ICC-p politikki erseqqissoq ujartorpaa
ICC-p nunatsinni siulitttaasuata Aqqaluk Lyngep silap allanngoriartornera pillugu danskit naalakkersuisuiniit politikki ujartorpaa.
Silap allanngornerata kingunerisai takutinniarlugit danskit naalakkersuisui inunnik nuimasunik nunatsinnut tikeraartitseqattaarput, nunarpulli avammut nittarsaanneqaraluartoq, danskit namminneq politikkertik takutittariaqaraat, Inuit Issittormiut Siunnersuisoqatigiiffiata ICC-p nunatsinni præsidentiata Aqqaluk Lynge-p oqaatigaa:
- Danskit iluamik politikkeqarnissaat ujartorpara. Qanoq iliuuseqarniarpat? Qanoq ililluta suleqatigiinnerulersinnaavugut? Nunarsuarmi allannguutit taama annertutigisut qanoq piareersimaffigissanerivut apeqqutigerusuppara, Aqqaluk Lynge KNR-imut oqarpoq.
- Ministeriunerup Anders Fogh Rasmussenip, avatangiisinullu ministerip Connie Hedegaardip, nunarput avammut nittarsaappaat, namminneq qineqqusaarutigalugu. Allamik naamik. Taamaattumik ujartorpara nunatsinni innuttaasunut sunniuteqartumik qanoq iliuuseqartoqarnissaa, ICC-p nunatsinni præsidentia Aqqaluk Lynge oqarpoq.