Skip to main content
85

Dette jobopslag er udløbet

Naalakkersuisut Siulittaasuata Naalakkersuisoqarfianut inatsisileritooq

Naalakkersuisut Siulittaasuata Naalakkersuisoqarfianni inatsisilerituumik pisortani inatsisilerinermik soqutiginnillunilu ilisimasalimmik pissarsiorpoq Inatsiseqarnermut immikkoortortaqarfiup suliassanut isumaginninneranik ingerlatseqataasussamik, tassanilu suliassanik aallussinermi inatsisinillu nassuiaasarnermi inatsisilerineq aqqutigalugu tunuliaqusiisartussamik.

Siulittaasup Naalakkersuisoqarfia
Namminersorlutik Oqartussat oqartussaaffigilersimasaminni inatsisiliortussaatitaaneq aamma inatsisinik atuutsitsisussaatitaaneq suliassaqarfittut tigunikuuaat. Inatsisiliortussaatitaaneq Inatsisartuniippoq, inatsisinillu atuutsitsisussaatitaaneq Naalakkersuisuniilluni.

Naalakkersuisut naalakkersuisoqarfinnut qulinnut pisortaqarfimmullu ataatsimut agguataagaapput.

Naalakkersuisut Siulittaasuata Naalakkersuisoqarfiatap Kalaallit Nunaanni naalakkersuisut siulittaasuat sullitaraat Naalakkersuisullu politikkiat ataqatigiissaassallugu, Naalakkersuisut siunnersuutaat Inatsisartunit isummerfigineqartussat isumagissavaat aammalu suliniutit nassuiaatillu Naalakkersuisoqarfiit akimorlugit suliassat ingerlattassallugit.

Inatsiseqarnermut immikkoortortaq
Inatsiseqarnermut immikkoortortaq Siulittaasup Naalakkersuisoqarfiata ataaniippoq. Immikkoortortap suliassai ilaatigut makkuupput:

-   Naalakkersuisut siulittaasuannik Naalakkersuisoqarfinnillu inatsiseqarnikkut siunnersuisarneq, taamatullu inatsisit tunngavigalugit allakkiortarneq akissusiortarnerlu
-   Naalakkersuisoqarfiit ataasiakkaat, Inatsisartut Allattoqarfiat danskilluunniit oqartussat suleqatigalugit inatsisissanik piareersaasarneq pilersaarusioqatigiittarnerlu
-   Inatsisartut Naalakkersuisullu akornanni suleqatigiinnermut tapersersuisuuneq, taassumalu iluani ataatsimiititaliat inatsisissanik suliaqartut peqataaffigalugit
-   Inatsisitigut najoqqutassiat taakkulu atuutilersinneqarnissaat saqqummiunneqarnissaallu suliaralugit
-   Inatsisartut ataatsimiinnissaat ataqatigiissaarinikkut aaqqissueqataaffigalugit, taassumalu iluani qulequtat Naalakkersuisut ataatsimiinnerni saqqummiussassaat nalunaarutigisarlugit
-   Inatsisit ingerlatsinissamut suliassat Naalakkersuisoqarfiit akimorlugit suleqatigiinnikkut ingerlanneqartartut suleqataaffigalugit

Inatsiseqarnermut immikkoortortaqarfimmi inatsisilerituutut uummaarissumik Naalakkersuisut Siulittaasuata Naalakkersuisoqarfiani suliffeqassaatit.

Suliakkiussat assigiinngiiartut tigusarumaarpatit, taamaattoq aamma suleriaatsinut sunniuteqaqataasarnissamut periarfissaqarluassaatit suliassallu annertunerusut immikkoortortaqarfimmi naalakkersuisoqarfimmilu suleqatitit peqatigalugit suliarisarumaarpatit aamma suliakkut ineriartornissamut ilinniaqqinnissamullu pilerinartunik periarfissinneqassaatit.

