Skip to main content
80

Dette jobopslag er udløbet

Inuttassarsiuteqqitaq – Namminiilivinnermut, Nunanut Allanut Nunalerinermullu Naalakkersuisoqarfimmut Naalakkersuisoqarfiup pisortaa

Namminiilivinnermut, Nunanut Allanut Nunalerinermullu Naalakkersuisoqarfimmi naalakkersuisoqarfiup pisortaatut atorfimmut pisortaq misilittagalik, nunat tamalaani misilittakkanik uppernarsaatissaqartoq Namminersorlutik Oqartussat ujarpaat.

Aaqqissuussiffik
Namminiilivinnermut, Nunanut Allanut Nunalerinermullu Naalakkersuisoqarfik maannakkut 18-inik sulisoqarpoq. Naalakkersuisoqarfimmiippoq nunanut allanut immikkoortortaq, ilaalluni protokolinut atuuffik, aamma Bruxellesimi Washingtonimilu sinniisuutitanut allaffeqarfiit, namminiilivinnermut immikkoortortaq, nunalerinermut immikkoortortaq, kiisalu ataatsimoorussatut allaffeqarfik, aamma naalakkersuisumut allatsitut sullivik.

Naalakkersuisoqarfimmi suliassat pingaarnerpaat tassaapput:
Namminiilivinnermut, Nunanut Allanut Nunalerinermullu Naalakkersuisumik sullissillunilu siunnersuisarneq.
Kalaallit Nunaanni nunat tamalaani pissutsinik soqutigisarisanut tunngatillugu Naalakkersuisup akisussaaffigisaanik pingaarnerutitatut isumaginninnerit:

  • Nunat Avannarlerni aamma Issittumi suleqatigiinnermi, kiisalu Naalagaaffiit Peqatigiinni (FN-imi) suliarisani Kalaallit Nunaata peqataaneranik ataqatigiissaarineq atortulersuinerlu
  • EU-mut, USA-mut, Canadamut, Islandimut nunanullu suleqatigisanut allanut naleqqiullugu Kalaallit Nunaata soqutigisaanik ataqatigiissaarineq atortulersuinerlu
  • Nunanut allanut niuernermi naalakkersuinikkut apeqqutit, ilanngullugit WTO
  • Nunat tamalaani silap pissusaa pillugu isumaqatiginninniarnerni Kalaallit Nunaata soqutigisaanik isumaginninneq
  • Illersornissamut sillimaniarnermullu naalakkersuinikkut apeqqutit
  • Naalagaaffigisaq imartamullu inatsisaasut
  • Inuiaat akornanni kattuffinnut attuumassutilittullu NGO-mi kattuffinnut naleqqiullugu ataqatigiissaarineq aamma siunnersuineq
  • Naalakkersuisunut nunanit allanit tikeraartoqarnermi, aamma Naalakkersuisut nunanut allanut tikeraarnerannut protokoliliorneq
  • Inatsisartunut Nunanut allanut aamma Sillimaniarnermut naalakkersuinikkut Ataatsimiititaliamut naleqqiullugu Naalakkersuisut isumagisaannut nunanut allanut aamma sillimaniarnermut naalakkersuinikkut sammisat pillugit nassuiaatinik paasissutissanillu piareersaanerit

Namminiilivinnermut tunngatillugu Naalakkersuisup akisussaaffigisaanik pingaarnertut isumagisaqarfiit:

  • Namminiilivinnerup angusarinissaanut attuumassuteqartunik pissutsinik misissuinermut, qulaajaanermut paasissutissiinermullu tunngatillugu ataqatigiissaarineq aamma ilitsersuineq
  • Namminiilivinneq pillugu innuttaasunik ilanngussuinermut aamma innuttaasunik ataatsimiisitsinermut tunngatillugu ataqatigiissaarineq aamma ilitsersuineq
  • Kattuffinnik attuumassuteqartunik pisortaqarfinnillu allanik attaveqarfinnik ineriartortitsineq

Nunalerinermik inuussutissarsiorfimmut tunngatillugu Naalakkersuisup akisussaaffigisaanik suliassaanillu pingaarnertut allaffissorlunilu aqutsineq:

