Hans Enoksenikkut Hans Pavia Egedelu ataqqinartunut pulaartut
Nuliatik ilagalugit svenskit kunngikkormiuisa Danmarkimut tikeraarneranni qaaqqusaasimapput.
Sverigep kunngia Carl Gustaf aamma Dronning Silvia kunngissarlu Victoria Danmarkimut tikeraarput.
Kunngikkut kunngissarlu svenskit sakkutuut umiarsuaannut Visborgimut ilaallutik Københavnip umiarsualivianut tikipput chalupimullu ilaallutit Toldbodenimut tikiummata tassani Dronningimit uianillu kunngikkormiunillu tikilluaqquneqarput. Pingasunngornermi unnukkut dronningikkut Christiansborg Slottemi nerersuartitsipput sisamanngornermilu siullermik Operaenimi nalliuttorsiornartumik isiginnaartitsisoqarsinnarluni kingorna Holmenimi nerersuaqatigiittoqarpoq.
Kalaallit Nunaat sinnerlugu peqataapput naalakkersuisut siulittaasuat Hans Enoksen nulialu Aaliiaraq.
Sverigep Kalaallit Nunaanni konsulia Hans Pavia Egede nulialu Jane Carlsen aamma qaaqqusaasimapput.