Skip to main content
96

Inatsisilerinermut immikkoortortaqarfimmut inatsisilerinermi fuldmægtigi

Misittagalinnik suleqateqarlutit immikkoortortarmi pissanganartunik suliaqarfiusumi suleqataarusuppit, taava suliffissaqartippatsigit.
 
Isumaginninnermut Inatsisinillu Atuutsitsinermut Naalakkersuisoqarfik inatsisilerinermut immikkoortortaqarfimmut fuldmægtigimik sulisussarsiorpoq. Qinnuteqartumut uppernarsarneqarsinnaasunik piginnaanilimmut atorfik immikkut siunnersortitut neqeroorutigineqarsinnaavoq.
 
Naalakkersuisoqarfimmi suliassaqarfimmi politikkikkut anguniakkat piviusunngortinnissaat suliarisarparput. Inatsisiliorneq, matumani naalagaaffimmi inatsisit Kalaallit Nunaannut atuuttussat, nunat tamat akornanni isumaqatigiissutit, periusissiat aamma suliniutit ilanngullugit. Isumaginninnikkut oqartussaaffik ilaqarpoq meeqqat inuusuttullu sumiginnakkat, inersimasut sumiginnakkat, utoqqaat inuillu innarluutillit atugarisaat inatsisitigut nukittorsarnissaat. Inatsisinik atuutsitsinermi suliaqarnermi susassaqarfinni suli Kalaallit Nunaannut nuunneqanngitsuni qallunaat oqartussaasut qanimut suleqatigisarpagut. Suleqatigiinnermi siunertaavoq inatsisinik atuutsitsinermut suliassaqarfimmi Naalakkersuisup Inatsisinik atuutsitsinermut suliassaqarfimmi periusissatut suliniutissanullu pilersaarutaanut naapertuuttumik ineriartortitsinissaq.
 
Inatsisilerinermut immikkoortortaqarfimmi sulipput immikkoortortaqarfimmi pisortaq, inatsisilerituut 4 aamma AC-fuldmægtigi ataaseq.
 
Inatsisilerinermut immikkoortortaqarfiup isumaginninnerup iluani inatsisissanut nalunaarutissanullu siunnersuutit piareersarlugillu suliarisarpai, aamma naalagaaffimmi ilaqutariinnut inatsisinillu atuutsitsinermut tunngasutigut inatsisit pillugit naalagaaffimmi oqartussaasut suleqatigisarlugit. Inatsisilerinermut immikkoortortaqarfiup Meeqqat pillugit paasisimasalittut Ataatsimiititaliaq allattaaffigivai atorfillillu ataatsimiitsitaliaanni Nordisk Ministerådip ataani peqataasarluni.
 
Tamakku saniatigut inatsisilerinermut immikkoortortaqarfiup suliassaasa ilaat tassaapput politikerinik sullissineq aamma politikerinit, innuttaasunit, kommuninit oqartussaasunillu allanit saaffiginnissutit akissuteqarfiginissaat. Tamatumani pineqarsinnaapput inatsisit nassuiarnissaannik imaluunniit nalinginnaasumik inatsisilerinermut tunngatillugu apeqqutit. Inatsisilerinermut immikkoortortaqarfik aammattaaq inatsisit pillugit apeqqutini naalakkersuisoqarfimmi immikkoortortaqarfinnut allanut aamma Isumaginninnermi Aqutsisoqarfimmut ikiuuttarpoq.
 
Suliassat tamatigoortuupput piumasaqaataavorlu suliarisat assigiinngitsut kulturillu akornanni suleqateqarsinnaaneq aamma nammineq suliassaqarfigisanut namminerisamik akisussaassuseqarsinnaaneq.
 
Ima neqeroorfigisinnaavatsigit

  • Suliffik, nammineersinnaanerup aalajangiisinnaassuseqarnerullu annertuumik pingaartinneqarfigisaat
  • Suliffik, tunniusimasunik pikkorissunillu immikkoortortaqarfimmi sulisulik
  • Suliffik ammasumik pissusilersorfiusoq, sulisullu ataasiakkaat piginnaasaannik ataqqinniffiusoq 

Suliassatit

  • Nammineerluni inatsisissanik piareersaaneq, matumani inatsisissatut siunnersuutinik nalunaarutinillu suliaqarneq ilanngullugit
  • Politikkikkut aqutsisut aalajangiinissaminnut tunngavissaasa suliarineranni pitsaassutsip qularnaarnissaanut aamma politikkikkut aalajangiussanik piviusunngortitsinermut peqataaneq
  • Inatsisitigut siunnersuineq
  • Nunat Avannarliit Ministeriisa Siunnersuisoqatigiivini atorfilittallu ataatsimiititaliani peqataaneq
  • Inatsisiliornermi apeqqutit pillugit allakkianik suliaqarneq

Ilimagisagut

  • Cand.jur.-itut ilinniagaqarputit
  • Inatsisiliornermik misilittagaqarputit, ajornanngippat inunnik isumaginninnermut inatsisitigullu pisortat ingerlanneqarnerannut suliassaqarfinninngaanniit
  • Suliffimmi politikkikkut aqunneqartumi sulinermik misilittagaqarputit (
  • Nammineerlutit akisussaaffik tigusinnaavat, nammineerlutillu sulisinnaallutit
  • Suleqatigiinnermi sunneqatigiittarneq oqartussaasoqarfiillu assigiinngitsunik suliallit akornanni suleqatigiinneq pingaartippatit
  • Suliannut suleqatinnullu ammasumik inussiarnersumillu pissuseqarputit
  • Ilusilersorluakkamik suleriaaseqarputit, aamma tunniussivissatut killiffiliussat pitsaassuserlu ukkatarivatit
  • Allannguinissamut piareersimavutit suleqatikkuminartuullutillu 

Kalaallit Nunaanni inuiaqatigiinni pissutsinik kulturimillu ilisimasaqarneq iluaqutaassaaq, piumasaqaataananili.
 