  • Nunalerinermi inuussutissarsiutit piujuartitsisumik tulluartumillu ineriartortitaanissaannik qulakkeerinninneq, aamma inuussutissarsiutini taakkunani unammillersinnaassutsip nukittorsarnera
  • Nunatanik naatitsiviusunik, nunatanik ivigartorfinnik, nunatamilu naleqassutsinik attuumassuteqartunik assiaqusersuineq, taamaalilluni avatangiisinut avatangiisumut, allatut inuussutissarsiornermut tunngassutilittut suliaqarnermut, nunalerinermilu inuussutissarsiorfimmi aningaasaqarnikkut soqutigisarisanut sianigisassat isumagineqassallutik
  • Nunalerinermut Siunnersuisooqatigiinnik kiffartuussineq Naalakkersuisoqarfimmi siulersuisut ullumikkut tassaapput naalakkersuisoqarfiup pisortaa, immikkoortoqarfinni pisortat marluk, aamma protokolimut pisortaq ataaseq. Naalakkersuisoqarfimmi siulersuisut naalakkersuisoqarfiup sulisuinut akisussaaffigisamik isumaginnipput, ilanngullugit Københavnimi Kalaallit Nunaata Sinniisoqarfiani, Bruxellesimi aamma Washingtonimi sulisut.

Akisussaaffeqarfik
Naalakkersuisoqarfiup pisortaata pingaarnertut suliassai tassaapput naalakkersuisoqarfimmi suliassat pingaarnerit aallaavigalugit naalakkersuisoqarfiup ulluinnarni siulersorneqarnera, kiisalu naalakkersuisoqarfiup akisussaaffeqarfiata iluani Naalakkersuisup siunnersorneqarnissaa. Naalakkersuisoqarfiup pisortaata naalakkersuinikkut suliniutit atuutsilernissaat qulakkiissavai, kiisalu naalakkersuisoqarfiup akisussaaffeqarfiisa iluanni ineriartortitseqataassaaq.

Naalakkersuisoqarfiup pisortaata aamma makku akisussaaffigai:
Naalakkersuinermi siulersuinermut aalajangiussaqarnermut tunngavigisanik suliaqarneq, aamma anguniakkanik inerniliussanillu angusaqarnerit sammisaralugit naalakkersuinermi aalajangiussanik atuutsitsilerneq.

Naalakkersuisoqarfinnut allanut, aqutsisoqarfinnut, immikkoortortaqarfiusunut, suliffeqarfinnut, sullissivinnut suliaqartunullu allanut tunngatillugu naalakkersuisoqarfiup suliassanik iluarsiiviginninneranik ataqatigiissaarineq, kiisalu taakkulu ilorraap tungaanut suleqatigiinnermi attaveqarnermut ingerlatsisuunissaq.

Nalinginnaasumik allaffissornikkut najoqqutassanik, ingerlattakkanik pitsaassutsinillu piumasaqaatinik atuutsitsineq

Naalakkersuisoqarfimmik siulersuineq, tassani ilaallutik:

  • Aaqqissuussiffimmik ineriartortitsineq, aamma attaveqarnermi attuumassuteqarfinnilu pissutsinik pitsaasunik erseqqarissunillu pilersitsineq
  • Naalakkersuisoqarfimmi avataaniillu illua’tungerisanik pitsaasunik suleqatigiinnikkut attaveqarnernik siuarsaaneq
  • Sulisorisanik aqutsisoqarneq ineriartortitsinerlu
  • Suliarisassanik pilersaarusiorneq isumalluutaasunillu atuineq
  • Suliani sammisatigut ineriartortitsineq

Piginnaasat
Atorfiup inuttalerneqarnerani makku pingaartuutinneqassapput:

  • Nangitsilluni ilinniagarisaq attuumassuteqartoq, kiisalu naalakkersuisoqarfiup akisussaaffeqarfiani tamarmiusuni imaluunniit ilaata iluini attuumassuteqartutut suliani sammisarisani ilisimasaqarneq
  • Aaqqissuussiffimmi naalakkersuinikkut siulersorneqartumi suliaqarnermik, kiisalu aningaasaqarnermik aqutsinermik akisussaaffeqarnermik misilittagaqarneq
  • Kalaallit Nunaanni inuiaqatigiinni pissutsinik ilisimasaqarluarlunilu paasisimasaqarneq, ilanngullugu namminiilivinnissamik ingerlassamut ilisimasaqarluarneq
  • Naalakkersuisut Inatsisartullu, kiisalu kommunit akornanni sunniivigineqatigiinnermut ilisimasaqarluarneq
  • Tuluttut, qallunaatut kalaallisullu oqaatsitigut piginnaasaqarluarnerit
  • Nunat tamalaani suleqatigiinnermik misilittagaqarneq, ilanngullugit naalagaaffinnut allanut attaveqarnerit, nunat inoqqaavisa pisinnaatitaaffii, aamma nunat tamalaani isumaqatiginninniarnerit
  • Naalakkersuinikkut aaqqissuussinermut apeqqutinik naalagaaffimmilu inatsisaasuni sammisanik misilittagaqarneq
  • Siulersuinermik piginnaasaqarluarneq, ilanngullugit sulisorisanik ineriartortitsinissamut, naammassisaqarniarluni suliassanik aaqqissuussinermut, periusissatigullu tamanik takunnissinnaalluarnermut piginnaasaqarnerit
  • Suliniutinik anginerusunik aqutsinissamut, ataqatigiissaarinissamut, pingaarnersiuinissamut sunniuteqarluartumillu naammassinninnerup qulakkeernissaanut piginnaasaqarneq
  • Isumaqatiginninniarnermut, attaveqarnermut suleqatigiinnermullu piginnaasaqarluarneq

Attuumassuteqarfiit
Naalakkersuisoqarfiup suliassaqarfigisaata iluani Naalakkersuisut naalakkersuinikkut anguniagaasa atuutsilernerinut tunngatillugu apeqqutini Namminiilivinnermut, Nunanut Allanut Nunalerinermullu Naalakkersuisumut, ilanngullugulu naalakkersuisoqarfiup sammisatigut aqutarinissaanut ingerlannissaanullu naalakkersuisoqarfiup pisortaa attuumassuteqarpoq.

Naalakkersuisoqarfinnut allanut naleqqiullugu naalakkersuisoqarfiup suliassanik iluarsiisarnerata ataqatigiissaarneranut tunngatillugu apeqqutini, aammalu nalinginnarmik aqutsinikkut anguniakkanik, malittarisassanik, ingerlatassanik pitsaassutsinillu piumasaqaatinik il.il. malitseqartitsinermut tunngatillugu apeqqutini naalakkersuisoqarfiup pisortaa Naalakkersuisut Siulittaasuata Naalakkersuisoqarfianut attuumassuteqarpoq.

Atorfinitsitaanermut piumasaqaatit
Atorfik ukiunut aalajangersimasunut piumasaqaatitalerlugu inuttalerneqassasoq kissaatigineqarpoq, piaarnerpaamik imaluunniit isumaqatigiissutaasoq naapertorlugu.
Atorfik maannakkut LR 39-mut assingusutut inissisimaffeqarpoq. Akissarsiat (LR 39-mi) aalajangersimasutut aningaasarsiani ilaatitaasut ilanngullugit tassaapput: 1. april 2017-imi qaammatikkaanut 69.717,37 kr., ukiumoortumillu 836.608,44 kr.-ulluni, ilaallutik soraarnerussutisianut ilanngussat, ajornanngippallu ukiunut aalajangersimasunut atorfeqarnissamut ilassutit.

Aallaavigalugu isumaqatigiissutini piumasaqaatitigut atorfinitsitsisoqassaaq. Kalaallit Nunaanni pisortaqarfinnut atorfilittanut inatsisaasut najoqqutaralugit qinnuteqartoq atorfilittatut ataavartumik atorfeqartooriissappat atorfilittanut piumasaqaatitalinnik atorfinititsisoqarsinnaavoq.

