Skip to main content
93

Dette jobopslag er udløbet

Inuit Innarluutillit illersuisoqarfiat Tilioq ineriartortitsinermi ilisimasalimmik suliniutini pilersaarusioqataasartussamik pissarsiorpoq

Inuit Innarluutillit illersuisoqarfiat Tilioq Sisimiuniittoq FN-ip innarluuteqarnermut isumaqatigiissutaa aallaavigalugu innarluutillit atugaannik sunniuteqarnissaq ineriartortitsinissarlu siunertaralugu suliniutini pilersaarusioqataasartussamik  pissarsiorpoq.  

 

Inuit Innarluutillit atugaannik suliniuteqarnissamut pikkoriffeqaruit, sapiissuseqarlutit, piumassuseqarlutit nukittullutillu sunniuteqarusuppit? Inuit Innarluutillit illersuisoqarfiat aqqutigalugu ulluinnarni Inuit Innarluutillit atugaannik ineriartortitsinissamut pilersaarusioqataanissamullu sunniuteqarnissannut Inuit Innalluutillit illersuisuat qanimut suleqatigalugu suliniutini pilersaarusioqataasartussatut periarfissatsialammik periarfissinneqarputit. 

 

Atorfik pillugu
Inuit Innarluutillit illersuisoqarfiat nutaarluinnaq Sisimiuni allaffeqarpoq. Isumaginninnermut, Ilaqutariinnut, Naligiissitaanermut Inatsisinillu Atuutitsinermut Naalakkersuisoqarfiup ataani immikkut namminersortumik inissisimavugut.

 

Immikkoortortaqarfitsinni ikittunnguulluta 3-4 suleqatigiissaagut, suleqatigiinnerlu eqaatsoq pingaartinneqarluinnartussaavoq. Suliniutini pilersaarusioqataasartussap Inuit Innarluutillit illersuisuat peqatigalugu qaammarsaaniutit paasissutissiissutillu naqitat ineriartortinnissaat suleqataaffigissavaa, kiisalu FN-ip innarluutillit pillugit isumaqatigiissutaa aallaavigalugu suliniutinut pilersaarusiorneq ataqatigiissaarinerlu isumagineqartartussaapput.

 

Suliniutini pilersaarusioqataasartup ulluinnarni sulinermi innarluutillit illersuisuat peqatigalugu aamma allaffissornermik suliniutinik aallarnisarneqareersunik nutaanillu ineriartortitassanik suliaqartassaaq, Tamatuma saniatigut suliniutini pilersaarusiortartutut innuttaasunut, kommuunimi sulisunut siunnersuinermik ilitsersuinermillu suliaqarnermi peqataasartussaavutit. Suliniutinut assigiinngitsorpassuarnut sulinermi peqataatinneqartassaatit, aaliangersimasumillu nalunaarusiornerit, missingersuutinik suliaqarnerit avammullu tusagassiutinut nalunaaruteqartarneq suliassavit ilagaat.

 

Taamaattumik suliniutit assigiinngitsut ataatsikkut pisarsinnaaneri eqqarsaatigalugit, suliniutini pilersaarusiortutut patajaatsuunissaq nukittuujunissallu pingaaruteqarpoq. Politikkikkut anguniakkatut siunnerfiit, inuiaqatigiinnilu sammineqartut aallaavigalugit eqaatsumik sulinikkut allanngoriarsinnaanerit ammaffiginissai pingaaruteqarpoq. 

 

Ulloq atorfiniffissaq pissaaq: 1. marts 2018 imlt. isumaqatigiissuteqarnikkut.

 

Atorfimmut tunniusimasumik imalu piginnaanilimmik pissarsiorpugut:

-   Nunap inuiaqatigiillu kulturikkut atugaannik ilisimasalik

-   Ajornanngippallu kalaallisut, qallunaatut tuluttullu piginnaanilimmik 

-   Inuit pisinnaatitaaffiinik toqqammaveqarluni suleriuseqarsinnaasoq

-   Ajornanngippat iliniagartuutut tunuliaqutalik misilittagaqareersorlu.

-   Ajornanngippat inuit innarluutillit pillugit ilisimasalik imlt. inunnik isumaginninnikkut, innarluutilinnik peqqinnissaqarfimmiluunniit sulinermi misilittagalik.

-   Nammineersinnaasoq, pilersitsisinnaasoq, utaqqiinnanngitsoq pilersaarusianut eqeersimaartoq siammasissumillu isiginnittaaseqarluni suleriaasilik

-   Suliniutinik pitsaasunik aallartitsisinnaasoq isumassarsianillu pitsaasunik pilersitsisinnaasoq

-   Suliassanik assigiinngitsunik pingaarnersiulluarsinnaasoq ulluinnarnilu sulianut atatillugu siunertanut tunngasunik suliaqarsinnaasoq

-   Suleqatiginnissinnaalluartoq – suliallu akimorlugit allanik peqateqarluni eqimattaakkaartunik pilersaarusiorsinnaasoq 

-   Inunnik sullissinermi inuit assigiinngissinnaanerannik inissaqartitsillunilu paasinnittoq

-   Tusarniaanerit akissutaat ilisimatusaatillu paasisat pillugit pitsaasumik ingerlatitseqqiisinnaasoq, inuillu innarluutillit atugaat pillugit tusagassiuutinut innarluutillillu pillugit attuumassuteqartunut ingerlatitseqqiisarnissaq.