Ilimagisinnaavat suliaq nikerartoq pissanganartorlu, ilaanni ulapiffiusinnaaqisoq, aammali qinnuteqaateqartumut eqqortumut unamminarlunilu pissanganarluartoq.
 
Inatsisilerinermut immikkoortortaqarfimmi inatsisilerituutut suleqatitit inatsisinut tunngasutigut siunnersorsinnaassavatit, taamaammallu isumaginninnermut tunngasutigut malittarisassat atuuttut pillugit ilisimasaqarluartariaqarlutit, taamatullu pisortani ingerlatsinermi inatsisit ilisimasariaqarlugit. Qinnuteqartup eqqortup toqqarniarnerani inuttut inerisimassutsit sulinikkullu misilittakkatit pingaartinneqassapput.

Aningaasarsiatigut atorfinitsitaanermilu atugassarititaasut
Akissarsiat atorfininnermilu atugassarititaasut, tassunga ilanngullugit atorfinitsitaanermi soraarnermilu angalanissamut akiliunneqarnissamut pisattallu nassiunneqarnerannut Kalaallit Nunaanni Namminersorlutik Oqartussat kattuffiullu isumaqatiginniarsinnaatitaasup attuumassuteqarfigisap akornanni isumaqatigiissutaasut atorfininnerup nalaani atuuttut naapertorlugit ingerlanneqassapput.

Najugaq
Atorfimmut atatillugu malittarisassat qaqugukkulluunniit atuuttut naapertorlugit sulisunut inissiamik pequsersorsimanngitsumik innersuussisoqarsinnaavoq. Malittarisassat qaqugukkulluunniit atuuttut naapertorlugit inissiamut innersuussutigineqartumut akiliutit qularnaveeqqutillu akilerneqassapput. Atorfimmut atatillugu ini atorfeqarnermut tunngavoq atorfeqarnerullu unitsinnerani qimanneqassalluni.

Ineqarnermut akiliut aamma inissiap pitsaassusaa nikerarsinnaapput inissiap qanga sananeqarsimanera, piginnittua il.il apeqqutaallutik. Sulisutut ataavartumik initaarnissaq utaqqinarsinnaavoq, taamaattumik utaqqiisaagallartumik inissiisoqarsinnaasarpoq, tassunga ilanngullugu najugaqatigiiffinnut minnerusunut imaluunniit akunnittarfimmi inissianut inissiisoqarallarsinnaalluni, taakkulu akileraarusersorneqassallutik.

Ulloq atorfiniffissaq 
1. septembari 2018, isumaqatigiissuteqarnikkulluunniit.
 
Paasissutissat annertunerusut:
Isumaginninnermut Inatsisinillu Atuutsitsinermut Naalakkersuisoqarfik pillugu annertunerusumik paasissutissat uani takusinnaavatit: www.naalakkersuisut.gl. Atorfik pillugu annertunerusumik paasiniaaniaruit immikkoortortaqarfimmi pisortaq Trine Foldager allaffigisinnaavat email una atorlugu: trif@nanoq.gl imaluunniit +299 546647-mut sianerlutit. Eqqaamajuk nalunaaqutaq Danmarkimiit nalunaaquttap-akunnernik 4-nik nikingammat.
 
Qinnuteqarnissamut killiliussaq
30. juli 2018.

Qinnuteqaatit, CV, ilinniarsimasanut pikkorissaatigisimasanullu uppernarsaatit kiisalu paasissutissat allat pisariaqarsinnaasut "qinnuteqaat nassiuguk" toorlugu nassiutikkit. 
E-mail-ikkut qinnuteqaatinik tigusineq ajorpugut.

 

Naalakkersuisut pillugu
Pissanganartunik ujarlerpit sulinerillu aqqutigalugu ulluinnarni inuunermut sunniuteqarnissat kissaatigaajuk, taamaaliornikkullu siunissamik ilusilersueqataallutit? Taava Namminersorlutik Oqartussani sulinissaq ilinnut tulluuppoq. Suliamut tunngatillugu sulisutut piginnaasaqarnissaq, pissutsinut misissuilluarsinnaaneq kiisalu allanngornernut piareersimajuarneq assut pingaartitaraagut. Tamakku saniatigut ulluinnarni suliassannik ilusilersuisinnaanerit uippakajaalertannginnissallu pingaaruteqarput. 

Namminersorlutik Oqartussat tassaapput, Qitiusumik Allattoqarfik 650-it missaanik sulisulik naalakkersuisoqarfinnut arfineq-pingasunut aqutsisoqarfinnullu arlalinnut agguataarsimasut. Katilluta inuit 2500-t sinnerlugit Namminersorlutik Oqartussanut atassuteqarpugut. Qitiusumik Allattoqarfiup suliassaraa Naalakkersuisut aalajangernissaannut tutsuiginartumik tunngavissinnissaat kiisalu politikkikkut aalajangikkat piviusunngortinnissaat. 

Namminersorlutik Oqartussat pillugit annertunerusumik uani atuarsinnaavutit http://www.naalakkersuisut.gl/job

Qinnuteqaat nassiuguk