Namminersorlutik Oqartussani atorfinitsitaanermut atatillugu naalagaaffimmi atorfilittat, aamma AC-mi isumaqatigiissutit arlallit najoqqutaralugit atorfeqartut, ilaatigut DJØF-ip aamma Finansministereqarfiup akornanni isumaqatigiissummi aningaasarsiaqarfiginagu sulinngiffeqarnissamut pisinnaatitaaffeqarput. Taamatuttaaq Namminersorlutik Oqartussani atorfinitsitaanermi aningaasarsiaqarani sulinngiffeqarnissaq pillugu qinnuteqaatinut Indenrigsministereqarfiup kommuninut nunallu ilaanut (regioninut) naapitsiniartoqassanera innersuussissutigisimavaa. Namminersorlutik Oqartussani inunnut atorfinitsinneqartunut sulinngiffeqarnissaq pillugu aalajangersakkaniipput aamma aapparisat/inooqatigisat.

Aningaasarsianut atorfinitsitaanermullu atugassarisat, ilanngullugit atorfininnermi soraarnermilu angalanernut pigisanillu nuussinermut pisinnaatitaaffiit piffissami atorfinitsitaaffimmi Namminersorlutik Oqartussat aamma pineqartutut isumaqatiginninniarsinnaatitaasutut kattuffiup akornanni isumaqatigiissut atuuttoq naapertorlugu.

Piffissap atorfeqarfigisap annerpaap aalajangerneqarsimannginnera atorfimmut atuuttuuvoq, aammalu ilassutaasutut suliaqarnermut ajunngitsorsiassanik akiliuteqarnerit pillugit aalajangersakkat, aamma ullut sulinngiffeqarfinnut annaasanut ajunngitsorsiassat pillugit aalajangersakkat atuuttuunnginnerat atuullutik; piffissaq suliffeqarfiusoq aallaaviatigut sapaatip akunneranut nalunaaquttap akunnerinik 40-nik sivisussuseqarpoq.

Inigisaq
Atorfimmut qaqugumulluunniit atuuttutut malittarisassat naapertorlugit pequtilersugaanngitsumik sulisorisanut inissiaq innersuussutaasinnaavoq. Inissiamik attartornermut akiliut qularnaveeqqullu inissiamut innersuussamut qaqugumulluunniit atuuttutut malittarisassat malillugit akiliutigineqassapput.

Sulisunut inissiaq atorfinitsitaanermut attuumassuteqarpoq, atorfinitsitaanerullu naanerani qimanneqassalluni. Inissiamik attartornermut akiliut inigisallu pitsaassusaa inissiap pisoqassusia, piginnittuunermut pissutsit il.il. apeqqutaallutik assigiinngiiaarsinnaavoq. Ataavartussatut sulisunut inissiap innersuunneqarnissaanut utaqqilluni piffissaqarsinnaavoq, taamaattumillu utaqqiisaagallartumik inissiisoqarsinnaalluni, ilanngullugit aamma najugaqatigiiffinni annikinnerusuni imaluunniit akunnittarfinni inissiani inissiisoqarsinnaalluni, taakkununnga akileraarutinik akiliisoqassalluni.

Ilassutitut paasissutissiissutit qinnuteqarnermullu piffissaliussaq kingulleq il.il.:
Aaqqissuussiffimmut pilersaarut aamma naalakkersuisoqarfiup suliassaanik il.il. nassuiaatit www.naalakkersuisut.gl-imi takuneqarsinnaapput.
Atorfik ataani linki aqqutigalugu qinnutigineqarsinnaavoq, tassunga ilanngunneqassallutik qinnuteqaat, cv, soraarummeernermi uppernarsaatit ilanngussallu attuumassuteqartut allat.
Atorfinitsitassatut piukkunneqartut misilitsinnermik ingerlassaqarnissaq naatsorsuutigissavaat.

Apeqquteqartoqassappat taakku naalakkersuisoqarfiup pisortaanut Søren Hald Møllerimut (sham@nanoq.gl), imaluunniit naalakkersuisoqarfiup pisortarigallagaanut Jacob Isbosethsenimut (jsis@nanoq.gl) saaffiginnissutaasinnaapput, oqarasuaat +299 34 50 00.

Qinnuteqarnermut ulloq killiliussaq tassaavoq 20. september 2017 nal. 12.

Søg stillingen online