Ilinnut tunngasut
Cand. jur.-itut ilinniarsimasuussaatit pitsaasumik teorit toqqammavigalugit tunuliaqutaqarluartoq, aamma:

-   suliassanut nutaanut pilertortumik isersinnaassuseqassaatit,
-   ataatsimoorussamik naliliisarnermut ammasuussaatit, eqaatsumik pissuseqassaatit, allanngortoqariataaraangat piareersimasassaatit, namminersortuussaatit, eqinnaatsuussaatit nikeriallaqqissuseqartuussaatillu
-   suleqatit tunniusimasut inatsisitigut suliaqarnermi toqqammaveqarluartut amerlanngitsut akornanni suleqataarusussaatit nammineq suliassannut piffissamullu killissarititaasunut akisussaaffeqassaatit
-   oqaatsit allattariarsornerlu atorlugit attaveqarluarsinnaassuseqassaatit
-   sulinermi sinaakkutissiat aaqqissuussaasut akimorlugit suleriaaseqarsinnaassasutit, aamma
-   qiimasuussaatit suleqatigiillu persuarsiorpallaanngitsut akornanniinnissaq kajumissuseqarfigissavat

Kalaallisut danskisullu marluinnik oqaaseqartuuneq iluaqutaassaaq

Aningaasarsiaqarnermut atorfininnissamullu tunngasut
Aningaasarsianut atorfininnissamullu tunngasut, tassungalu atatillugu atorfininnermi soraarnermilu angalanissamut tunngasut pequtillu assartuunneqarnissaat Namminersorlutik Oqartussat kattuffillu nammineq ilaasortaaffigisap akornanni isumaqatigiissutit naapertorlugit ingerlanneqassapput.

Atorfinittussatut piukkunnaateqartumut inatsisilerineq aqqutigalugu ukiuni arlalinni pisortani inatsisilerinermik suliassanik aallussaqartareersumut (ingerlatsinermi inatsisimmik) imalt. inatsisinik nassuiaanermik inatsisitigulluunniit najoqqutassiat atuutilerneqarnissaallu pillugit aallutaqarsimagaanni atorfinitsitsineq naliliisoqareerneratigut immikkut ilisimasalittut siunnersortitut atorfinitsitsisoqarsinnaammat.

Ineqarneq
Atorfimmut atatillugu inissiamik pequsersorneqanngitsumik aalajangersakkat qaqugukkulluunniit atuuttut naapertorlugit pilersorneqassaatit. Inigisamut akiliutissat siumoortumillu akiliutissat aamma aalajangersakkat qaqugukkulluunniit atuuttut naapertorlugit akilerneqartassapput. Inigisassaq atorfimmut atavoq, atorfiullu qimanneqarnerani aamma qimanneqassalluni.

Ineqarnermut akiliutit inigisallu pitsaassusia allanngorarsinnaavoq inigisap pisoqaassusia, piginnittuuneq il.il. naapertorlugit. Inissamut utaqqisuuniittoqariataarsinnaavoq, taamaattoqarpat vakantertoqarsinnaalluni, imalt. ineqateqartoqarallarsinnaalluni hotellejlighediniluunniit inissiisoqarallarsinnaalluni, taakku skatimut akileraarutaasarput aamma.

Naalagaaffimmi kommuneqarfinnilu atorfeqartut piffissamik killilersugaanngitsumik sulinngiffeqarnissamut pisinnaatitaaffeqarput Namminersorlutik Oqartussani atorfinikkunik.

Qinnuteqaateqarnissamut ulloq killigititaq: aprilip 18-at 2017, nal.12.00.

Atorfiniffissaq: Junip aallaqqaataani 2017 imalt. immikkut isumaqatigiissuteqarnikkut.

Atorfininnissaq pillugu oqaloqateqartarnissat pissapput sap. ak. 17-mi/2017.

Paasissutissat allat
Atorfiit pillugit annerusumik paasisaqarusukkuit Inatsisilerinermut Pisortaq Flemming S. Hedegaard attavigisinnaavat e-mail: flsh@nanaoq.gl imalt. oqarasuaat + 299 345131.

Søg stillingen online