-   Qarasaasiamik eqaatsumik atuilluarsinnaasoq.

-   Sulinermi piffissap nikerarsinnaaneranut tulluarsallaqqissoq 

 

Immikkoortortatsinni ikittunnguusussaagatta, pingaartipparput atorfimmut inummik tulluartumik suleqatitaarnissarput, qinnuteqaatillu ataatsimut nalilersorneranni piukkunnarnersiuilluni piginnaasat pisinnaasallu isiginiarneqartussaapput..

 

Neqeroorutigaarput:

-   Suliffeqarfiup atorfiullu nutaap pissanganarlunilu allanngorartup ulluinnarni sulinikkut immersuiffigineratigut ineriartortinneqarneranullu sunniuteqaqataaffiginissaanut periarfissaqarputit 

-   Suliffeqarfik sulianut tunngasunik avatangiisilik, suleqatinik pikkorissunik pilersitsisinnaasunillu unammillernartoqarsinnaasoq, illillu nammineq unammillerfigisinnaasannik periarfissalik

-   Suliffeqarfik inuit innarluutillit atugaannik angusassanik pilersitsiffittut sullissivik, sulianullu ineriartortitsivissatut nalinginnaasumik kivitseqatigiilluni suleqatigiiffissaq

-   Suliffimmi avatangiisit pingaartinneqarlutillu assigiinngitsuussuseq naleqartinneqarluni suliffeqarfiusoq

 

Akissarsianut- atorfinitsitaanermilu atugassarititaasut
Akissarsiat atorfininnermilu atugassarititaasut, tassunga ilanngullugit atorfinitsitaanermi soraarnermilu angalanissamut akiliunneqarnissamut pisattallu nassiunneqarnerannut Kalaallit Nunaanni  Namminersorlutik Oqartussat kattuffiullu isumaqatiginniarsinnaatitaasup attuumassuteqarfisap akornanni isumaqatigiissutaasut atorfininnerup nalaani atuuttut naapertorlugit ingerlanneqassaaq.

 

Atorfik piffissaligaasumik ukiuni pingasuni pissaaq, sivitsorneqarnissaali inatsit innarluutillit illersuisuata maleruagassaa naapertorlugu periarfissaavoq http://inatsisit.gl/lov?rid={FFE58690-9A67-40BC-A12D-76052F88F5D9} 

 

Sapaatip akunneranut 40 tiimi suliffiusassaaq. 

 

Ineqarneq
Atorfimut atatillugu malittarisassat naapertorlugit qaqugukkulluunniit atuuttut tunngavigalugit sulisunut inissiamik pequsersorsimanngitsumik innersuussisoqarsinnaavoq. Malittarisassat qaqugukkulluunniit atuuttut naapertorlugit inissiamut innersuutigineqartumut akiliutit qularnaveeqqutillu akilerneqassapput. Atorfimmut  atatillugu ini atorfeqarnermut tunngavoq atorfeqarnerullu unitsinnerani qimanneqartussaavoq.

 

Ineqarnermut akiliut aamma inissiap pitsaassusaa nikerarsinnaapput inissiap qanga sananeqarsimanera, piginnittua il.il. apeqqutaallutik. Sulisutut ataavartumik initaarnissaq utaqqinarsinnaavoq, taamaattumik utaqqiisaagallartumik inissiisoqarsinnaasarpoq, tassunga ilanngullugu najugaqartigiiffinnut minnerusunut imaluunniit akunnittarfimmi inissianut inissiisoqarallarsinnaalluni, taakkulu akileraarusersorneqartarput.

 

Annertunerusumik paasissutissat
Atorfik pillugu annertunerusumik paasisaqarusukkuit innarluutillit illersuisuat Christina Johnsen oqarasuaat +299 55 19 50 atorlugu imlt. E- mail: Cjoh@nanoq.gl paasiniaanissannut tikilluaqqusaavutit.

 

Namminersorlutik Oqartussat ataani sulerusukkuit annertunerusumillu paasisaqarusukkuit nittartagaq www.naalakkersuisut.gl, ataanni ”atorfiit” iserfigalugu atuarsinnaavat. Annertunerusumik Sisimiut pillugu paasisaqarusukkuit nittartagaq una https://www.qeqqata.gl/Emner/Om_kommunen/Byer_bygder/Sisimiut?sc_lang=da iserfigalugu paasisaqarnerusinnaavutit 

 

Qinnuteqaat
Allargarsiissut piffissami ulloq 19. januar 2018 tikillugu saqqummiunneqassaaq.

 

Oqaloqatiginninneq nammineerluni ornigunnikkut imlt. videokonference atorlugu sapaatip akunnera 4 ingerlanneqarnissaa naatsorsuutigineqarpoq .

 

Søg stillingen online