Skip to main content
83

Pilersaarutinik ataqatigiissaarisumik /Ilisimatusarnermut assistentimik

Pinngortitaleriffimmi Silap Pissusaanik Ilisimatusarfik pilersaarutinik ataqatigiissaarisumik / ilisimatusarnermut assistentimik misilittagartuumik pissarsiorpoq
 
Silap Pissusaanik Ilisimatusarfik Pinngortitaleriffimmi immikkoortortaqarfiuvoq. Silap Pissusaanik Ilisimatusarfik ilisimatusarnernut, siunnersuinernut ilinniartitaanernullu immikkoortortaqarfiuvoq silap allanngorneranit immami uumasoqatigiinnut avatangiisaannullu kiisalu kalaallinut inuiaqatigiinnut sunniutaanik ilisimatusarfiusoq. Taamatut ilisimatusarnerit paasiuminaatsuupput aammalu ilisimatuussutsikkut sammisaqarfippassuarnik peqataatitsivoq akuutitsisuullunilu, ilaatigut uumassusilernermik, tappiorannattulerinermik, biokemimik, mikrobiel økologimik aamma planktoninik, immap naqqata uumasuinik, aalisakkanik uumasumillu miluumasumik imarmiunik misissuinerni molekylærbiologimik ilisimatusartut peqataapput.

Laboratoriami pilersaarutinik ataqatigiissarisumik / ilisimatusartunut assistentimik misilittagalimmik Silap Pissusaanik Ilisimatusarfimmi sulinermut savituumut unammillernartumullu peqataalersussamik pissarsiorpugut. Suliassat tamatigoortuupput aamma qinnuteqaateqartoq Silap Pissusaanik Ilisimatusarfimmi teknikerinik ilisimatusartunillu allanik qanimut suleqateqassaaq. Inuk suleqataalluartoq tamatigoortorlu aamma suleqatiginnissinnaassuseqarlunilu ataqatigiissarisinnaassuseqartoq, ulluinnarni suliassanik unammillernartumik suliarinnissinnaasumik aamma ilisimatusartunik nunanit tamalaaneersunik suleqateqarusuttumik pissarsiorpugut. Sulininni peqqissaartuunissat, suliniuteqarluartuunissat, imminut kajumissarsinnaanissat aamma suleqatiginnissinnaanissat nammineerlutillu sulisinnaanissat pingaartissavarput.

Atorfimmi suliat tikillugit suliartortoqartarnissaa naatsorsuutigineqanngilaq, annermik umiarsuarnit anginerusunit mikinerusumilluunniit misiligutissanik katersisoqartarpoq. Ilaatigut Nuup Kangerluanit aammaKalaallit Nunaata Kangiata Avannaarsuanit Zackenbergimut suliat tikillugit suliartorfiusumit misiligutissanik uuttortakkanillu katersinerit. Taamaattumik qinnuteqaateqartup immakkut angallarissuunissaa, angallateeqqanik suliarinnissinnaanissaa iluarsaassisarnissaalu iluaqutaassapput.

Suliassat pingaarnerit

  • Immami nakkutilliinermi suliat tikillugit suliartornissanik pilersaarusiornerit suliartornerillu
  • Immikkoortortaqarfimmi laborantit ilisimatusartullu suleqatigalugit misissueqqissaarinerit
  • Misissueqqissaarinernut periutsinik pitsanngorsaanerit nassuiaanerillu
  • Atortussanik nutaanik misileraanerit naleqqussaanerillu
  • Eqqagassanik navianartunik suliarinninnermut suujunnaarsitsinernullu akisussaasoq
  • Kemikaliat nalunaarsorlugit aamma laboratoriami isumannaallisaaneq malittarisassanut atuuttunut naapertuuttuuneranik qulakkeerinninnissaq
  • Laboratoriami atortorissaarutinik atortunillu nalinginnaasumik ingerlatsinernut aserfallatsaaliuinernullu peqataanerit
  • Suleqatigiinni ilisimatusartut misileraallutik sulineranni misiligutissanillu katersineranni ikiorlugit

