Skip to main content
82

Dette jobopslag er udløbet

Namminersorlutik Oqartussat kantiinamut/nerisassiornermut assistentinik marlunnik sulisussarsiorput

Nutaanik pilersitsisinnaavit, suleqatigiinnullu nutaanut ilannguterusuppit, peqqinnissamik sammisaqartumik inuttullu malunniuteqarnissamut periarfissaqarluarlutit, taava Namminersorlutik Oqartussat kantiinaani kantiinamut/nerisassiornermut assistentinik marlunnik piaartumik atorfinissinnaasunik kingusinnerpaamillu apriilip 10-ani sulisussarsiorpugut.

Kantiina pillugu:
Kantiina Namminersorlutik Oqartussani sulisunut, kiisalu Naalagaaffiup politiivini Naalagaaffiullu  Sinniisoqarfiani atorfilinnut inniminnigaavoq ulluinnarnilu atuisut 150-it sullittarlugit.  Maannakkut kantiina allanngortiterlugu sanaqqinneqarpoq aamma sassaalliutinik nammineq tigooqqaasarfimmut nutaamut najoqqutassiaq pissanganartumik peqqinnerulernissamut siuarsaatitalik ammaqqissaaq ulloq 19. april 2017-imi ammaqqissaaq.

Kantiinap neqeroorutigai piffissami 07:30 – 15:00 ullaakkorsiutit, ullup qeqqani nerisassat, akorninnakkut nerisassat ullullu tamaasa nerisassat piariikkat annissassat.

Kantiinap nerisassat qaffasissumik pitsaassusillit sassaalliutigisarpai kiisalu kantiinamut neriartortartut assigiinngisitaartunik pitsaasunik misigisaqartittassallugit. Tamanna nerisassanik mamarluartunik nererusussuseqalersitsisartunik, peqqinnartunik toqqaanissamut kajumilersitsinikkut qulakkeerneqassaaq. Nerisassat tunisassiassanit nutaarluinnarneersuussapput inuussutissaqarnermikkut qaffasissumik pitsaassusillit piffissamilu saqqumilaarnermeersuussallutik. Nerisassiorneq avatangiisit eqqarsaatigalugit akisussaassuseqartumik suliaassaaq nerisanik igitsisarneq annikillisinneqarsimassalluni kalaaliminernillu tunisassianit atuiffiussalluni.

Kantiinap matuni ammaqqippagit, peqqinnartunik nerisaqarnissamut politikki ilanngullugulu atuisut sapigallit kiisalu qajuusani protreinimik aamma immuup sukkuanik arrortitsisinnaanngitsunut isiginninniarneq atuutilissaaq.

Igaffik tamakkerlugu nutarterneqarpoq aamma nillataartitsivinnik qerititsivinnillu atortorissaarusersorneqarpoq nutaaliaasunillu pilersorneqarluni.

Kantiina ingerlaavartumik ilinniartoqartarpoq Suliffissarsiuussisarfillu suleqatigalugu suliffeqanngitsunut sivikitsumik suliffimmik misiliinissamut neqerooruteqartarluni.

Atorfik pillugu:
-   Kantiinami/inuussutissalerinermi ikiortimik pissarsiorpugut, suleqatigiinnut allanngornissamut piareersimasunut ilanngunnissamik piareersimasumik, peqqinnartunik pilersaarusiami ineriartortittuarnissaanik ukkassisumik.
-   Inuttut assassorlutit suliavit takutinnissaanut periarfissaqarluassaatit ulluinnarnilu namminiussuseqartumik sunniuteqarlutit. Piffissaq suliffiusoq allanngorartuunngilaq, piffissaq suliffiusoq ullukkoorpoq aamma unnukkut imaluunniit sapaatip akunnerisa naanerineri sulisoqartanngilaq.

