Skip to main content
79

Dette jobopslag er udløbet

Isumaginnittoqarfimmut, utoqqarnik, meeqqanik, inuusuttunik innarluutilinnillu sullissinermut fagkoordinatorit pingasut

Kommunimi nutaami, Kommune Qeqertalik-mmi, 1.januar 2018-mi pilersinneqartumi, fagkoordinatorit pingasut qullersaqarfiup allaffeqarfiani Aasianniittumi suliaqarfiup Inuit ataani sulilertussat pissarsiariniarsaraagut. Suliaqarfik Inuit immikkoortortaqarfinnik makkunannga sullissisarpoq: ulluunerani neqeroorutit, atuartitsineq, ilinniarneq, meeqqanut neqeroorutit, ilaqutariit immikkut ittumik pisariaqartitsisut (inersimasut, meeqqat), innarluutilinnut neqeroorutit aamma utoqqarnut neqeroorutit.

Isumaginninnerup, utoqqarnik, meeqqat inuusuttullu kiisalu innarluutillit sullinneqarnerisa iluanni fagkoordinatorit pingasut nutaat ilagilersinnaalluarpaatsit. Suleqatigiit pilersinneqaqqammisut pingasut taakkua ilagilissavaatsit. Suleqatigiit innuttatta attaviginninerminni pingaartinneqartutut misigisimatinneqartassapput ilutigalugulu innuttaasut kommunimut ikiortissarsiortut paasiniaasullu ajornannginnerusumik pineqartalernissaat illit sulissutigisartussaassavat. Innuttaasut uatsinnit tusarnaarneqartartut pimoorunneqartutullu kiisalu sukkasuumik iliuuseqartartugut  – naak sunik tamanik ikiuuttuaannarsinnaanngikkaluartugut - misigisimatinneqartassapput.

Innuttaasut pisinnaatitaaffiitik malillugit ikiorneqartarnissaat Kommune Qeqertalik-mmi kissaatigaarput. Kalaallit Nunaanni kommunini suleqatigiillammannik pilersitsinissarput anguniagaraarput, atorsinnaalluartunik suleqataasinnaasunik, nutaanik aaqqiissutissanik ineriartortitsisut taamaalillutillu sukkanerusumik eqaannerusumik sullissisartut kiisalu sunik tamanik ilisimasaqarlutik innuttaasunik peqataatitsillutik kiffartuussisinnaasunik innuttaasullu namminneq inuuneranni peqataatitsillutik  sullissisinnaasut sulisorerusuppagut.

Oqaatsit taakkua sakkortupput aamma anguniakkavut piumasaqaasiorluta aatsaat angusinnaassavagut, taamaattumik fagkoordinatorit pingasut nutaat taakkua arlalinnik akisussaaffeqassapput. Paarlattuanilli ulluinnaat pissanganartut tamatigoortullu aamma misigisassaassapput, taakkunanilu illit suliaqarfernut sunniuteqangaatsiartussaassaatit.

Pingaarnertut suliassatit ukuussapput:

  • Suliaqarfivit iluani ilinniagaq aallaavigalugu immikkut ittumik akisussaaffik, pitsaassutsimik qulakkeerinninneq malitsigitittarlugu
  • Aqutsineq, ilinniakkanik ineriartortitsinerup piviusunngortittarnera akuuleriartortinneqartarneralu
  • Aqutsineq aamma sulianik ataqatigiissaarinninneq

Naalakkersuinermik suliallit kommunimut tamarmut siunnerfiinik inerisaanermut, piviusunngortitsinermut akuulersititsinermullu aamma akisussaaqataassaatit. Sulisut piginnaasaanik ineriartortitsineq akisussaaffigissavat; taamaalilluni sulisut ilinniakkatigut piginnaasat aamma ilinniagaq aallaavigalugu suliat imminnut ataqatigiillutik nukissaqartinneqarsinnaalersinneqassapput. Kommunip iluani fagkoordinatorit allat illoqarfinnilu pisortat suleqatigalugit kommunip anguniagai nutaat aallarteriikkat tunngaviusumik aqutsineq periusissiornerlu aamma peqataaffigalugit akuutitsiartuaalissaatit.

Fagkoordinatoritut kommunip illoqarfiini nunaqarfiinilu sulinerit ataqatigiittuunissaanik siunertaqarnissaallu siuttuuffigalugit qulakkeertassavatit. Suliaqarfiup iluani ilinniakkatigut inerisaaneq tapersersortassavat inerisartarlugulu, taamaalilluni sunik tamanik eqqarsartaaseqarneq, pinaveersaartitsineq allatullu iliorluni pinaveersartitsineq sammineqaleriartortinneqassapput.