Piginnaasat
Qinnuteqaateqartup laboratoriami misilittagaqarnissaa, suleqatigiinni suleqataanermut sungiussisimasuunissaa tamannali ilutigalugu nammineerluni sulisinnaanissaa timitaliisarnissaalu pingaartinneqarput. Laboratoriami aaqqissuussinerni ilusilersuinernilu piginnaasat aamma laboratoriami ulluinnarni suliassanik pilersaarusiornaanerit suliarinnissinnaanernillu immikkut pingaartinneqarput. Suleqammik inussiarnersumik suleqataalluartumillu aamma assigiinngitsunik sulialinnik suleqateqarsinnaasumik pissarsiorpugut.

Oqaatsit 
Danskisut tuluttullu oqallorissuunissaq naliliinermi pingaaruteqarput aamma kalaallisut oqaaseqartuuneq iluaqutaassaaq.

Aningaasarsiatigut atorfinitsitaanermilu atugassarititaasut
Akissarsiat atorfininnermilu atugassarititaasut, tassunga ilanngullugit atorfinitsitaanermi soraarnermilu angalanissamut akiliunneqarnissamut pisattallu nassiunneqarnerannut Kalaallit Nunaanni Namminersorlutik Oqartussat kattuffiullu isumaqatiginniarsinnaatitaasup attuumassuteqarfigisap akornanni isumaqatigiissutaasut atorfininnerup nalaani atuuttut naapertorlugit ingerlanneqassapput.

Najugaq
Atorfimmut atatillugu sulisunut inissiamik innersuussisoqarsinnaanngilaq. Qinnuteqartoq Namminersorlutik Oqartussani atorfeqarnermini sulisutut ineqartinneqareersimaguni sulisutut ineqarsinnaatitaanini tigummiinnarsinnaavaa. Atorfimmut atatillugu ini atorfeqarnermut tunngavoq, taamaalilluni atorfeqarnerup unitsinnerani qimanneqassalluni.

Qinnuteqaat 
Qinnuteqaat aamma siusinnerusukkut ilinniagarisimasanut  uppernarsaatit sulisitsisumillu oqaaseqaatit uunga nassiunneqassapput:
Malene Simon, immikkoortortaqarfimmi pisortaq

Qinnuteqaatit, CV, ilinniarsimasanut pikkorissaatigisimasanullu uppernarsaatit kiisalu paasissutissat allat pisariaqarsinnaasut "qinnuteqaat nassiuguk" toorlugu nassiutikkit. 
E-mail-ikkut qinnuteqaatinik tigusineq ajorpugut.
 
Qinnuteqaateqarnissamut killissarititaasoq: 29. august 2018

 

Naalakkersuisut pillugu
Pissanganartunik ujarlerpit sulinerillu aqqutigalugu ulluinnarni inuunermut sunniuteqarnissat kissaatigaajuk, taamaaliornikkullu siunissamik ilusilersueqataallutit? Taava Namminersorlutik Oqartussani sulinissaq ilinnut tulluuppoq. Suliamut tunngatillugu sulisutut piginnaasaqarnissaq, pissutsinut misissuilluarsinnaaneq kiisalu allanngornernut piareersimajuarneq assut pingaartitaraagut. Tamakku saniatigut ulluinnarni suliassannik ilusilersuisinnaanerit uippakajaalertannginnissallu pingaaruteqarput. 

Namminersorlutik Oqartussat tassaapput, Qitiusumik Allattoqarfik 650-it missaanik sulisulik naalakkersuisoqarfinnut arfineq-pingasunut aqutsisoqarfinnullu arlalinnut agguataarsimasut. Katilluta inuit 2500-t sinnerlugit Namminersorlutik Oqartussanut atassuteqarpugut. Qitiusumik Allattoqarfiup suliassaraa Naalakkersuisut aalajangernissaannut tutsuiginartumik tunngavissinnissaat kiisalu politikkikkut aalajangikkat piviusunngortinnissaat. 

Namminersorlutik Oqartussat pillugit annertunerusumik uani atuarsinnaavutit http://www.naalakkersuisut.gl/job

Qinnuteqaat nassiuguk