaqqiffiusumik ilinniagaqarsimavutit kandidatitut qaffasissusilimmik assersuutigalugu Supply Chain Managementip iluani
  • Inuttut pissuserisannik kiinneraartuuvutit, ujartuisuullutit malartaatsuullutillu kiisalu pisiniartarnerup nalinginnaasumik pitsanngorsaavigineqarnissaanut atatillugu suleqatit nunap immikkoortuini suliassatigullu killissat akimorlugit salliutinnissaat, ataqatigiissaarnissaat, paasissutinnissaat, ilitserornissaat, malittarinissaat aalajangiusimanissaallu piginnaasaqarfigalugu
  • Inuuvutit killissanut taarsiullugu periarfissanik takunnittartoq
  • Ecelimik atuisuuvutit misilittagartooq paasissutissanullu atatillugu piginnaasaqarluarlutit pissutsini ataatsimoortuni pissutsinik ataasiakkaanik eqqummaariffiginnittoq.

 

Neqeroorutigaavut:

Immikkoortortaqarfimmut pissanganartumut ineriartortumut ilaalissaatit, tassanilu suliassanik isumaginninnermi suliassanik tunniussuisarneq namminersorlunilu akisussaaffeqarneq pingaaruteqarluinnartuullutik ulluinnarnilu ingerlatsinermi aalajangiisuullutik. Suliassanik isumaginninnermi ineriartornissamut periarfissaqarluarpoq. Immikkoortortaqarfimmit suliassanik isumaginninnermut atatillugu immikkoortortaqarfimmillu nalinginnaasumik ineriartortitsinermi tapersersoqatigiinnissaq, ikorfartoqatigiinnissaq siunersioqatigiittarnissarlu pingaartinneqarpoq. Immikkoortortaqarfik tamatigoortunik attaveqarfippassuaqarpoq kiisalu peruarsiorpalaanngitsumik oqaloqatigeeriaseqarfiulluni pitsaasunillu suleqateqarfiulluni. 

 

Ineqarneq:

Atorfimmut atatillugu inissaqartitsisoqarsinnaavoq malittarisassat sukkulluunniit atuuttut naapertorlugit. Ineqarnermut akiliutit qularnaveeqqusiussallu inissiamut innersuunneqartumut tunngasut malittarisassat sukkulluunniit atuuttut naapertorlugit akilerneqartassapput. Atorfimmut atatillugu inissiaq atorfeqartitaanermut attuumassuteqarpoq, atorfeqarnerullu unitsinneqarnerani qimanneqassalluni. Ineqarnermut akiliutit inissiallu pitsaassusaa inissiap pisoqaassusaa, piginnittut allallu apeqqutaatillugit allanngorarsinnaapput.

 

Suliffik Nuummi inissisimaffeqarpoq. Illoqarfik periarfissarpassuaqarnik neqerooruteqarpoq, ilaatigut kulturikkut illorsuarmik, filmertarfimmik, naluttarfimmik, timigissartarfinni, cafénik, neriniartarfinnik peqatigiiffinnillu assigiinngitsunik. Tamatuma saniatigut Nuup eqqaani pinngortitami sisorariartarfeqarpoq golfertarfeqarlunilu, kiisalu qajartornissamut, aalisariarnissamut, umiatsimik angalanissamut, pisummik angalanissamut sunngiffimmilu sammisassanik allarpassuarnik periarfissaqarluni.

 

Akissarsiat atorfinitsitaanermilu atugassarititaasut:

Akissarsiat atorfinitsitaanermilu atugassarititaasut, tassunga ilanngullugit sulilernermi suliunnaarnermilu akiliunneqarluni angalasinnaatitaaneq aamma pigisanik nassiussisinnaaneq, pissapput Naalakkersuisut kattuffiullu isumaqatigiinniarsinnaatitaasup akornanni isumaqatigiissut piffissap sulilerfiusup nalaani atuuttoq naapertorlugu.

 

Piffissaq suliffiusoq sapaatip-akunneranut akunnernik 40-nik sivisussuseqarpoq.

 

Sulilerneq pissaaq juulip 1-ani 2019-imi imaluunniit isumaqatigiissuteqarneq naapertorlugu.

 

Kalaallit Nunaanni Peqqinnissaqarfik suliffeqarfiuvoq pujortarfiunngitsoq.

 

Paasissutissat sukumiinerusut:

Atorfik pillugu paasissutissat sukumiinerusut pissarsiarineqarisnnaapput Pisiortornermut Assartuinermullu Pisortamut Ann Kelsenimut oqarasuaat +299 34 45 77 imaluunniit mail anke@peqqik.gl aqqutigalugit saaffiginninnikkut.

 

Akissarsiat atorfinitsitaanermilu atugassarititaasut pillugit paasissutissat nalinginnaasut pissarsiarineqarsinnaapput Peqqinnissaqarfimmi sulisoqarnermut allaffimmut mailikkut saaffiginninnikkut: personale@peqqik.gl.

 

Qinnuteqarnissamut killigititaasoq: Sisamanngorneq maaji 16-at 2019. Oqaloqatiginninnerit sapaatip-akunnerani 21-imi pinissaat naatsorsuutigineqarpoq.

 

Qinnuteqaat pisariaqartinneqartunik bilagitalik PDF-filinngorlugu Peqqinnissaqarfiup atorfinitsitsiniarnerminni atortagaannut una atorlugu nassiunneqassaaq (http://www.gjob.dk/Sogjob/opfordret-ansogning?VID=201904128)