Suliassaq sapiiserfigerusukkukku ataani allassimasut ilinnoortuunissaat ilimasuutigivarput:

  • Attuumassuteqartumik ilinniagaqartutit. Isumaginninnermut siunnersortaasinnaavoq allatulluunniit isumaginninnerup iluani, perorsaanerup iluani imaluunniit inuiaqatigiilerinermik ilisimatusarluni ilinniagaasinnaavoq imaluunniit illit nammineq suliaqarfiup iluani misilittagartuusinnaavutit
  • Periusissiortartutut eqqarsarsinnaassaatit, inuttat innarligassaanngitsuussaaq sunniilluarsinnaassallutillu
  • Allanngoriarnerni aqutsisutut misilittagaqassaatit
  • Aaqqiissuteqarsinnaanermik eqqarsartaaseqassaatit, ineriartortitserusuttuullutit attaveqallaqqissuullutillu
  • Suliaqarfivit iluani suliap suliarineqarnera, piviusunngortinnera pitsaassusaalu malinnaavigisinnaassavat
  • Suliaqarfivit iluani inatsisinik suliaqarlutit misilittagaqassaatit aamma suliat qitiinik suliaqarneq qulakkeeqataaffigisassavatit
  • Sullissineq nakkutigisassavat tassungalu atasunik siunnersuisarlutit kiisalu kommunip suliffeqarfiutai illit suliaqarfivit iluaniittut nakkutigisassallugit
  • Taakkua saniatigut ulluinnarni unammillernartorpassuit ajornartorsiutillu tassanngaannaq takkussortorpassuit suliarisinnaassavatit. Taamaattumik illit inuttat patajaatsuullunilu sakkortuumik soqutiginnittuussaaq.

Ilinniagaq aallaavigalugu piginnaasaapput taakkua. Illit inuttat pillugu aamma arlalialunnik kissaateqarpugut:

  • Qiimasuuvutit, tutsuiginarpasillutit, nuannaalersitsisinnaanermut nukissaqarlutit suliffeqarfimmilu sunniuteqarluarsinnaallutit
  • Attaveqaatinik inunnillu attaveqarfissanik pilersitsillaqqissoq, akuersaarpasillutit sulisoq attaveqarneq aqqutigalugu akuutitsisinnaasoq
  • Ulluinnarni siuttuussaatit inuillu ataasiakkaat periarfissaannik nukittoqutaannillu takunnissinnaassallutit, isumassarsititsisassaatit, ilinniagarlu aallaavigalugu malitseqalersinnaanerit siunertaqartuusoq pilersisinnaassavat
  • Misissueqqissaarsinnaassuseqassaatit siunissarlu ungasinnerusoq eqqarsaatigalugu sulianik tamanik malinnaasinnaaneq pilersissavat ilutigalugulu suliaqarfivit iluani ilisimasat nutaat pillugit illit nammineq malinnaassallutit
  • Ilinniagaq aallaavigalugu oqaloqatiginnissinnaassuseqassaatit suleriaaseq atorneqartoq ataqqillugu angusanik tunniussisinnaassallutit
  • Ulluinnarni sulinermi avatangiisit assigiinngiiaartorujussuit akornanni ilorrisimaarinnissuseqarsinnaassaatit, naammaginartumik sukkassusilimmik sulisarlutit kiisalu ataatsimoorluta kivitseqatigiilluta persuarsiorpaluttuunngitsumik oqaloqatigiissinnaassaagut

Uagut ilinnut fagkoordinatorimut ukua neqeroorutigaagut

  • Atorfik namminersorfiusoq ineriartungaatsiartoq – pisortaqatigiinni nutaani pissanganartumik inissaqartitsisoq
  • Illerngit nutaat aqqutigineqarnikuunngisaannartut aqqutigissallugit periarfissatsialak
  • Ulluinnaq nikerangaatsiartunik akisussaaffilerujussuaq sunniuteqarfiungaatsiarsinnaasorlu
  • Suleqatit soqutiginnittut pitsaasullu
  • Ilinniagaq aallaavigalugu unammilligassat angisuut pissangartullu
  • Aqutsinermik ilinniarnissamik inuttullu ineriartornissamik periarfissatsialaat
  • Oqaloqateqarluni imaajaqatigiittarneq
  • Kommunip iluani illoqarfinnut allanut nunaqarfinnullu angalanerit

Uagut pilluta

Kommune Qeqertalik tassaavoq Qeqertarsuup Tunuata kujasinnerusortaani kommuni nutaaq pilersinneqaqqammisoq. Kommunerput sisamanik illoqarfeqarpoq arfineq-pingasunillu nunaqarfeqarluni aamma kommunip suliai suni tamani ersittuunissaat anguniagaraarput. Immikkut ittumik sammisarput pingaarneq tassaavoq eqaassuseq. Innuttaasunit tikikkuminartoorusuppugut aamma kiffartuussilluartunik sulisoqarusuppugut kiisalu kalaallit naleqartitaannut kulturikkullu tunuliaqutaannut kommunimi sulineq nalimmassarusullutigu. Aaqqissuussaanerput nutaaq pillugu uani itinerusumik atuarit: http://www.qeqertalik.gl

