Skip to main content
96

Namminersorlutik Oqartussani Inuutissarsiornermut, Suliffeqarnermut, Niuernermut Nukissiuuteqarnermullu Naalakkersuisoqarfimmi sulianik ingerlatsisussanik pissarsiorpoq

Inuiaqatigiinni ineriartortitsinissaq anguniarlugu ukiuni makkunani annertuumik Kalaallit Nunaanni inuutissarsiornikkut suliffeqarnikkullu piorsaaneq nutarterinerlu aallunneqarpoq. Inuutissarsiornermut, Suliffeqarnermut, Niuernermut Nukissiuuteqarnermullu Naalakkersuisoqarfik ineriartortitsinermut qitiulluinnartumik inissisimavoq. Ineriartortitsinermut killiliussat eqqortut pisariaqarput, tunngaviullutillu ineriar-tornermut siuariartornermullu, nunatsinni suliffissaqartitsinerup annertusiartornerani. 

 

Ineriartorneq taama siunertalik peqataaffigerusuppiuk? Atorfik pillugu paasissutissat atuakkit.

 

Atorfik

Suliffeqarnermut Immikkoortortaqarfimmi inissisimassaatit, taamaasillutit suleqatit allat peqatigalugit immikkoortortaqarfimmi ulluinnarni ingerlatsineq ineriartortitsinerlu peqataaffigissavatit. Suliassat assigiinngitsut aalluttassavatit, aaliangersimasut - suliassallu immikkoortut ataasiakkaat. 

 

Suliassat aaliangersimasut ilagaat Majoriami nalunaarsuinermut it-mik atortorissaarutinik (IT-reg.) aammalu nuna tamakkerlugu suliffissanut nittartakkap Suli.gl-ip ineriartortinneqarnerat aammalu atortuulersitsiatuaarnerat, matumani aamma taakkunannga atuisunik pikkorissaanerit.

 

Illit

Naalakkersuisoqarfiup kissaatigaa, illit inuttut:

  • Aaqqissuulluagaasumik, peqqissaartumik unneqqarissumillu suleriaaseqarnissat.
  • Kalaallisut allatani oqaluinnarnikkullu paasiuminartunik oqariartuuteqarsinnaasutit
  • Aaqqissuussillaqqissuusutillu
  • Ikiuukkumatuujullutit, kiffartuussillaqqissuullutit akisussaassusermillu ilisimaarinnittuusutit
  • Kalaallit kulturiannik inuiaqatigiinnillu ilisimasaqartutit

 Tamatuma saniatigut naalakkersuisoqarfiup kissaatigaa:

  • Atorfimmut tulluartumik ilinniagaqartuusimanissat soorlu sivikitsumik sivisujaamilluunniit ingerlaqqiffiusumik ilinniagaqartuusimassasutit.
  • Sulianik ineriartortitsinermik aamma suliniutinik – projektinik – ingerlatsinermut piginnaaneqarluartoq
  • Excel-imik Word-imillu atuilluarsinnaasutit
  • Oqaatsinut piginnaasaqarluarlutit

 

Akissarsiat atorfinitsitaanermilu atugassarititaasut

Akissarsiat atorfininnermilu atugassarititaasut, tassunga ilanngullugit atorfinitsitaanermi soraarnermilu angalanissamut akiliunneqarnissamut pisattallu nassiunneqarnerannut Kalaallit Nunaanni Namminersorlutik Oqartussat kattuffiullu isumaqatigiinniarsinnaatitaasup attuumassuteqarfissap akornanni isumaqatigiissutaasut atorfininnerup nalaani atuuttut naapertorlugit pissaaq.

 

Ineqarneq

Atorfimmut atatillugu malittarisassat qaqugukkulluunniit atuuttut naapertorlugit sulisunut inissiamik pequ-sersorneqanngitsumik innersuussisoqarsinnaavoq. Malittarisassat qaqugukkulluunniit atuuttut naapertorlugit inissiamut innersuunneqartumut akiliutit qularnaveeqqutillu akilerneqassapput.  Atorfeqarnermut atatillugu ini innersuussaammat atorfiup unitsinnerani qimanneqartussaavoq

Ineqarnermut akiliutit inissiallu pitsaassusaat assigiinngiiaarsinnaapput, inissiap qanga sananeqarsimanera piginnittua il.il. apeqqutaallutik. Sulisunullu ataavartumik initaarnissaq utaqqinarsinnaavoq, utaqqiisaagallartumillu inissiisoqarallarsinnaasarpoq, soorlu najugaqatigiiffinnut minnerusunut imaluunniit akunnittarfimmi inissianut inissiisoqarallartarluni, taakkulu akileraarusersorneqartarput.

 

Annertunerusumik paasissutissat

Atorfik inuttassarsiuullugu allagarsiunneqartoq pillugu apeqqutissaqaruit, Suliffeqarnermut  immikkoortortaqarfiup pisortaa Isak Nielsen Kleist isnk@nanoq.gl  imaluunniit oqarasuaat  34 56 70 atorlugu attaveqarnissannut tikilluaqqusaavutit.

 

Qinnuteqaat:

Piffissaq qinnuteqarfiusussaq 31. januar 2018-mut killeqarpoq.

 

Atorfimmut atatillugu oqaloqateqarnerit ingerlaavartumik pissapput. Atorfimmut qinnuteqaat nanoq.gl aqqutigalugu pissaaq, qinnuteqaat ilinniarsimanermik, siornatigut  atorfeqarnermi sulerisarsimanernik kiisalu pillagaasimanngitsutut allagartaq ilanngullugu assilineqarneri qinnuteqaammi nassiunneqassapput.

Søg stillingen online