Gå til hovedindhold
135

Allagarsiuteqqitaq Nutserisoq/Oqalutsi

ulloq 15. september 2017 isumaqatigiissuteqarnikkulluunniit atorfinittussaq Inatsisartut Allattoqarfiannit atorfinitsikkumaneqarpoq.

Naalakkersuinermut tunngasumik suliffimmut qanimut attaveqarusussinnaavit?

Naalakkersuinermik suliallit aalajangiisarfianni ‘pisut qeqqanni’ ulapaarfiusumi peqataarusuppit? Suliassanik ajornakusoorsinnaasartunik suliaqarnissamut kajumissuseqarpit piffissarlu annikitsoq atorlugu paasinarluartunik pilersitseqataarusuppit?

Suleqatit tunniusimasut suliumassuseqarluartullu ilisimasanik aviffigeqatigerusuppigit?

Inatsisartut Allattoqarfiat sulisunut peqataalluartunut suleqataalersussamik nutserisumik oqalutsimillu ataatsimik ulloq 1. september 2017 isumaqatigiissuteqarnikkulluunniit atorfinittussamik pissarsiorpoq. Inatsisartut Allattoqarfiat nutserisunik oqalutsinillu piginnaaneqarluartunik immikkuullarissunillu paasisimasaqarluartunik atorfeqartitaqarpoq maannalu nutserisumik oqalutsimillu piumassuseqarluartumik piginnaaneqarluartumillu pissarsiorluni. Atorfinitsitassap Inatsisartut ataatsimiinneranni toqqaannartumik oqaluttaasarnissani piareersimaffigalugulu ilimagissavaa. Tuluttut oqaaseqarlutillu allassinnaaguit iluaqutaassaaq tamannali piumasaqaataanngilaq.

Atorfinitsikkusutarput illiuppat, sullivimmi Kalaallit Nunaanni naalakkersuinermut tunngasunik suliaqarnikkut ineriartortitseqataaffiusumi sulinissamut soqutiginnittuuvutit. Ulluni ulapaarfiusuni uippalliasuunnginneq qiimasumillu pissuseqarneq pingaartippavut soorluttaaq ulapinnarnerpaaffimmi sulinissamut piumassuseqarluartuunissaq naatsorsuutigiuarneqarsinnaanissarlu pingaartikkipput.

Inatsisartut ataatsimiititaliaat peqatigalugit - Kalaallit Nunaanni avataanilu - atorfimmut atasumik angalasarnissaq naatsorsuutigineqassaaq.

Inatsisartunut ilaasortat, ataatsimiititaliat, Inatsisartut Siulittaasoqarfiata, Folketingip, nunat avannarliit allat inatsisartuisa, Nunat Avannarliit Siunnersuisoqatigiiffiata aammalu Nunat Avannarliit Killiit Siunnersuisoqatigiiffiata attaveqarfigineqartarnerat Inatsisartut Allattoqarfiata allattoqarfittut isumagisaraa kiisalu suliassat Kalaallit Nunaanni Inatsisartunut attuumassuteqartut assigiinngitsorpassuit isumagisaralugit.

Inatsisartut Allattoqarfiat oqaluttaanermik nutserisuunermillu, allattaanermik, kiffartuussinermik, naatsorsuuserinermik qarasaasialerinermillu suliaqartunik 33-nik sulisoqarpoq, taakkunanngalu 13-it annertunerusumik Inatsisartut ataatsimiititaliaannut ataavartunut siunnersuinermik allattaanermillu suliaqarput.

Inatsisartut ukiumut sapaatit akunneri 20-t tikillugit sivisussusilimmik ataatsimiittarput, ataatsimiinnerillu nalaanni suliassat nalinginnaasumit amerlanerusaqalutik.

Atorfiup imarisai suliassallu suunerinik paasissutissat Ole Heinrichimut, oqarasuaammut 34 62 48-mut imaluunniit 48 32 57-imut saaffiginninnikkut pissarsiarineqarsinnaapput.

Atorfinitsitsineq akissaateqarfik lr. 30 skalatrin 43 naapertorlugu pissaaq, tamatumalu saniatigut suliartoqquneqaratarsinnaanermut tapisiaqartitsisoqassaaq.

Malittarisassat atuuttut naapertorlugit akilerneqartussamik ineqartitsisoqarsinnaavoq. Isumaqatigiissutit atuuttut naapertorlugit pigisat nuunneqarnerat akilerneqarsinnaavoq. Nuummi inissaaleqinerujussuaq pissutigalugu inissamik tunineqarnissap tungaanut utaqqingaatsiarnissaq naatsorsuutigineqassaaq.

Qinnuteqaat paasissutissanik tamatumunnga attuumassuteqartunik ilallugu uunga nassiunneqassaaq:

Inatsisartut Allattoqarfiat
Postbox 1060
3900 Nuuk
E-mail: Inatsisartut@inatsisartut.gl

Qinnuteqaat Inatsisartut Allattoqarfiannit kingusinnerpaamik ulloq 25. august 2017 tiguneqareersimasussanngorlugu nassiunneqassaaq. Qinnuteqaat nassiunneqartoq allakkatut A-tut nassiunneqartariaqarpoq taakkulu immikkut akeqartinneqarput.