Skip to main content
96

Dette jobopslag er udløbet

Digitalimik Sullissinermut Aqutsisoqarfik suliniummut aqutsisumik sulisussarsiorpoq

Atorfiup nassuiarneqarnera
Nunami sumiiffiit imminnut ungasissorujussuusut silallu imaannaanngittarnera allanngorartuaannarfiusoq digitalinngorsaaneq sapiissuseqarfigalugu peqataaffigerusuppiuk? Qarasaasiaqarnikkut suliniutinik aqutsinermik misilittagaqarpit aamma digitalinngorsaaneq soqutigisaraajuk? Taamaappat Digitalimik Sullissinermut Aqutsisoqarfimmi suliniummut aqutsisunngorsinnaavutit.

Kalaallit Nunaata siuarsaavigineqarneranut digitalinngorsaaneq suliniutaavoq pingaarutilik illillu Digitalimik Sullissinermut Aqutsisoqarfimmi suliniummut aqutsisutut Kalaallit Nunaata digitalimik ingerlatsivigineranut siunissaanullu tunngatillugu sunniuteqarnissannut periarfissaqassaqaatit.

Digitalinngorsaanermut periusissiarput anguniagaqarluartoq 2018-imi marsip qaammataani tamanut nalunaarutigineqassasoq naatsorsuutigaarput. Digitalinngorsaanermut periusissiaq aallaavigalugu suliniutinut nutaanut aalajangiinissamut tunngavissanik suliaqaqataassaatit. Suliniutit suliallu nammineq ingerlatarinissaat eqqarsaatigalugit angisuumik akisussaaffilerneqarnissat naatsorsuutigissavat.

Aaqqissuulluagaasumik anguniagaqarluartumillu sulisinnaanerit naatsorsuutigaarput aamma soqutigisaqaqatigiit tamarmik tutsuiginartumik suleqatiginissaat naatsorsuutigalutigu.

Piginnaasat ataani allaqqasut neriuutigaavut pigissagitit:

  • Qarasaasiaqarnikkut suliniutinik aqutsinermi sivikinnerpaamik ukioq ataaseq
  • Soqutigisaqaqatigiit teknikkimik siuarsimasut siuarsimavallaanngitsullu attaveqarfigilluarsinnaagitit
  • Digitaliusumi niuernikkut inerisaanissamut ilisimasaqarneq soqutigisaqarnerluunniit
  • Qarasaasialerinikkut digitalinngorsaanikkullu naleqquttumik ingerlariaqqiffiusumik ilinniagaqarnissat
  • Suliat piffissami sivikitsumi naammassisassat suliallu arlallit ataatsikkut suliarisinnaassagitit

Digitalimik Sullissinermut Aqutsisoqarfimmi qeratanngitsumik qiimanarfiusumillu ingerlariaaseqarpugut inooqatigiinnerlu pitsaasuulluni kajumissuseqarneq sulianillu qilanaartarneq pingaartinneqarlutik. Immitsinnut unammillersinnaasarpugut ullullu tamaasa aqutsisut suleqatillu siunersiueqatigineqartarlutik. Naak politikkikkut aqunneqartumi suligaluarluta, aalajangiiffissat ungasinneq ajorpavut, suliffimmilu ileqqorineqartut ilagaat, akisussaassuseqartumik kiffaanngissuseqarneq. Suliffik eqaatsumik periuseqartarnermik pingaartitsiffiusoq suliatigut inuttullu unammillernarsinnaasunik pissanganartunik peqarpoq, illillu ulloq suliffigisat nammineerlutit aaqqissuuttassavat.

Akissarsiaqartitaaneq atorfinitsitaanerlu
Akissarsiaqarnermut atorfinitsitaanermullu atugassarititaasut, matumani nuunnermi aallarnermilu angalasinnaatitaanerit pequtinillu nassiussisinnaatitaanerit ilanngullugit, Kalaallit Nunaanni Namminersorlutik Oqartussat kattuffiullu isumaqatigiinniarsinnaasup pineqartup akornanni isumaqatigiissutaat naapertorlugu pissapput.

Digitalimik Sullissinermut Aqutsisoqarfimmi sulisut ataqatigiisinneqarnerat inuiaqatigiinnut naleqquttuunissaat kissaatigaarput, qinnuteqartullu piukkunnassusaat piginnaasaallu tunngavigalugit naliliisassalluta. 
Paasissutissat allat atuakkit uani http://www.digitalimik.gl/

Atorfik pillugu paasissutissat allat paasiniaaffiginiaraanni immikkoortortami pisortamut Tom Nørregaard Andersenimut emailikkut tono@nanoq.gl-imut imaluunniit oqarasuaatikkut +299 345894-imut saaffiginninnikkut pissarsiarineqarsinnaapput.

Qinnuteqaatit takkuttarneri ilutigalugit ataavartumik suliarineqartassapput, taamaattoq Digitalimik Sullissinermut Aqutsisoqarfimmi kingusinnerpaamik 21. januaari 2018-imi tigoreerneqarsimassapput.

Søg stillingen online