 

Aasiaat Qeqertarsuup Tunuata kujasinnerusortaani qeqertamiippoq. Qeqertaq qeqertarpassuit iluatungaaniippoq aamma imaq qeqertap qanittuaniittoq qajartorfissaqqilluartutut ilisimaneqarpoq kiisalu Kalaallit Nunaanni arfernit imartarput nuannarineqarluartartoq aamma ilisimaneqaatigaarput. Arferit isiginnaarlugit qatsukkunnanngikkitit oqarutta upperitigut. Illoqarfik Kalaallit Nunaanni illoqarfiit annersaasa tallimaraat 3.100-t missaanni najugaqarfigineqartoq aamma kommuni katillugit 6.500-t missaanni najugaqarfigineqarpoq. (arferit qimmillu qimuttut minillugit).

Pineqaatissinneqarsimannginnermut uppernarsaat aamma meeqqamik pinerliisimannginnermut uppernarsaat

Illit atorfiit pineqaatissinneqarsimannginnermut uppernarsaammik aamma meeqqamik pinerliisimannginnermut uppernarsaammik piniarnissamik inatsimmut ilaavoq. Inatsit taanna naapertorlugu kommuni naammaginartumik pineqaatissinneqarsimannginnermut uppernarsaammik aamma meeqqamik pinerliisimannginnermut uppernarsaammik tigusaqareerpat aatsaat atorfinititsisoqarsinnaavoq.

Meeqqamik pinerliisimannginnermut uppernarsaat pineqartumit akuersilluni atsiorneq kommunimit pissarsiarineqareerpat pissarsiariniarneqassaaq.

Akissarsiat atorfeqarnermilu atugassarititaasut

Akissarsiat atorfinitsitaanermilu atugassarititaasut (atorfininnermi soraarnermilu angalanivit akilerneqarnera pisattavillu angallanneqarnerinik akiliunneqarsinnaatitaanitit ilanngullugit) piffissami atorfiniffiviup nalaani isumaqatigiissut imaluunniit Kalaallit Nunaanni Namminersorlutik Oqartussat kattuffiullu isumaqatiginninniarsinnaatitaasup akornanni isumaqatigiissut naapertorlugu aalajangersarneqassapput. Atorfinitsitaassaguit qaammatini pingasuni siullerni misiliutigalugu suleqqaasaatit.

 

Inimik atorfeqarnernut atasumik pisataqanngitsumik innersuunneqarnissarnut malittarisassat qaqugukkulluunniit atuuttut naapertorlugit periarfissaqarputit. Inimut innersuunneqartumut malittarisassat atuuttut naapertorlugit ineqarnermut qularnaveeqqutinullu akiliisassaatit. Ineqarnermut akiliut aamma inip innersuussap qanorittunera, ukiuni qassini napanera, piginnittut il.il., apeqqutaallutik nikerartarsinnaapput.

 

Ini atorfeqarnerni innersuussaq suliunnaaruit qimattussaassavat. Taassuma saniatigut ataavartumik inimik innersuussisoqarnissaata tungaanut utaqqimaarnerni utaqqiisaagallartumik ineqartinneqassaatit, ataatsimoorulugu najugaqatigiiffinni imaluunniit akunnittarfimmi inissianut inissinneqaratarsinnaanerit uani ilaavoq.

 

Paasissutissat amerlanerit
Apeqqutissarpassuaqassajunnarsivutit. Taamaattumik atorfik pillugu paasissutissat amerlanerit Hans Peter Poulsen -imut mail hppo@qeqertalik.gl imaluunniit oqarasuaammut angallattarissamut +299 48 24 73-mut imaluunniit Dora Kleist-imut mail dokl@qeqertalik.gl imaluunniit oqarasuaammut +299 38 70 17 saaffiginnillutit pissarsiarisinnaavatit.

Qinnuteqaammik nassitsigut

Atorfik periarfissaqartutut isigigukku aamma kommunitsinni inerisaanermut peqataasinnaaguit qinnuteqaammik nassiussigit ima ilisarnaasarlugu ”isumaginnittoqarfimmi fagkoordinatori”. Ilinniarnivit siornatigullu suliffigisimasavit naatsumik oqaluttuassartai paasissutissiissutigalugit (CV-eq), kiisalu ilinniakkap uppernarsaatai il.il. ilanngullugit nassiutikkit.

 

Qinnuteqaatit mailerutigisinnaavat uunga: qeqertalik@qeqertalik.Gl

 

Imaluunniit allakkatigut uunga nassiussinnaavat:

 

Kommune Qeqertalik

Niels Egedes Plads 1, Postboks 220

3950 Aasiaat

 

Qinnuteqaat ulloq 6. august 2018-imi kingusinnerpaamik tigoriissavarput.