Naatsorsuutigaarput illit:                  
-   Ullaakkorsiutinik, ullup qeqqanut, akornatigullu nerisassanik sassaalliutit aammalu nerisassanut piariikkanut annissassanut kiisalu ataatsimiinnernik aaqqissuussinerni il. il. nerisassanik allanngorartunik illinnartunillu tunisassioqataassaatit tunniusseqataallutillu.
-   Sukkortunut inunnullu immuup sukkuanik akulinnut qajuusiassallu proteiniinut sapigalinnut sammisillugit nerisassat illinnartut tunniussinnaallugit
-   Nammineertoq, nutaanik pilersitsisinnaassaatit pikkorillutit silatussaartuullutillu.
-   Suleqatiginnikkusuttuuvutit, suliniuteqarumatuujullutit kiisalu akisussaassuseqarluarlutit, suliavillu naammassinissaasa tungaanut malinnaavigisassallugit. Suliartornissamut aalajaatsuusutit takutilluarsinnaasutillu.
-   Naleqquttumik suliamik ilinniagaqarsimasutit nerisassanik tunioraasutut kantiinamilu ikiortitut,/inuussutissalerinermut ikiortitut imaluunniit inuussutissarsiutigalugu bacheloritut.
-   Naleqquttumik misilittagalik – sulisut kantiinaannit ullormullu nerisassanik nerisassiornermik.
-   Igaffimmi eqqiluisaarnermik aqutsisinnaassallutit.
-   Iluaqutaassaqaaq kalaallisut danskisullu oqallorikkuit.

Neqeroorutigaavut:
-   Suliffik pissanganartoq akisussaassuseqartorlu
-   Suleqatigiinnut nutaanik pilersitsisinnaasunut ilanngunnissat, utertitsivigeqatigiinnerlu qitiutillugu isumassarsiamiit piviusunngortitsinermut sivikitsumik sulisinnaassallutit. Suliffeqarfik pitsaasunik avatangiisilik, immitsinnut paaraluta ataasiakkaat peqqinnerat atugarissaarnermillu annertuumik pingaartinneqarlutik.
-   Suliffeqarfik nutaaq pissanganartunillu avatangiisigissaartoq
-   Iluatsitsilluarnermut peqataalernissaq
-   Sapaatip akunneranut akunnerit 40-it suliffiusarput, unnukkut akunnerullu naaneri sulinngiffiusarlutik.
-   Suleqatigiinnut sisamaasunut ilanngutissaatit
-   Isumaqatigiissutit atuuttut naapertorlugit aningaasarsiaqarnermi  atorfeqartitaanermilu atugassarititat.

Attaveqarfissaq qinnuteqarnerlu
Atorfik pillugu apeqqutissaqaruit, tikilluaqquneqarputit saaffigissallugu Immikkoortortaqarfiup pisortaa Lise Sand Ellerbæk uani liel@nanoq.gl imaluunniit ugguuna +299 34 66 81. Kalaallit Nunaanni Namminersorlutik Oqartussat pillugit paasissutissat nalinginnaasut pissarsiarineqarsinnaapput nittartakkakkut www.naalakkersuisut.gl.

Qinnuteqaat nalunaaqutserneqassaaq ”Nerisassiornermut assistenti” tassungalu ilanngunneqassapput CV, ilinniagaqarsimanermut uppernarsaat, karakteerit nuutinneri kiisalu ilanngussassat suliffimmut attuumassuteqartut allat.

Qinnuteqarnissamut piffissaliussaq tassaavoq martsip 21-at 2017. Oqaloqateqarnerit ingerlaavartumik ingerlanneqassapput. Atorfik ujarneqassaaq www.naalakkersuisut.gl-imi atorfiit aqqutigalugit.

Akissarsianut atorfinitsitaanermullu tunngasut
Akissarsiat atorfinitsitaanermilu atugassarititaasut, taakkununnga ilaallutik atorfininnermi soraarnermilu angalasinnaanermut kiisalu pisattat nassiunneqarneranni aalajangersakkat aallaavigalugit Kalaallit Nunaanni Namminersorlutik Oqartussat sulilertussallu kattuffiata isumaqatiginninniarsinnaatitaasup akornanni isumaqatigiissutit naapertorlugit pissapput.

Ineqarneq
Atorfimmut atatillugu sulisunut inissiamik innersuussisoqassanngilaq.  Qinnuteqartorli Namminersorlutik Oqartussani atorfeqarnini aqqutigalugu sulisutut ineqareersimaguni sulisunut inissiamik innersuussiffigineqarsinnaanini attatiinnassavaa. Atorfimmut atatillugu ini atorfeqarnermut tunngavoq atorfeqarnerullu taamaatinneqarnerani qimanneqassalluni

Søg stillingen online